အိန္ဒိယ – မြန်မာ နှစ်နိုင်ငံ အစိုးရ အကြား ရခိုင်ပြည်နယ် ဖွံ့ဖြိုး တိုးတက်ရေး ဆိုင်ရာ နားလည်မှု စာချွန်လွှာ လက်မှတ် ရေးထိုး

ရန်ကုန် ၊ ဒီဇင်ဘာ ၂၁ ရက်(ဆင်ဟွာ)

အိန္ဒိယ- မြန်မာ နှစ်နိုင်ငံ အစိုးရအကြား ရခိုင်ပြည်နယ် ဖွံ့ဖြိုးတိုးတက်ရေးဆိုင်ရာ နားလည်မှု စာချွန်လွှာအား မြန်မာအစိုးရ ကိုယ်စား လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေး ဝန်ကြီးဌာန ဒုတိယဝန်ကြီး ဦးစိုးအောင်နှင့် အိန္ဒိယအစိုးရ ကိုယ်စား အိန္ဒိယနိုင်ငံ၊ Foreign Secretary,Dr. S. Jaishankar က ဒီဇင်ဘာ ၂၀ ရက်တွင် အတည်ပြု လက်မှတ် ရေးထိုးခဲ့ကြကြောင်း ပြန်ကြားရေး ဝန်ကြီးဌာန၏ ထုတ်ပြန်မှု အရ သိရသည်။

ထိုနှစ်နိုင်ငံ နားလည်မှု စာချွန်လွှာ လက်မှတ် ရေးထိုးခြင်း အားဖြင့် ရခိုင်ပြည်နယ်၏ အခြေခံ အဆောက်အဦနှင့် လူမှုစီးပွားဘဝ ဖွံ့ဖြိုးတိုးတက်မှု အတွက် အိန္ဒိယအစိုးရမှ မြန်မာအစိုးရအား ထောက်ပံ့ငွေအဖြစ် တစ်နှစ်လျှင် အမေရိကန် ဒေါ်လာ ၅ သန်းဖြင့် ၅ နှစ် အတွက် စုစုပေါင်း အမေရိကန်ဒေါ်လာ ၂၅ သန်း ထောက်ပံ့သွားမည် ဖြစ်ကြောင်း သိရသည်။

ဆောင်ရွက်မည့် စီမံကိန်းများအနေဖြင့် လူမှုစီးပွား ဖွံ့ဖြိုး တိုးတက်မှုနှင့် သက်ဆိုင်သော ပညာရေး၊ ကျန်းမာရေး ၊ စိုက်ပျိုးရေးနှင့် ဆက်စပ် လုပ်ငန်းများ၊ အခြေခံ အဆောက်အဦ ဖန်တီးပေးခြင်းများ၊ တံတားငယ်များ ဆောက်လုပ်ခြင်း ၊ လမ်းများ ပြုပြင်မွမ်းမံခြင်း၊ အသေးစား စွမ်းအင်စီမံကိန်းများ၊ အသက် မွေးဝမ်းကျောင်း ဆိုင်ရာ လုပ်ငန်းများ၊ လေ့ကျင့်ရေး စင်တာ တည်ထောင်ပေးခြင်းများ၊ ပတ်ဝန်းကျင်နှင့် ယဉ်ကျေးမှု ဆိုင်ရာ အမွေအနှစ် များအား ထိန်းသိမ်းခြင်းများ၊ အမျိုးသမီးများ စွမ်းဆောင်ရည် မြှင့်တင်ခြင်းနှင့် ကလေးသူငယ်များ ပြုစု စောင့်ရှောက်ခြင်း စသည့် လုပ်ငန်းများ ပါဝင်ကြောင်း သိရသည်။(Xinhua)