တရုတ်-အမေရိကန် မဟာဗျူဟာမြောက် ဆက်ဆံရေး ဆွေးနွေးပွဲအသစ် ပေကျင်းမြို့၌ ကျင်းပကာ ပွင့်လင်းထိရောက်၍ အပြုသဘောဆောင်သည့် ဆွေးနွေးမှုများ ပြုလုပ်

ပေကျင်း၊ ဩဂုတ် ၂၉ ရက် (ဆင်ဟွာ)

တရုတ်ကွန်မြူနစ်ပါတီ (CPC) ဗဟိုကော်မတီ နိုင်ငံရေးဗျူရိုအဖွဲ့ဝင်၊ ဗဟိုနိုင်ငံခြားရေးရာကော်မရှင်ရုံး အကြီးအကဲ ဝမ်ရိနှင့် အမေရိကန်နိုင်ငံ အမျိုးသားလုံခြုံရေးအကြံပေး ဂျိတ်ဆူလီဗန်တို့သည် ဩဂုတ် ၂၇ ရက်မှ ၂၈ ရက်အထိ ပေကျင်းမြို့၌ မဟာဗျူဟာမြောက် ဆက်ဆံရေး ဆွေးနွေးပွဲအသစ် ကျင်းပခဲ့ကာ ပွင့်လင်းထိရောက်၍ အပြုသဘောဆောင်သည့် ဆွေးနွေးမှုများ ပြုလုပ်ခဲ့ကြောင်း သိရသည်။
တရုတ်-အမေရိကန် ဆက်ဆံရေးသည် အနိမ့်အမြင့်၊ အတက်အကျများနှင့် ကြုံတွေ့ခဲ့ကြောင်း၊ ထိုအတွေ့အကြုံများနှင့် သင်ခန်းစာများအား ပြန်လည်သုံးသပ်ခြင်းသည် ပိုမိုကောင်းမွန်သော အနာဂတ်ကို ပုံဖော်ကာ အင်အားကြီးနှစ်နိုင်ငံ အပြန်အလှန် သင့်မြတ်ရေးအတွက် မှန်ကန်သော နည်းလမ်းကို ရှာဖွေရာတွင် အထောက်အကူဖြစ်စေမည်ဖြစ်ကြောင်း ဝမ်က ပြောကြားခဲ့သည်။

ပထမဦးစွာ တရုတ်-အမေရိကန် ဆက်ဆံရေးကို မှန်ကန်သော လမ်းကြောင်းပေါ်၌ ထိန်းသိမ်းရာတွင် နှစ်နိုင်ငံဆက်ဆံရေးကို နှစ်နိုင်ငံ သမ္မတနှစ်ဦးက ပဲ့ကိုင်လမ်းညွှန်ရန် အလွန်အရေးကြီးသည်။ နှစ်ဖက်စလုံးအနေဖြင့် အပြန်အလှန်လေးစားမှု၊ ငြိမ်းချမ်းစွာ အတူယှဉ်တွဲနေထိုင်မှု၊ နှစ်ဦးနှစ်ဖက် အကျိုးရှိစေသော ပူးပေါင်းဆောင်ရွက်မှုတို့ကို ထိန်းသိမ်းကာ နှစ်နိုင်ငံ ခေါင်းဆောင်နှစ်ဦးအကြား ရရှိခဲ့သည့် ဘုံသဘောတူညီမှုများကို လက်တွေ့အကောင်အထည်ဖော်လျက် တရုတ်-အမေရိကန် ဆက်ဆံရေး၏ တည်ငြိမ်ခိုင်မာသော စဉ်ဆက်မပြတ် တိုးတက်ဖြစ်ထွန်းမှုများကို အထောက်အကူပေးရမည်ဖြစ်သည်။
ဒုတိယအနေဖြင့် ပူးတွဲထုတ်ပြန်ကြေညာချက် သုံးရပ်အား စောင့်ထိန်းလိုက်နာခြင်းသည် ပဋိပက္ခနှင့် ထိပ်တိုက်တွေ့မှုများကို ရှောင်လွှဲရန် တရုတ်နိုင်ငံနှင့် အမေရိကန်နိုင်ငံတို့အတွက် အဓိကကျလျက်ရှိသည်။ နှစ်နိုင်ငံအကြား သံတမန်ဆက်ဆံရေး ထူထောင်မှုကို ဦးတည်စေခဲ့သော နိုင်ငံရေး အခြေခံအုတ်မြစ်ကို ထိန်းသိမ်းရမည်ဖြစ်သည်။ တရုတ်နိုင်ငံ၏ အချုပ်အခြာအာဏာနှင့် နယ်မြေပိုင်နက်ပြည့်စုံမှု၊ နိုင်ငံရေးစနစ်နှင့် ဖွံ့ဖြိုးတိုးတက်မှုလမ်းကြောင်းနှင့် တရုတ်ပြည်သူများ၏ ဖွံ့ဖြိုးတိုးတက်မှုဆိုင်ရာ တရားဝင် အခွင့်အရေးများကိုလည်း လေးစားရမည်ဖြစ်သည်။
