ပုသိမ်မြို့၏ အနောက်မြောက်ဘက် ကီလိုမီတာ ၁ဝဝ ခန့်အကွာရှိ အကဲဖြတ်တွင်း ရွှေရည်ထွန်း(၂) မှ သဘာဝ ဓာတ်ငွေ့ ထုတ်ယူနိုင်ကြောင်း စမ်းသပ် တွေ့ရှိ

ရန်ကုန် ၊ စက်တင်ဘာ ၂၄ ရက်(ဆင်ဟွာ)

ဧရာဝတီတိုင်းဒေသကြီး ၊ ပုသိမ်မြို့၏ အနောက်မြောက်ဘက် ကီလိုမီတာ ၁ဝဝ ခန့်အကွာရှိ ကမ်းလွန် လုပ်ကွက် အမှတ် A-6 တွင် အကဲဖြတ်တွင်း ရွှေရည်ထွန်း(၂) မှ သဘာဝဓာတ်ငွေ့ ထုတ်ယူနိုင်ကြောင်း စမ်းသပ် တွေ့ရှိခဲ့ရသည်ဟု ပြန်ကြားရေး ဝန်ကြီး ဌာန၏ သတင်း ထုတ်ပြန်မှု အရ သိရသည်။

ကမ်းလွန်လုပ်ကွက် အမှတ် A-6 တွင် အကဲဖြတ် တွင်းရွှေရည်ထွန်း(၂)အား ၂ဝ၁၈ ခုနှစ် ဇူလိုင် ၂ဝ ရက်တွင် စတင်တူးဖော်ခဲ့ပြီး သြဂုတ် ၂၉ ရက်တွင် ရည်မှန်းအနက် ၄၈၅ဝမီတာ (၁၅၉၁၂ပေ)အထိ တူးဖော်ခဲ့ရာ အနက် ၄၃၇၃ မီတာခန့်တွင် သဘာဝဓာတ်ငွေ့ခိုအောင်း နေသည့် အသားတင်ထုတ်ယူရရှိနိုင်မည့် သဲကြောအထူ ၄ဝ မီတာခန့်ကို စမ်းသပ်တွေ့ရှိခဲ့ကြောင်း သိရသည်။

မြန်မာ့ကမ်းလွန်လုပ်ကွက်အမှတ် A-6 တွင် MPRL E&P Pte Ltd. မှ ရင်းနှီးမြှုပ်နှံမှု (၂ဝ ရာခိုင်နှုန်း)၊ သြစတြေးလျ နိုင်ငံ Woodside Energy (Myanmar) Pte Ltd.မှ (၄ဝ ရာခိုင်နှုန်း)၊ ပြင်သစ်နိုင်ငံ Total E&P Myanmar Co.,Ltd.မှ (၄ဝ ရာခိုင်နှုန်း) အသီးသီးအချိုးကျ ပါဝင်ကာ ရှာဖွေတူးဖော်ခြင်းလုပ်ငန်းများကို အကျိုးတူပူးပေါင်းဆောင်ရွက်လျက်ရှိကြောင်း သိရသည်။

အကဲဖြတ်တွင်း ရွှေရည်ထွန်း-၂ ကိုလုပ်ကွက် A-6 ၏ ပဉ္စမမြောက်တွင်းအဖြစ် ဧရာဝတီတိုင်းဒေသကြီး ပုသိမ်မြို့၏ အနောက်မြောက်ဘက် ကီလိုမီတာ ၁ဝဝ ခန့်အကွာ ကမ်းလွန်ပင်လယ်ပြင်တွင် ရေအနက် ၂၃၂၅ မီတာနေရာ၌ တူးဖော်ခဲ့ခြင်းဖြစ်ပြီး ရှာဖွေရေးတွင်း၊ အကဲ ဖြတ်တွင်းများတူးဖော်ခြင်း၊ ရှာဖွေခြင်းဆိုင်ရာလုပ်ငန်းများ ကို စီးပွားဖြစ် ထုတ်လုပ်နိုင်သည့်အဆင့်သို့ ရောက်ရှိအောင် ