နိုင်ငံခြားဘာသာစကားများအားဆက်တိုက်ဘာသာပြန်နိုင်သည့် ဘာသာပြန်နားကြပ်ငယ်

ပေကျင်း၊ ဧပြီ ၂၂ ရက် (ဆင်ဟွာ)

တရုတ်နိုင်ငံသားစွန့်ဦးတီထွင်သူ Leal Tian က The Hitchhiker’s Guide to the Galaxy ကို ဖတ်ရှုပြီး‌နောက် စွဲလမ်းခဲ့သည်။ ထိုသို့စွဲလမ်းပြီးနောက် WT2 Translator Earbuds ဟုအမည်ရသည့် နိုင်ငံခြားဘာသာစကားများအားဆက်တိုက်ဘာသာပြန်နိုင်သည့် ဘာသာပြန်နားကြပ်ငယ် တစ်မျိုးကို တီထွင်ခဲ့သည်။

ဘာသာစကားမတူညီသော အသုံးပြုမည့်သူနှစ်ဦးသည် နားကြပ်အားတစ်ခုစီတပ်ထားရုံဖြင့် မိတ်ဆွေရင်းများသဖွယ် စကားပြောဆိုနိုင်မည်။လက်တလောတွင် နားကြပ်အတွင်းဘာသာစကားပေါင်း ၄၀ ကျော်ထည့်သွင်းထားပြီး လေယူလေသိမ်းပေါင်း ၉၀ ကျော်ရှိသည်။

Leal Tian က ” ဘာသာပြန်ခြင်းရဲ့အဓိက ရည်ရွယ်ချက်ကတော့ လူအချင်းချင်းဆက်သွယ်ဖို့ နဲ့ သတင်းအချက်အလက်တွေရရှိဖို့ပဲဆိုတာကျွန်တော်တို့ယုံကြည်ပါတယ်။အခြားဘာသာပြန်ကိရိယာတွေနဲ့မတူညီတာတွေကတော့ ကျွန်တော်တို့ ထုတ်လုပ်ထားတဲ့ ထုတ်ကုန်က ပိုပြီးတော့ သဘာဝကျကျအသုံးပြုနိုင်တာပါပဲ။

ကျွန်တော်တို့ ဟာ တစ်ကမ္ဘာလုံးက သုံးစွဲသူတွေအတွက် ထုတ်ကုန်တွေဝန်ဆောင်မှုတွေပေးသွားမှာပါ။ iFlytek, Huawei,Google, Microsoft စတဲ့ ကုမ္ပဏီတွေသာမက ဂျပန်နိုင်ငံ၊ဂျာမဏီနိုင်ငံနှင့်အခြားနိုင်ငံများမှ ကုမ္ပဏီများနှင့် လက်တွဲဆောင်ရွက်နေပါတယ်။ကျွန်တော်တို့က တစ်ကမ္ဘာလုံးမှာ အကောင်းဆုံးဝန်ဆောင်မှုတွေပေးစွမ်းနိုင်ဖို့ရည်မှန်းထားပါတယ်။

ကျွန်‌တော်တို့ရဲ့အဓိက ရည်မှန်းချက်တွေထဲက တစ်ခုကတော့ ဆက်သွယ်ပြောဆိုမှုတွေ ထိထိရောက်ရောက်လုပ်နိုင်ဖို့ပါပဲ။ကျွန်တော်တို့ရဲ့ နောက်မျိုးဆက်ဘာသာပြန် နားကြပ်တွေဟာ ပြောကြားသူ က အမြန်ပြောတာပဲဖြစ်ဖြစ် နောက်ဆုံး ရန်ဖြစ်နေတဲ့အချိန်တောင် ဘာသာစကားအမျိုးမျိုးကို တမဟုတ်ချင်း အပြန်အလှန်နားလည် နိုင်စေမှာဖြစ်ပါတယ်။နောက်ထပ် သုံးစွဲသူများစွာရဲ့ စကားပြောတွေနဲ့ အွန်လိုင်းမှတစ်ဆင့်ဆက်သွယ်ပြောဆိုမှုတွေကိုပါ ဘာသာပြန်ဆိုမှုတွေထပ်မံဆောင်ရွက်ပေးသွားနိုင်ဖို့ကြိုးစားနေပါတယ်။” ဟုဆိုသည်။ (Xinhua)