အီရတ်နိုင်ငံ ဘဂ္ဂဒက်မြို့ရှိ ရှီးအိုက်ဗလီကျောင်းတွင် ဗုံးခွဲတိုက်ခိုက်မှုကြောင့် လူ ၃ ဦးသေဆုံး

ဘဂ္ဂဒက်၊ ဇွန် ၂၂ ရက် (ဆင်ဟွာ)

အီရတ်နိုင်ငံ ဘဂ္ဂဒက်မြို့အရှေ့ဘက်ရှိ ရှီးအိုက်ဗလီတစ်ခုတွင် ဇွန်လ ၂၁ ရက်က ဗုံးခွဲတိုက်ခိုက်မှုဖြစ်ပွားခဲ့ရာ အနည်းဆုံး လူ ၃ ဦး သေဆုံးပြီး အခြားလူ ၁၅ ဦးကျော် ဒဏ်ရာရရှိခဲ့ကြောင်း ပြည်ထဲရေးဝန်ကြီးဌာနက ပြောကြားလိုက်ပြီး အသေခံဗုံးခွဲမှုဟု အစောပိုင်းသတင်းများကိုမူ ငြင်းဆိုလိုက်ကြောင်း သိရသည်။

အဆိုပါ ပေါက်ကွဲမှုမှာ Baladiyat ရပ်ကွက်ရှိ Imam Mahdi ဗလီတွင် အပတ်စဉ်သောကြာနေ့ဝတ်ပြုသူများ ပြန်လည်ထွက်ခွာချိန်၌ ဂိတ်ပေါက်တွင် ဝှက်ထားသည့်ဗုံးပေါက်ကွဲသွားခဲ့ခြင်းဖြစ်ကြောင်း အခင်းဖြစ်ပွားရာနေရာရှိ အမည်မဖော်လိုသူ သတင်းရင်းမြစ်တစ်ဦးက ဆင်ဟွာသို့ ပြောခဲ့သည်။

ဗလီ၌ဖြစ်ပွားသည့် ဗုံးပေါက်ကွဲမှုမှာ ပေါက်ကွဲစေသောကိရိယာကြောင့် ဖြစ်ပွားရခြင်းဖြစ်ကြောင်း ကျွမ်းကျင်သူများက အတည်ပြုပြီးနောက် အသေခံဗုံးခွဲမှုဖြစ်သည်ဟူသော ကနဦးသတင်းများအား ဝန်ကြီးဌာန သတင်းရင်းမြစ်က ငြင်းဆိုလိုက်သည်။

အစောပိုင်းသတင်းများက Baladiyat ရပ်ကွက်ရှိ ဗလီတွင် ရှီးအိုက်ဝတ်ပြုသူများအကြား အသေခံဗုံးခွဲသမားက ပေါက်ကွဲစေသောပစ္စည်းပါခါးပတ်အား ဖောက်ခွဲခဲ့ပြီး လူ ၃ ဦးသေဆုံးပြီး အခြားလူ ၁၅ ဦး ဒဏ်ရာရရှိခဲ့ကြောင်း ဖော်ပြခဲ့သည်။

အဆိုပါ တိုက်ခိုက်မှုနှင့်ပတ်သက်၍ မည်သည့်အဖွဲ့ကမျှပြောကြားထားခြင်းမရှိသေးသော်လည်း နိုင်ငံတစ်ဝန်းရှိ လုံခြုံရေးတပ်ဖွဲ့ဝင်များနှင့် ဈေးများ၊ ကော်ဖီဆိုင်များနှင့် ဗလီများအပါအဝင် လူအများစုဝေးရာနေရာများအား ပစ်မှတ်ထားသော တိုက်ခိုက်မှုများတွင် အိုင်အက်စ်အဖွဲ့က လုပ်ဆောင်ခဲ့ကြသည်။ (Xinhua)