Social
မြစိမ်းရောင်စီမံကိန်း ကျေးရွာ ပေါင်း ၁၁,၆၄၃ ရွာတွင် ချေးငွေအပေါ် အတိုးနှုန်း ၅၀ရာခိုင်နှုန်းနှင့် အထက် လျှော့ချပေးမည်
ရန်ကုန်၊ ဧပြီ ၂၅ ရက် (ဆင်ဟွာ)
မြန်မာတစ်နိုင်ငံ လုံးတွင် ဆောင်ရွက်လျက်ရှိသည့် မြစိမ်းရောင်စီမံကိန်း ကျေးရွာ ပေါင်း ၁၁,၆၄၃ ရွာတွင် သတ်မှတ် အတိုးနှုန်းကို ကျေးရွာလိုက် အတိုးနှုန်းပေါ်မူတည်ပြီး ၅၀ ရာခိုင်နှုန်း နှင့် အထက် လျှော့ချပေးမည်ဖြစ်ကြောင်း စိုက်ပျိုးရေး၊ မွေးမြူရေး နှင့် ဆည်မြောင်းဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊လက်ထောက်အတွင်းဝန် ဒေါက်တာထွန်းလွင် က ဆင်ဟွာကို ဧပြီ ၂၅ ရက်တွင် ပြောသည်။
ဒေါက်တာထွန်းလွင်က “အရင်ကတော့ ရွာက ကော်မတီတွေ ရဲ့ ဆုံးဖြတ်ချက်အရ ငွေ ၁၀၀ ကျပ် ကို ၁ ကျပ် ခွဲ ထက် မပိုတဲ့ အတိုးနှုန်းနဲ့ ချေးရပါတယ်။ အခုကတော့ ငွေချေးထားသူတွေ အဆင်ပြေဖို့အတွက် အခုလို အတိုးနှုန်းလျှော့ချပေးတာပါ။ အတိုးနှုန်း ၁ ကျပ် ခွဲ ယူထားတဲ့ ကျေးရွာဆိုရင် ၅၀ရာခိုင်နှုန်းအထက်လျှော့သွားမယ်။ ၁ ကျပ်ပဲ ယူထားတဲ့ ကျေးရွာဆိုရင် ၅၀ ရာခိုင်နှုန်းလျှော့သွားမှာပါ ’’ ဟုပြောသည်။
ချေးငွေ ၁၀၀ ကျပ် အတွက် တစ်လ ၅၀ ပြားနှုန်း အထိ ၂၀၂၀ ပြည့်နှစ် ဧပြီလမှ စ၍ ၁ နှစ် တိတိလျှော့ချပေးမည်ဖြစ်ကြောင်း၊ အဆိုပါအတိုးနှုန်းလျှော့ချခြင်းကာလသည် ၂၀၂၁ခုနှစ် မတ်လ ကုန်အထိဖြစ်ကြောင်း သိရသည်။
အဆိုပါ မြစိမ်းရောင်စီမံကိန်းသည် ကျေးလက်ဒေသများတွင် နွမ်းပါးသူ များ အလုပ်လုပ်ကိုင်နိုင်ရန် ဆောင်ရွက်ခြင်းဖြစ်ကြောင်း၊ ကျေးလက်နေပြည်သူများ ၏ အသက်မွေးဝမ်းကျောင်းလုပ်ငန်းများ ဖွံ့ဖြိုးတိုးတက်စေရန် နှင့် မိသားစုဝင်ငွေ တိုးပွားစေရန် ရည်မှန်း ၍ ကျေးရွာပေါင်း ၁၁,၆၄၃ ရွာတွင် ကျေးရွာတစ်ရွာလျှင် အရင်းမပျောက်လည်ပတ်ရန်ပုံငွေအဖြစ် ငွေကျပ်သန်း ၃၀ မတည်ပေးပြီး၊ တိုးပွားလာသောငွေများအား ကျေးရွာရန်ပုံငွေ အဖြစ်ထားရှိ၍ ကျေးရွာပြည်သူများထံ ပြန်လည်ထုတ်ချေးခြင်း နှင့် ကျေးရွာဖွံ့ဖြိုးရေးလုပ်ငန်းများ အားဆောင်ရွက်လျက်ရှိကြောင်း၊ နှစ်အလိုက်ကျေးရွာများ ကိုထပ်တိုးဆောင်ရွက်သွားမည်ဖြစ်ကြောင်း သိရသည်။ (Xinhua)