တတိယအနေဖြင့် တစ်နိုင်ငံနှင့် တစ်နိုင်ငံ တန်းတူညီမျှ ဆက်ဆံခြင်းသည် တရုတ်-အမေရိကန် အပြန်အလှန် ဆက်ဆံမှုများ ချောမွေ့စေရေးအတွက် ပဓာနကျကာ အထက်စီးဆန်စွာ ပြုမူဆက်ဆံခြင်းသည် နှစ်နိုင်ငံအကြား အပြန်အလှန် ဆက်ဆံမှုအတွက် မှန်ကန်သောနည်းလမ်း မဟုတ်ပေ။

စတုတ္ထအနေဖြင့် လူထုသဘောထား၏ အခြေခံအုတ်မြစ်များကို ခိုင်မာအောင် လုပ်ဆောင်ခြင်းသည် တရုတ်-အမေရိကန် ဆက်ဆံရေး တည်ငြိမ်စွာဖြင့် ရေရှည်တိုးတက်ကောင်းမွန်အောင် ဖော်ဆောင်ရာတွင် အခရာကျပြီး နှစ်နိုင်ငံအနေဖြင့် အတားအဆီးများကို ဖန်တီးခြင်းထက် ပေါင်းကူးဆက်ဆံမှုများကို ပိုမိုတည်ဆောက်ကာ ပြည်သူအချင်းချင်း အပြန်အလှန် ထိတွေ့ဆက်ဆံမှုများကို ပိုမိုလမ်းဖွင့်ပေးရမည်ဖြစ်သည်။
ပဉ္စမအနေဖြင့် မှန်ကန်သော သိမြင်နားလည်မှုများ တည်ဆောက်ခြင်းသည် ငြိမ်းချမ်းစွာ အတူယှဉ်တွဲနေထိုင်နိုင်ရန် တရုတ်နှင့် အမေရိကန်တို့အတွက် အခရာကျကာ တရုတ်ပြည်သူများ၏ လူမှုဘဝ ပိုမိုတိုးတက်ကောင်းမွန်စေရန်သာမက ကမ္ဘာကြီး၏ ငြိမ်းချမ်းမှုနှင့် တိုးတက်ဖြစ်ထွန်းမှုအတွက် ပိုမိုကျယ်ပြန့်စွာ အထောက်အကူပြုရန်လည်း တရုတ်နိုင်ငံက စိတ်ပိုင်းဖြတ်ထားသည်။
အကြိမ် ၂၀ မြောက် တရုတ်ကွန်မြူနစ်ပါတီ ဗဟိုကော်မတီ၏ တတိယအကြိမ် မျက်နှာစုံညီ အစည်းအဝေးနှင့် စပ်လျဉ်း၍ ဆူလီဗန်အား ရှင်းလင်းပြောကြားရာတွင် ထိုအစည်းအဝေးသည် တရုတ်နိုင်ငံ၏ ပြုပြင်ပြောင်းလဲမှုနှင့် တံခါးဖွင့်ဝါဒအတွက် သမိုင်းမှတ်တိုင်သစ်တစ်ခုဖြစ်ကာ တရုတ်နိုင်ငံအကြောင်း ပြင်ပကမ္ဘာက သိရှိနားလည်လာစေရန် ပြတင်းတံခါးအသစ် ဖြစ်သကဲ့သို့ နိုင်ငံအားလုံး၏ ဘုံဖွံ့ဖြိုးတိုးတက်မှုအတွက် အခွင့်အလမ်းသစ်များကိုလည်း ဆောင်ကြဉ်းပေးလျက်ရှိကြောင်း ဝမ်က ပြောကြားခဲ့သည်။
ထိုင်ဝမ်ဒေသအား တရုတ်နိုင်ငံက ပိုင်ဆိုင်ကြောင်း၊ တရုတ်နိုင်ငံ ပြန်လည်ပေါင်းစည်းမည်ဖြစ်ကြောင်း ဝမ်က အလေးအနက်ပြောကြားခဲ့ကာ ထိုင်ဝမ်သီးခြားရပ်တည်ရေးသည် ထိုင်ဝမ်ရေလက်ကြားတစ်လျှောက် ငြိမ်းချမ်းမှုနှင့် တည်ငြိမ်မှုအတွက် အကြီးမားဆုံးအန္တရာယ်ကို ဖြစ်စေကြောင်းလည်း ဝမ်က ထည့်သွင်းပြောကြားခဲ့သည်။ အမေရိကန်နိုင်ငံအနေဖြင့် ထိုင်ဝမ်သီးခြားရပ်တည်ရေးကို အားပေးအားမြှောက်မလုပ်ဟူသော ကတိကဝတ်အတိုင်း လုပ်ဆောင်ကာ တရုတ်တစ်နိုင်ငံတည်း မူဝါဒနှင့် တရုတ်-အမေရိကန် ပူးတွဲထုတ်ပြန်ချက် သုံးရပ်တို့အား စောင့်ထိန်းပြီး ထိုင်ဝမ်အား စစ်လက်နက်များ တပ်ဆင်ပေးခြင်းကို ရပ်တန့်လျက် တရုတ်နိုင်ငံ ပြန်လည်ပေါင်းစည်းရေးကို အထောက်အကူပြုသင့်ကြောင်း ဝမ်ရိက အလေးအနက်ပြောကြားခဲ့သည်။
