နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က တရုတ်ပြည်သူ့သမ္မတနိုင်ငံ နိုင်ငံတော်ကောင်စီဝင် ပြည်သူ့လုံခြုံရေးဝန်ကြီးဌာန ဝန်ကြီး ကျောက်ခဲ့ကျစ်အား လက်ခံတွေ့ဆုံ

နေပြည်တော်၊ မေလ ၁၀ ရက်

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က တရုတ်ပြည်သူ့သမ္မတနိုင်ငံ နိုင်ငံတော်ကောင်စီဝင် ပြည်သူ့လုံခြုံရေးဝန်ကြီးဌာန ဝန်ကြီး ကျောက်ခဲ့ကျစ် အား မေလ ၉ ရက်နေ့က နေပြည်တော်၌ လက်ခံတွေ့ဆုံခဲ့ကြောင်း သိရှိရသည်။

ပြည်သူ့လုံခြုံရေးဝန်ကြီးဌာနဝန်ကြီး ကျောက်ခဲ့ကျစ် က တရုတ်နိုင်ငံအနေဖြင့် မြန်မာနိုင်ငံ၏နိုင်ငံတော်လုံခြုံရေးနှင့် တည်ငြိမ်ရေးအတွက် ဆောင်ရွက်မှုများကို ခိုင်မြဲစွာထောက်ခံမည်ဖြစ်ကြောင်း တရုတ်နိုင်ငံသည် မြန်မာနိုင်ငံနှင့်အတူ နှစ်နိုင်ငံခေါင်းဆောင်များ၏သဘောတူညီချက်များကို အကောင်အထည်ဖော်ဆောင်ရွက်သွားမည်ဖြစ်ရာ ခေတ်သစ်ပိုးလမ်းမကြီး တည်ဆောက်ရေး ပူးပေါင်းဆောင်ရွက်မှုများကို မြှင့်တင်ဆောင်ရွက်သွားမည်ဖြစ်သလို တရားဥပဒေစိုးမိုးရေး နှင့် လုံခြုံရေးဆိုင်ရာ ပူးပေါင်းဆောင်ရွက်မှုများကိုလည်း ဆက်လက်မြှင့်တင်ဆောင်ရွက်သွားမည်ဖြစ် ကြောင်း၊ နှစ်နိုင်ငံလုံခြုံရေးနှင့်ဖွံ့ဖြိုးတိုးတက်ရေးအတွက် အတူလက်တွဲကာကွယ်စောင့်ရှောက်သွားမည်ဖြစ်ပြီး တရုတ်-မြန်မာဘက်စုံ မဟာဗျူဟာမြောက်မိတ်ဖက်ဆက်ဆံရေးအတွက် အကျိုးအသစ်များ ဆောင်ရွက်သွားမည်ဖြစ် ကြောင်း ပြောကြားခဲ့သည်။

ဒေါ်အောင်ဆန်းစုကြည်ကလည်း တရုတ်နိုင်ငံသမ္မတ ရှီကျင့်ဖိန်နှင့် တရုတ်နိုင်ငံအစိုးရက တရုတ်-မြန်မာ ဆက်ဆံရေး အထူးဂရုပြုအလေးထားသည့်အတွက် ကျေးဇူးတင်ရှိကြောင်း၊ မြန်မာနိုင်ငံ၏ ငြိမ်းချမ်းရေးလုပ်ငန်းစဉ်များနှင့် လူမှုစီးပွားဖွံ့ဖြိုးတိုးတက်ရေးအတွက် ကူညီထောက်ပံ့ပေးသည့် အတွက်လည်း ကျေးဇူးတင်ရှိကြောင်း ပြောကြားခဲ့သည်။

ဆက်လက်၍ တရုတ်-မြန်မာဆက်ဆံရေး ဖွံ့ဖြိုးတိုးတက်စေရန် တရုတ်-မြန်မာစီးပွားရေးစြင်္ကန်တည်ဆောက်မှု စသည့် ပူးပေါင်းဆောင်ရွက် ဆိုင်ရာကဏ္ဍအသီးသီးကို တစ်ဆင့်မြှင့်တင်ဆောင်ရွက်သွားလိုကြောင်း နှင့် နှစ်နိုင်ငံ တရားဥပဒေ စိုးမိုးရေးနှင့်လုံခြုံရေးဆိုင်ရာ ပူးပေါင်းဆောင်ရွက်မှုများကို တိုးမြှင့်ဆောင်ရွက်သွားလိုကြောင်း ပြောကြားခဲ့သည်။ အဆိုပါတွေ့ဆုံပွဲကို မြန်မာနိုင်ငံဆိုင်ရာ တရုတ်သံအမတ်ကြီး ဟုန်လျန်၊ တရုတ်ပြည်သူ့လုံခြုံရေးဝန်ကြီးဌာန ဒုတိယဝန်ကြီး လီဝေ၊ ယူနန်ပြည်နယ် ဒုတိယပြည်နယ်မှူး၊ပြည်သူ့လုံခြုံရေးဌာန ဌာနမှူး ရန်ကျွင့်ဟောက် တို့ ပါဝင်တက်ရောက်ခဲ့ကြောင်း သိရှိရသည်။(Xinhua)