Videos
၂၀၁၄ ခုနှစ်အတွက် အမျိုးသား စာပေဆုပေးပွဲ အခမ်းအနားကျင်းပ
ရန်ကုန်၊ ဒီဇင်ဘာ ၁၂ ရက် (ဆင်ဟွာ)
အနာဂတ် ကာလတွင် မြန်မာနိုင်ငံ၌ စာပေ အရည်အသွေး မြင့်မားပြီး ပြည်သူများ အသိပညာ ဗဟုသုတ ရရှိစေမည့် စာအုပ်စာပေ အမြောက်အမြား ရေးသား ထုတ်ဝေနိုင်ရန် လိုအပ်ကြောင်း ဒုတိယ သမ္မတ ဒေါက်တာ စိုင်းမောက်ခမ်းက ယနေ့ ပြောကြားသည်။
နိုင်ငံတော် ဒုတိယ သမ္မတ ဒေါက်တာ စိုင်းမောက်ခမ်းက ယနေ့ ကျင်းပသည့် ၂၀၁၄ ခုနှစ်အတွက် အမျိုးသား စာပေဆုပေးပွဲ အခမ်းအနားတွင် စာပေပညာရှင် တစ်ဦး၊ တစ်ဖွဲ့က စပြီး အများပြည်သူ ကောင်းကျိုးပြု စာအုပ်များ၊ ပညာပေး စာအုပ်များ၊ အတွေးအခေါ် စာအုပ်များနှင့် ပေါ်ပင် မဟုတ်သော ဂန္တဝင် စာပေများ ထွက်ပေါ်လာရေးကို အလေးအနက် တိုက်တွန်း လိုကြောင်း ပြောကြားသည်။
၂၀၁၄ ခုနှစ်အတွက် အမျိုးသားစာပေ တစ်သက်တာဆု၊ အမျိုးသား စာပေဆုနှင့် စာပေ ဗိမာန်စာမူ ဆုပေးပွဲ အခမ်းအနားကို ယနေ့ အမျိုးသားဇာတ်ရုံ၌ ကျင်းပခဲ့သည်။
အဆိုပါ စာပေဆုပေးပွဲ အခမ်းအနားတွင် အမျိုးသားစာပေ တစ်သက်တာဆု ၃ ဆုကို ဦးဝင်းဖေ (မြဇင်)၊ ဦးခင်မောင်စိုး( မောင်ပေါ်ထွန်း) နှင့် ဦးကိုလေး( ကိုလေး-အင်းဝ ဂုဏ်ရည်) တို့ ရရှိခဲ့ပြီး ၂၀၁၄ ခုနှစ်အတွက် အမျိုးသား စာပေဆု ၁၅ ဆုနှင့် စာပေ ဗိမာန်ဆု ၂၆ ဆု ပေးအပ်ခဲ့သည်။ (Xinhua)