အမေရိကန်အနေဖြင့် စီးပွားရေး၊ ကုန်သွယ်ရေးနှင့် သိပ္ပံနှင့်နည်းပညာ နယ်ပယ်တို့တွင် တရုတ်အား ဖိနှိပ်ထိန်းချုပ်နေခြင်းကို ရပ်တန့်ရန်၊ တရုတ်နိုင်ငံ၏ တရားဝင် အကျိုးစီးပွားများကို ထိခိုက်အောင်လုပ်ဆောင်ခြင်းအား ရှောင်ရှားရန်လည်း ဝမ်က တိုက်တွန်းခဲ့သည်။
ဆူလီဗန်က အမေရိကန်နိုင်ငံနှင့် တရုတ်နိုင်ငံအကြား ကွဲလွဲမှုများနှင့် အားပြိုင်မှုများရှိနေကြောင်း၊ နှစ်ဖက် ပူးပေါင်းဆောင်ရွက်ရမည့် နယ်ပယ်အများအပြားရှိနေကြောင်း ပြောကြားခဲ့သည်။

ဆက်လက်၍ နှစ်နိုင်ငံ သာတူညီမျှ ဆက်ဆံသင့်ပြီး ယှဉ်ပြိုင်မှုသည် သင့်တင့်မျှတမှု ရှိရမည်ကို အမေရိကန်နိုင်ငံက သဘောတူလက်ခံပါကြောင်း၊ အမေရိကန်အနေဖြင့် တရုတ်နိုင်ငံအား ပြင်ပကမ္ဘာနှင့် အဆက်အသွယ်ဖြတ်ထားရန် ရည်ရွယ်ချက်မရှိကြောင်း ၎င်းက အလေးအနက်ပြောကြားခဲ့သည်။ အမေရိကန်နိုင်ငံက တရုတ်တစ်နိုင်ငံတည်း မူဝါဒကို စောင့်ထိန်းလျက်ရှိကာ “ထိုင်ဝမ်သီးခြားရပ်တည်ရေး” “တရုတ်နှစ်နိုင်ငံ” သို့မဟုတ် “one China, one Taiwan” တို့ကို ထောက်ခံခြင်းမရှိကြောင်းလည်း ဆူလီဗန်က ထည့်သွင်းပြောကြားခဲ့သည်။
ယူကရိန်း၊ အရှေ့အလယ်ပိုင်းနှင့် ကိုရီးယားကျွန်းဆွယ် အရေးကိစ္စများနှင့် စပ်လျဉ်း၍လည်း နှစ်ဖက် အမြင်ချင်းဖလှယ် ဆွေးနွေးခဲ့ကြောင်း သိရသည်။ တရုတ်နိုင်ငံက ယူကရိန်း အကျပ်အတည်းအား နိုင်ငံရေးနည်းလမ်းဖြင့် ဖြေရှင်းရေးကို တွန်းအားပေးလုပ်ဆောင်ကာ ငြိမ်းချမ်းရေးဆွေးနွေးမှုများကို ထောက်ခံအားပေးရန် အစဉ်သဖြင့် စိတ်ပိုင်းဖြတ်ထားကြောင်း ဝမ်ရိက ထပ်လောင်းပြောကြားခဲ့ပြီး တရုတ်နိုင်ငံအနေဖြင့် လုပ်သင့်လုပ်ထိုက်သည်ကို ဆက်လုပ်ဆောင်သွားမည်ဖြစ်ကြောင်းလည်း ၎င်းက ပြောကြားခဲ့သည်။
ဝမ်နှင့် ဆူလီဗန်တို့သည် မကြာမီကာလအတွင်း နှစ်နိုင်ငံ ခေါင်းဆောင်နှစ်ဦးအကြား အပြန်အလှန် ထိတွေ့ဆက်ဆံမှုအသစ်များ လုပ်ဆောင်မည့် ကိစ္စရပ်အတွက်လည်း ထည့်သွင်းဆွေးနွေးခဲ့ကြောင်း သိရသည်။ (Xinhua)
……………………..
