ပြည်တွင်း၊ပြည်ပ ရင်းနှီးမြှုပ်နှံမှုလုပ်ငန်းများအား ဧပြီ ၂၀ ရက်မှ စတင်ကာ မူလဝန်ဆောင်စရိတ်နှုန်းထား၏ ၅၀ ရာခိုင်နှုန်း လျှော့ချပေးမည်ဟု ထုတ်ပြန် 

ရန်ကုန်၊ ဧပြီ ၉ ရက် (ဆင်ဟွာ) 

မြန်မာနိုင်ငံ ရင်းနှီးမြှုပ်နှံမှု ကော်မရှင် သည်  ကမ္ဘာ့နိုင်ငံအများစုတွင် COVID-19 ကူးစက် ပြန့်ပွားနေမှုကြောင့် မြန်မာနိုင်ငံ သို့ဝင်ရောက်လာမည့် နိုင်ငံခြားတိုက်ရိုက်ရင်းနှီးမြှုပ်နှံမှုများ နှင့် ပြည်တွင်းရင်းနှီးမြှုပ်နှံမှုလုပ်ငန်း များအား ဧပြီလ ၂၀ ရက်မှ စ၍ မူလဝန်ဆောင်စရိတ်နှုန်းထား ၏ ၅၀ ရာခိုင်နှုန်းလျှော့ချ၍ လျှောက်ထားလွှာ နှင့် ဝန်ဆောင်စားရိတ်နှုန်းထားများအား ပြင်ဆင်သတ်မှတ်လိုက်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် က ဧပြီ ၉ ရက် တွင် ထုတ်ပြန်သည်။

အတည်ပြုမိန့်၊ ခွင့်ပြုမိန့် ရရှိထားသည့် ရင်းနှီးမြှုပ်နှံမှုလုပ်ငန်းများအနေဖြင့်  ထုတ်လုပ်မှုကုန်ကျစရိတ် နှင့် အသုံးစားရိတ်များလျော့ကျပြီး လုပ်ငန်းများ ပိုမိုအဆင်ပြေစွာဆောင်ရွက်နိုင်ရန် ယခုကဲ့သို့  လျှော့ချပေးခြင်း ဖြစ်ကြောင်း ထုတ်ပြန်ချက်တွင်ပါရှိသသည်။

၎င်းပြင်ဆင်သတ်မှတ်ချက်များသည် COVID-19 ရောဂါဖြစ်ပွားနေမှု နှင့် စပ်လျဉ်းသည့် နိုင်ငံတော် ၏ ကြေညာချက်များ အရ သက်ရောက်မှုရှိသည့် ကာလအထိသာ အကျုံးဝင်မည်ဖြစ်ပြီး  အဆိုပါ ကာလ ကုန်ဆုံးပါက လျှောက်ထားလွှာ နှင့် ဝန်ဆောင်စရိတ်နှုန်းထားများ အား ပြန်လည်ပြင်ဆင်သတ်မှတ် ကြေညာသွားမည်ဖြစ်ကြောင်း ထုတ်ပြန်ချက်ထဲတွင်ပါရှိသည်။

လျှော့ချ၍ ပြင်ဆင်ကောက်ခံမည့် နှုန်းထားအသေးစိတ်အား DICA ၏ Facebook တွင် ဝင်ရောက်ကြည့်ရှုနိုင်ကြောင်း သိရသည်။  (Xinhua)