COVID-19 ကပ်ရောဂါဆိုးကြီးကို အဆုံးသတ်ရန် တစ်ကမ္ဘာလုံးပူးပေါင်းဆောင်ရွက်မှုအရေးတကြီးလိုအပ်လျှက်ရှိ

နယူးယောက်၊ ဇူလိုင် ၁၀ ရက် (ဆင်ဟွာ)

COVID-19 ကပ်ရောဂါ ကူးစက်ပျံ့ပွားခဲ့သည်မှာ နှစ်ဝက်နီးပါးခန့်ရှိလာပြီဖြစ်သည်။ လက်ရှိတွင် တစ်ကမ္ဘာလုံး၌ COVID-19 ကူးစက်ခံရသူဦးရေပေါင်း ၁၂ သန်းကျော် ရှိလာခဲ့ပြီဖြစ်ကြောင်း ဂျွန်ဟော့ကင်း တက္ကသိုလ် ၏ ထုတ်ပြန်ခဲ့သည့် အချက်အလက်များအရသိရသည်။

အမေရိကန်ပြည်ထောင်စုမှာ COVID-19 ကူးစက်ခံရသူဦးရေပေါင်း ၃သန်းကျော်အထိ ရှိလာခဲ့ပြီးနောက် ကပ်ရောဂါဖြစ်ပွားမှု အများဆုံးဗဟိုချက်နိုင်ငံတစ်နိုင်ငံဖြစ်လာခဲ့သည်။ အမေရိကန်ပြည်ထောင်စုပြီးနောက် ကူးစက်ခံရမှုအများဆုံးနိုင်ငံမှာ ဘရာဇီးနိုင်ငံဖြစ်ပြီး ကူးစက်ခံရမှုလူဦးရေမှာ အမေရိကန်ပြည်ထောင်စုတွင် ကူးစက်ခံရမှု၏ ထက်ဝက်ခန့်ရှိလာသည်။ နိုင်ငံအများစုမှာ ဖြေလျှော့မှုများနှင့် စီးပွားရေးဆိုင်ရာကိစ္စရပ်များကို ပြန်လည် ဖွင့်လှစ်စတင်ရန် ဆိုင်းငံ့ထားလျှက်ရှိသည်။

ဥရောပသမဂ္ဂ စီးပွားရေး ကော်မရှင်နာ ပေါ်လို ဂျန်တီလီယွန်နီက “ နိုင်ငံတွေမှာ ကျဆင်းမှုတွေ အရှိန်ပြန်ရလာမှုတွေ အမျိုးမျိုးရှိနေပါတယ် ဒါတွေဟာ အသွားအလာ ကန့်သတ်မှုတွေနဲ့ ထိန်းချုပ်မှုတွေကို အချိန်ကိုက်လုပ်ဆောင်နိုင်မှုနှင့် တင်းတင်းကြပ်ကြပ်ဆောင်ရွက်နိုင်မှု အနေအထားတွေနဲ့ ဆက်စပ်နေပါတယ်၊ ဒါ့အပြင် မတူညီတဲ့ စီးပွားရေးတည်ဆောက်မှုပုံစံတွေနဲ့လည်းဆက်နွယ်မှုရှိနေပါတယ် ။

ဥပမာ ခရီးသွားကဏ္ဍများနှင့် ဝန်ဆောင်မှုကဏ္ဍများကဲ့သို့ လူအချင်းချင်းဆက်ဆံရတဲ့ စီးပွားရေးလုပ်ငန်းတွေမှာ ထိခိုက်မှုပိုများတာပေါ့” ဟုဆိုသည်။ ကျွမ်းကျင်သူများနှင့် တာဝန်ရှိသူများက အချင်းချင်းညှိနှိုင်း၍  သိပ္ပံနည်းကျဖြင့် ကမ္ဘာလုံးဆိုင်ရာပူးပေါင်းဆောင်ရွက်မှုများကိုလုပ်ဆောင်ကာ ကပ်ရောဂါ ကို အဆုံးသတ်ရန် တိုက်တွန်းထားပါသည်။ ကမ္ဘာ ကျန်းမာရေးအဖွဲ့ချုပ် အရေးပေါ်ကျန်းမာရေးအစီအစဉ်ဆိုင်ရာ ညွှန်ကြားရေးမှူး မိုက်ကယ် ရိုင်ယန်က “ အဲဒီဗိုင်းရပ်စ်က လူသားမျိုးနွယ်တွေဆီ ဘယ်လို နည်းနဲ့ ဝင်ရောက်ခဲ့တယ် ဆိုတဲ့ လမ်းကြောင်းနဲ့ နောက်ခံအကြောင်းတရားတို့ကို နားလည်ခြင်းက အင်မတန်မှ အရေးကြီးလှပါတယ်” ဟု ဆိုသည်။ 