(English Version)
China-U.S. strategic communication held in Beijing, seeing candid, substantive, constructive discussions
BEIJING, Aug. 28 (Xinhua) — Wang Yi, director of the Office of the Central Commission for Foreign Affairs, held the latest round of China-U.S. strategic communication with U.S. National Security Advisor Jake Sullivan in Beijing from Tuesday to Wednesday, conducting candid, substantive and constructive discussions.
Wang, also a member of the Political Bureau of the Communist Party of China (CPC) Central Committee, said that China-U.S. relations have experienced ups and downs, and that reviewing this experience and its lessons will help forge a better future and find the right way for the two major countries to get along with each other.
First, in order to keep China-U.S. relations on the right direction, it is crucial that the two countries’ presidents steer and guide bilateral relations. The two sides should uphold the principles of mutual respect, peaceful coexistence and win-win cooperation, implement the consensus reached by the two heads of state, and promote the stable, healthy and sustainable development of China-U.S. relations.
Second, abiding by the three joint communiques is key for China and the United States to avoid conflict and confrontation. The political foundation that led to the establishment of diplomatic ties between the two countries must be maintained. China’s sovereignty and territorial integrity, its political system and development path, and the legitimate development rights of the Chinese people must be respected.
Third, treating each other as equals is key to ensuring China-U.S. interactions are smooth. Acting from the position of strength is not the right way of interaction between countries.
Fourth, cementing the foundations of public opinion is key to pursuing the steady, sustained development of China-U.S. relations. The two countries should build more bridges and pave more roads for people-to-people exchange, rather than raising obstacles.
Fifth, establishing correct perception is key for China and the United States to achieve peaceful coexistence. China is committed to ensuring better lives for its people at home, and to making greater contributions to world peace and development abroad.
Briefing Sullivan on the third plenary session of the 20th CPC Central Committee, Wang said that the meeting marks a new milestone in China’s reform and opening-up, providing a new window for the outside world to understand China and new opportunities for the common development of all countries.
Wang stressed that Taiwan belongs to China and that China will be reunified. He noted that “Taiwan independence” poses the biggest risk to peace and stability across the Taiwan Strait. The United States should act on its commitment of not supporting “Taiwan independence,” adhere to the one-China principle and the three China-U.S. joint communiques, cease arming Taiwan, and support the peaceful reunification of China, he said.
Wang urged the United States to end its suppression of China in the economic, trade and sci-tech fields, and refrain from undermining China’s legitimate interests.
Sullivan said that differences and competition exist between the United States and China, and that there are also many areas in which the two sides need to cooperate.
He noted that the United States agrees that the two countries should treat each other as equals and that competition should be healthy and fair, and said the U.S. side has no intention of decoupling from China. He said that the United States adheres to the one-China policy and does not support “Taiwan independence,” “two Chinas” or “one China, one Taiwan.”
The two sides also exchanged views on issues concerning Ukraine, the Middle East and the Korean Peninsula. Reiterating that China is always committed to promoting peace talks and pushing for a political solution to the Ukraine crisis, Wang said China will continue to do the right thing.
Wang and Sullivan also discussed a new round of interactions between the two countries’ heads of state to take place in the near future. Enditem
English Caption
BEIJING, Aug. 27, 2024 (Xinhua) — Wang Yi, a member of the Political Bureau of the Communist Party of China Central Committee and director of the Office of the Central Commission for Foreign Affairs, holds a new round of China-U.S. strategic communication with U.S. National Security Advisor Jake Sullivan in Beijing, capital of China, Aug. 27, 2024. (Xinhua/Ding Lin)