Environment, Disasters & Accidents
ကော့သောင်း၌ ငါးဖမ်းစက်လှေတစ်စီး မီးလောင်နစ်မြုပ်
ရန်ကုန်၊ နိုဝင်ဘာ ၃ ရက် (ဆင်ဟွာ)
ကော့သောင်းခရိုင်၊ ဘုတ်ပြင်းမြို့နယ် ၊ လငန်းကျွန်းနှင့် ပုလဲကျွန်းအကြား ရေပြင်၁၁မိုင်ခန့်တွင် ငါးဖမ်းစက်လှေတစ်စီး မီးလောင်နစ်မြုပ်မှုဖြစ်ပွားခဲ့ကြောင်း ပြန်ကြားရေးဝန်ကြီးဌာန သတင်းထုတ်ပြန်ရေး အဖွဲ့မှ သတင်းထုတ်ပြန်သည်။
ယနေ့ နိုဝင်ဘာလ ၃ ရက်နေ့ နံနက် ၇နာရီက အဆိုပါ ငါးဖမ်းစက်လှေ၏ တာဘိုင်ပိုက်ထဲသို့ ဆီဝင်ပြီး စက်ခန်းအတွင်းမှ မီးလောင်မှုဖြစ်ပွားကာ စက်လှေနစ်မြုပ်မှု ဖြစ်ပွားခဲ့ကြောင်း သိရသည်။
ယင်း ငါးဖမ်း ဝါတန်း စက်လှေသည် မြိတ်မြို့မှ လှေဖြစ်ပြီးလှေအမည်သည် အောင်လှစိန် ဖြစ်ကြောင်း ၊ လှေဦးစီးဦးဇော်မိုး နှင့် ငါးဖမ်းလှေလုပ်သား (၂၄)ဦး ဖြင့် ငါးဖမ်းလုပ်ငန်း ခွင်သို့ ထွက်ခွာလာစဉ် လှေနစ်မြုပ်မှု အခင်းဖြစ်ပွားခဲ့ကြောင်း သိရသည်။
စက်လှေ မီးလောင်နစ်မြုပ်နေစဉ် အနီးအနားပင်လယ်ပြင် အတွင်း ငါးဖမ်းလျှက်ရှိသည့် အခြားငါးဖမ်းလှေများမှ ဝိုင်းဝန်းကူညီပေး ကြသဖြင့်နစ်မြုပ် ခဲ့သည့် ဝါတန်းလှေပေါ်ပါ ငါးဖမ်းလုပ်သားများ သေဆုံးမှုမရှိဘဲ ကယ်တင်နိုင်ခဲ့သည်။(Xinhua)