ကုလသမဂ္ဂဆိုင်ရာတရုတ်နိုင်ငံ အမြဲတမ်းကိုယ်စားလှယ် ကျန်းဂျွန်က “ ပြည်သူများရဲ့ကျန်းမာရေးဟာ ကျန်းမာရေးစနစ် အားနည်းတဲ့ နိုင်ငံတွေဖြစ်တဲ့ တောင်ဆူဒန်၊ မာလီနှင့် ကွန်ဂိုဒီမိုကရက်တစ် သမ္မတနိုင်ငံတွေမှာလိုနိုင်ငံမျိုးတွေမှာ ပြင်းပြင်းထန်ထန်ခြိမ်းခြောက်ခံနေရတဲ့ အနေအထားမှာရှိနေပါတယ်
ငြိမ်းချမ်းရေးထိန်းသိမ်းမှုလုပ်ငန်းတွေကလည်း အစိုးရတွေကို လုပ်ဆောင်နိုင်စွမ်းပိုမိုအားကောင်းစေရန် ကူညီပံ့ပိုးပေးခြင်း၊ သက်ဆိုင်ရာအစိုးရနှင့်ပြည်သူများ ကပ်ရောဂါ တိုက်ဖျက်ရေးတွင် ကူညီခြင်း၊ ပြည်သူဗဟိုပြုဆောင်ရွက်ခြင်းနှင့်  ပြည်သူတွေရဲ့ အခွင့်အရေးတွေဖြစ်တဲ့ ကျန်းမာရေးနှင့် ဘဝ အာမခံချက်ရရှိစေဖို့ဆောင်ရွက်ပေးရပါမယ်။” ဟုဆိုသည်။

ကုလသမဂ္ဂ အထွေထွေ အတွင်းရေးမှူးချုပ် အန်တိုနီယို ဂူတားရက်စ်က “ အချို့နိုင်ငံတွေဟာ ကျန်းမာရေးဆိုင်ရာအရေးပေါ်အခြေအနေမှာ အဆိုးဆုံးအခြေအနေတွေကိုရင်ဆိုင်နေကြရပါပြီ၊  အချို့ကတော့ စီးပွားရေး ပြန်လည်ဦးမော့လာဖို့ ရုန်းကန်နေကြရပြီးတော့ တိုးတက်မှုတွေ ပြန်လည် ဆုတ်ယုတ်သွားနိုင်တဲ့ခြိမ်းခြောက်မှုတွေနဲ့ ရင်ဆိုင်နေကြရပါတယ်၊ ဒါပေမဲ့ ရှင်းရှင်းလင်းလင်းပြောရရင်တော့ ဒါဟာ ကျန်းမာရေးနှင့် အလုပ်အကိုင်၊ စီးပွားရေးအကြားရွေးချယ်စရာမဟုတ်ပါဘူး၊ သူတို့ဟာ အချင်းချင်းချိတ်ဆက်နေကြတာပါ၊ ဒါကြောင့် အောင်မြင်ရင်လည်း ထိုအရာအားလုံးအောင်မြင်သွားမှာဖြစ်သလို ကျရှုံးရင်လည်း ထိုအရာအားလုံးကျရှုံးမှာပါ” ဟုဆိုသည်။   (Xinhua)