အပြည်ပြည်ဆိုင်ရာ ခရီးသည်တင်လေယာဉ်များ ပြေးဆွဲခွင့် ရပ်ဆိုင်းခြင်းကာလ အား ဇွန်လ ၁၅ ရက် အထိ ထပ်မံတိုးမြှင့် 

ရန်ကုန်၊ မေ ၂၉ ရက် (ဆင်ဟွာ)

ရန်ကုန်အပြည်ပြည်ဆိုင်ရာလေဆိပ်တွင် အပြည်ပြည်ဆိုင်ရာ ခရီးသည်တင်လေယာဉ်များ ပြေးဆွဲခွင့်ရပ်ဆိုင်းခြင်းကာလကို  ဇွန်လ ၁၅ ရက် ၂၃:၅၉နာရီအထိ ထပ်မံတိုးမြှင့်လိုက်ကြောင်း ရန်ကုန်အပြည်ပြည်ဆိုင်ရာလေဆိပ်မှ မေ၂၉ ရက်တွင် သတင်းထုတ်ပြန်သည်။

မြန်မာနိုင်ငံ လေကြောင်းပို့ဆောင်ရေးညွှန်ကြားမှုဦးစီးဌာန၏ ထုတ်ပြန်ချက်အရ ရန်ကုန်အပြည်ပြည်ဆိုင်ရာလေဆိပ်၌ အပြည်ပြည်ဆိုင်ရာခရီးသည်တင်လေယာဉ်များ ပျံသန်းပြေးဆွဲခွင့်ရပ်ဆိုင်းခြင်းကာလ ကို ထပ်မံတိုးမြှင့် ခြင်းဖြစ်ကြောင်း၊ ပြည်တွင်းလေကြောင်းလိုင်းခရီးစဉ်များပြေးဆွဲမှုများကိုမူ ပုံမှန် ဝန်ဆောင်မှုပေးလျက်ရှိကြောင်း၊ ခရီးသည်များအနေဖြင့် COVID – 19 ကူးစက်ပျံ့နှံ့မှုကို တားဆီးကာကွယ်နိုင်ရန် လေဆိပ်အတွင်း ချမှတ်ထားသော ကျန်းမာရေးဆိုင်ရာ သတိပေးချက်များကို လိုက်နာဆောင်ရွက်ကြရန် သတင်းထုတ်ပြန်ချက်တွင်ပါရှိသည်။

ပြည်တွင်းလေကြောင်းခရီးစဉ်များကို https://bit.ly/2XdMZrn တွင် ဝင်ရောက်ကြည့်ရှုနိုင်ကြောင်း၊ခရီးသည်များအနေဖြင့် မိမိတို့ လေကြောင်းခရီးစဉ် စီစဉ် ၊ ပြောင်းလဲမှုများအတွက် သက်ဆိုင်ရာလေကြောင်းလိုင်းများ၊ ခရီးသွား အေဂျင်စီများကို ဆက်သွယ်မေးမြန်းရန်လည်း အကြံပြုထားသည်။ 

Four Stars Family Travel Agent မှ  တာဝန်ရှိသူတစ်ဦးက “ပြည်တွင်းလေကြောင်းလိုင်းတွေ ကတော့ ရက်ခြားပြေးတဲ့ schedule တွေ ကိုတွေ့ရတယ်။ ပြည်ပခရီးစဉ်တွေကတော့ နိုင်ငံတကာလေကြောင်းလိုင်းတွေလည်း ပိတ်ထားသေးတော့ ပြည်ပလေယာဉ်လက်မှတ်ဝယ်ထားသူတွေက တစ်ချို့ က ပိုက်ဆံပြန်အမ်းငွေယူတာတွေရှိတယ်။  တချို့ ကတော့ ရက်ပြန်ပြောင်းသွားကြတယ်။’’ ဟုဆင်ဟွာကိုမေ ၂၉ ရက်တွင်ပြောသည်။

COVID-19 ရောဂါ ပိုးကူးစက်ပျံ့နှံ့မှုကို ဆက်လက်ထိန်းချုပ်ဆောင်ရွက်ရန် လိုအပ်သည့်အတွက် ပြည်ထောင်စုအဆင့်အဖွဲ့အစည်းများ၊ ပြည်ထောင်စုဝန်ကြီးဌာနများမှ မေ ၃၁ ရက်အထိ ထုတ်ပြန်ထားသော ပြည်သူသို့ပန်ကြားချက် အမိန့်၊ အမိန့်ကြော်ငြာစာ၊ ညွှန်ကြားချက်များ(ဖြေလျှော့ပေးသည့် ကိစ္စရပ်များမပါ) အား ဇွန်လ ၁၅ ရက်အထိ ရက်တိုးမြှင့်ဆောင်ရွက်ထားကြောင်းအသိပေးကြေညာချက်အား COVID-19 ကာကွယ်၊ထိန်းချုပ်၊ကုသရေး အမျိုးသားအဆင့်ကော်မတီ မှ အသိပေးကြေညာချက် ကို မေ ၂၈ ရက်တွင် ထုတ်ပြန်ခဲ့သည်။  (Xinhua)