မက္ကဆီကို အလယ်ပိုင်းတွင် ရဲတပ်ဖွဲ့ဝင် ၆ဦး ပစ်သတ်ခံရ

မက္ကဆီကို စီးတီး၊ ဇွန် ၂ ရက် (ဆင်ဟွာ)

မက္ကဆီကို နိုင်ငံ အလယ်ပိုင်း Guanajuato ပြည်နယ် ရှိ Salamanca မြို့ တွင် မေ ၁ရက် က ရဲတပ်ဖွဲ့ဝင် ၆ဦးအား လက်နက်ကိုင်များက ပစ်သတ်ခဲ့ကြောင်း ဒေသခံအာဏာပိုင်များကပြောကြားခဲ့သည်

Guanajuato ပြည်နယ် အစိုးရရှေ့နေချုပ်ရုံး က မြို့၏ အရှေ့တောင်ဘက်တွင် ရဲတပ်ဖွဲ့ဝင်များက တာဝန်အရ ကင်းလှည့်နေစဉ် သေနတ်သမားများက ကုန်တင်ကားတစ်စီးအတွင်းမှနေ၍ သေနတ်များဖြင့် ပစ်ခတ်ခဲ့ကြောင်း ဆင်ဟွာသို့ပြောကြားခဲ့သည်။

ရဲတပ်ဖွဲ့ဝင် ၅ဦးမှာ အခင်းဖြစ်ပွားရာ၌ပင် သေဆုံးသွားခဲ့ပြီး ကျန်တစ်ဦးမှာ ဒဏ်ရာပြင်းထန်သောကြောင့် ဆေးရုံ၌ သေဆုံးသွားခဲ့ကြောင်း အစိုးရ၏ ထုတ်ပြန်ချက်အရသိရသည်။

သေနတ်သမားများ နှင့် ၎င်းတို့မောင်းနှင်လာသော မော်တော်ယာဉ်အား ဖော်ထုတ်ရန် စုံစမ်းစစ်ဆေးမှုများပြုလုပ်နေကြောင်း သိရသည်။

ဒေသခံရဲအရာရှိတစ်ဦးဖြစ်သူ Guillermo Maldonado က အများပြည်သူ လုံခြုံရေးတာဝန် မဟုတ်ဘဲ လမ်းစည်းကမ်း ထိန်းသိမ်းရေးတာဝန်ထမ်းဆောင်နေသော ရဲတပ်ဖွဲ့ဝင်များသည် လက်နက်ကိုင်ဆောင်ထားခြင်းမရှိကြောင်း Correo သတင်းစာသို့ပြောကြားခဲ့သည်။

လွန်ခဲ့သည့် နှစ်ကစ၍ Guanajuato ပြည်နယ် တွင် အကြမ်းဖက်မှုများ အဆက်မပြတ်ဖြစ်ပွားလာပြီး ယင်းအကြမ်းဖက်မှုများသည် မူးယစ်ဆေးဝါးရောင်းဝယ်မှု နှင့် ပိုက်လိုင်းများမှ ခိုးယူထားသောလောင်စာဆီများ ရောင်းချမှုကို ထိန်းချုပ်ရန် ရာဇဝတ်ဂိုဏ်းများအချင်းချင်း တိုက်ခိုက်ရာမှ ဖြစ်ပွားခြင်းဖြစ်ကြောင်း ဒေသခံအစိုးရက ပြစ်တင်ခဲ့သည်။ (Xinhua)