မြောက်ကိုရီးယား ၊ တောင်ကိုရီးယား ၊ အမေရိကန် တို့၏ တရားဝင်မဟုတ်သော သုံးနိုင်ငံဆွေးနွေးပွဲ ဖင်လန်နိုင်ငံ၌ စတင်ဆွေးနွေး

ဟဲလ်ဆန်ကီး ၊ မတ် ၂၀ ရက်(ဆင်ဟွာ)

မြောက်ကိုရီးယားနိုင်ငံ ၊ တောင်ကိုရီးယားနိုင်ငံ နှင့် အမေရိကန်နိုင်ငံတို့မှ ကိုယ်စားလှယ်များ၏ တရားဝင်မဟုတ်သော ဆွေးနွေးပွဲကို မတ်လ ၁၉ ရက်(ဖင်လန်နိုင်ငံဒေသစံတော်ချိန်) ၌ စတင်ခဲ့ကြောင်း ဒေသတွင်း မီဒီယာက သတင်းဖော်ပြခဲ့သည်။

အဆိုပါ သုံးနိုင်ငံမှ ကိုယ်စားလှယ်များပါဝင်သော ပူးတွဲ ညစာစားပွဲကို ဖင်လန်နိုင်ငံ ဟဲလ်ဆန်ကီးမြို့လယ်ရှိ စားသောက်ဆိုင်တစ်ခုတွင် မတ်လ ၁၉ ရက်တွင် ပြုလုပ်ခဲ့ကြောင်း နှင့် နောက်ထပ်ဆွေးနွေးမှုများကို ၂ ရက်ကြာ ဆက်လက်လုပ်ဆောင်သွားရန် ရှိကြောင်း ဖင်လန်နိုင်ငံအမျိုးသားအသံလွှင့်ဌာန Yle ၏ ဖော်ပြချက်အရ သိရသည်။

ဒေသဆိုင်ရာရုပ်သံက မြောက်ကိုရီးယားကိုယ်စားလှယ်များ စားသောက်ဆိုင်အတွင်းသို့ဝင်ရောက်သွားပုံကို ထုတ်လွှင့်ပြသခဲ့ကြောင်း၊ အမေရိကန်နှင့်ပြုလုပ်မည့် ဆက်ဆံရေးများအတွက် တာဝန်ရှိသူတစ်ဦးအဖြစ် မြောက်ကိုရီးယားနိုင်ငံ နိုင်ငံခြားရေးဝန်ကြီးဌာနမှ Choe Kang Il က ၎င်းကိုယ်စားလှယ်အဖွဲ့တွင် ပါဝင်ကြောင်း သိရသည်။

အမေရိကန်နိုင်ငံ နှင့် တောင်ကိုရီးယားနိုင်ငံများမှ ကိုယ်စားလှယ်အဖွဲ့ဝင်များအဖြစ် သံတမန်ဟောင်းများ နှင့် လုံခြုံရေးကျွမ်းကျင်သူများ ပါဝင်ကြောင်း သိရသည်။

သက်ဆိုင်ရာ နိုင်ငံတစ်ခုချင်းစီမှ ကိုယ်စားလှယ်အဖွဲ့ဝင် ၆ ဦးစီဖြင့် စုစုပေါင်း ပါဝင်ဆွေးနွေးသူ ၁၈ ဦး ရှိကြောင်း Yle က ဆိုသည်။

မတ်လ ၂ဝ ရက် နှင့် ၂၁ ရက်များတွင် ဆွေးနွေးမည့် အရေးကိစ္စရပ်များတွင် ကိုရီးယားကျွန်းဆွယ်ပေါ်ရှိ နျူကလီးယားအရေး နှင့် တင်းမာမှုလျှော့ချရေးများလည်း ပါဝင်ကြောင်း Yle ကဆိုသည်။

မတ်လ ၂ဝ နှင့် ၂၁ ရက်များတွင် ပြုလုပ်မည့် ဆွေးနွေးပွဲနေရာကို ထုတ်ဖော်ပြောကြားထားခြင်းမရှိပေ။ ဟဲလ်ဆန်ကီးမြို့ရှိ ဂျပန်သံရုံးကမူ ဆွေးနွေးပွဲလက်ခံကျင်းပလိမ့်မည်မဟုတ်ကြောင်း အစောပိုင်းက ငြင်းဆို ပြောကြားထားသည်။(Xinhua)