Politics, Law & Military
ရန်ကုန်တိုင်းဒေသကြီး တရားလွှတ်တော် တရားသူကြီးချုပ် ဦးလှအေး လွှတ်တော်တွင် ကတိသစ္စာပြု လက်မှတ် ရေးထိုး
ရန်ကုန်၊ ဒီဇင်ဘာ ၁၇ ရက် (ဆင်ဟွာ)
လစ်လပ်နေသည့် ရန်ကုန်တိုင်းဒေသကြီး တရားလွှတ်တော် တရားသူကြီးချုပ်နေရာတွင် အစားထိုး ခန့်အပ်ခံရသည့် ဦးလှအေးသည် ယနေ့နံနက်(၁၀)နာရီတွင် ပြုလုပ်သော ဒုတိယအကြိမ်၊ ရန်ကုန်တိုင်းဒေသကြီးလွှတ်တော် အရေးပေါ်အစည်းအဝေး (၁/၂၀၁၈) တတိယနေ့၌ ကတိသစ္စာပြုကာ လက်မှတ်ရေးထိုးခဲ့ကြောင်း သိရသည်။
နေပြည်တော်တရားရုံးချုပ်၊ စီမံဌာန၏ ညွှန်ကြားရေးမှူးဟောင်း ဦးလှအေးအား ရန်ကုန်တိုင်းဒေသကြီး တရားလွှတ်တော် တရားသူကြီးချုပ်အဖြစ် ခန့်အပ်ရန်အတွက် ဒီဇင်ဘာ (၁၁)ရက်က ကျင်းပသည့် အရေးပေါ်အစည်းအဝေး (၁/၂၀၀၈) ပထမနေ့၌ ရန်ကုန်တိုင်းဒေသကြီး လွှတ်တော်ဥက္ကဋ္ဌဦးတင်မောင်ထွန်းက လွှတ်တော်သို့ အမည်စာရင်းတင်သွင်းခဲ့ပြီး ဒီဇင်ဘာ (၁၂)ရက်က ကျင်းပသည့် အရေးပေါ်အစည်းအဝေး (၁/၂၀၀၈) ဒုတိယနေ့တွင် ကန့်ကွက်မည့် လွှတ်တော်ကိုယ်စားလှယ်များ မရှိသဖြင့် အတည်ပြုခဲ့ခြင်း ဖြစ်သည်။
တရားသူကြီးချုပ် ဦးလှအေးသည် မြို့နယ်တရားရေးဦးစီးမှူးအဖြစ် (၁)ကြိမ်၊ မြို့နယ်တရားသူကြီး အဖြစ် (၃)ကြိမ်၊ ဒုတိယခရိုင်တရားသူကြီးအဖြစ် (၃)ကြိမ်၊ ခရိုင်တရားသူကြီးအဖြစ် (၁)ကြိမ်၊ တွဲဖက်တိုင်းတရားသူကြီးအဖြစ် (၁)ကြိမ်နှင့် နေပြည်တော်တရားရုံးချုပ်၊ စီမံဌာနတွင် ညွှန်ကြားရေးမှူးအဖြစ် အသီးသီးတာဝန်ထမ်းဆောင်ခဲ့ကြောင်း သိရသည်။ (Xinhua)