ပရီးမီးယားလိဂ်၏ ဖေဖော်ဝါရီအတွက် အကောင်းဆုံးနည်းပြဆုကို ဂွာဒီယိုလာ ဆွတ်ခူး

လန်ဒန်၊မတ် ၁၁ ရက် (ဆင်ဟွာ)

အင်္ဂလန်နိုင်ငံ ပရီးမီးယားလိဂ်ဘောလုံးပြိုင်ပွဲ၏ ဖေဖော်ဝါရီလအတွက် အကောင်းဆုံး နည်းပြဆုကို တစ်လတာအတွင်း အကောင်းဆုံးရလဒ်များ စွမ်းဆောင်ပေးခဲ့သည့် မန်ချက်စတာစီးတီးနည်းပြ ပတ်ဂွာဒီယိုလာက ဆွတ်ခူးရရှိသွားကြောင်း သိရသည်။

မန်ချက်စတာစီးတီးအသင်းသည် ဖေဖော်ဝါရီလအတွင်း ယှဉ်ပြိုင်ကစားခဲ့သော ပရီးမီးယားလိဂ် သုံးပွဲစလုံးတွင် အနိုင်ရရှိခဲ့ပြီး ၈ ဂိုးအထိသွင်းယူနိုင်ခဲ့ကာ ပေးဂိုး တစ်ဂိုးသာခွင့်ပြုခဲ့ရသည်။၎င်းတို့သည် ဝက်ဟမ်းအသင်းအား အိမ်ကွင်း၌ ၄ ဂိုး-ဂိုးမရှိဖြစ်လည်းကောင်း ၊ ဆွမ်ဆီးအသင်းအား ၂ ဂိုး- ၁ ဂိုးဖြစ်လည်ကောင်း ၊ ဘုန်းမောက်အသင်းအား ၂ဂိုး-ဂိုးမရှိ ဖြစ်လည်းကောင်းအသီးသီး အနိုင်ရခဲ့သည်။

ယခုဆွတ်ခူးရရှိခဲ့သော အကောင်းဆုံးဆုသည် ပြီးခဲ့သော နွေရာသီက ပရီးမီးယားလိဂ်သို့ရောက်ရှိလာခဲ့သော ဂွာဒီယိုလာအတွက် ပထမဆုံး ဆွတ်ခူးရရှိသည့် ဆုတစ်ဆုဖြစ်သည်။ ၂ဝ၁၅ ခုနှစ် သြဂုတ်လက မန်ချက်စတာစီးတီးအသင်းနည်းပြ Manuel Pellegrini ရာထူးမှ နှုတ်ထွက်သွားခဲ့ပြီးနောက် ဂွာဒီယိုလာသည် မန်းစီးတီးအသင်းသို့ရောက်ရှိလာခဲ့ခြင်းဖြစ်သည်။

အသက် ၄၆ နှစ်အရွယ်ရှိ နည်းပြဂွာဒီယိုလာအား ဖေဖော်ဝါရီလအတွက်အကောင်းဆုံးပရီးမီးယားလိဂ်နည်းပြအဖြစ် အားကစားပရိသတ်များ နှင့် ဝါရင့်ကလောင်ရှင်များက စုပေါင်း မဲပေးရွေးချယ်ခဲ့ကြခြင်းဖြစ်သည်။ ၎င်းသည် အကောင်းဆုံးဆုအတွက် ဆန်ကာတင် လေးဦးစာရင်းမှ မန်ချက်စတာယူနိုက်တက်နည်းပြ မော်ရင်ညို ၊ ဝက်ဘရွန်းနည်းပြ တိုနီပူးလစ် ၊ ချဲလ်ဆီးနည်းပြ အန်တိုနီယိုကွန်တီ တို့အားအသီးသီးကျော်ဖြတ်ကာ အရွေးချယ်ခံခဲ့ရခြင်းဖြစ်သည်။(Xinhua)