Australia / Oceania
နယူးဇီလန်တွင် ယာဉ်တိုက်မှုကြောင့် လူ ၆ ဦး သေဆုံး
ဝဲလ်လင်တန် ၊ ဇွန် ၂၇ ရက်(ဆင်ဟွာ)
နယူးဇီလန် မြောက်ဘက်ကျွန်း South Taranaki ခရိုင်waverleyအနီးတွင် ဇွန် ၂၇ ရက်က ယာဉ် တိုက်မှုဖြစ်ပွားခဲ့ရာ လူ ၆ ဦး သေဆုံးပြီး ၂ ဦး ဒဏ်ရာအပြင်းအထန် ရရှိခဲ့ကြောင်း နယူးဇီလန် လုံခြုံရေးရဲတပ်ဖွဲ့က ပြောကြားခဲ့သည်။
ယာဉ်တိုက်မှုက ဒေသစံတော်ချိန် နံနက် ၁၁ နာရီခန့်က ဖြစ်ပွားခဲ့ခြင်းဖြစ်ပြီး၊ ယာဉ်နှစ်စီး လမ်း အကွေ့နေရာတွင် မျက်နှာချင်းဆိုင်တိုက်မိခဲ့ခြင်းဖြစ်ကြောင်း အခင်းဖြစ်ပွားသောနေရာရှိ ရဲအရာရှိ တစ်ဦး က ပြောခဲ့သည်။ အဆိုပါမော်တော်ယာဉ်နှစ်စီးပေါ်တွင် လူ ၄ ဦးစီ လိုက်ပါ စီးနင်းလာခြင်းဖြစ်ကြောင်း၊ ယာဉ်တစ်စီးပေါ်တွင်လိုက်ပါလာသည့် လူ ၄ ဦးစလုံးသေဆုံးခဲ့ပြီး ကျန်တစ်စီးပေါ်ရှိလူ ၂ ဦးသေဆုံးပြီး ၂ ဦး ဒဏ်ရာအပြင်းအထန်ရရှိခဲ့ကြောင်း သိရသည်။
ဆီးနှင်းများနှင့်လမ်းချောနေသောကြောင့် လမ်းချော်ပြီးယခုကဲ့သို့ ယာဉ်တိုက်မှုဖြစ်ပွားရခြင်းဖြစ် ကြောင်း မျက်မြင်သက်သေတစ်ဦးက ဆိုသည်။ ရဲတပ်ဖွဲ့က အထူးသတိထားမောင်းနှင်ရန်သတိပေး ကြေညာချက်ထုတ်ပြန်ပြီးဖြစ်ကြောင်း သိရသည်။
အီကွေတာတောင်ဘက်အခြမ်းရှိသော နယူးဇီလန်တွင် ဆောင်းရာသီဝင်ပြီဖြစ်ပြီး ယခုရက်ပိုင်းများ တွင် နှင်းမိုးများအဆက်မပြတ်ရွာသွန်းလျက်ရှိရာ ရာသီဥတုအခြေအနေ ဆိုးဝါးကြောင်း သိရသည်။ တောင်ဘက်ကျွန်းနေရာဒေသအတော်များများတွင် ဆီးနှင်းများဖုံးလွှမ်းနေသောကြောင့် လမ်းများ ပိတ်ထားရ ကြောင်း သိရသည်။ (Xinhua)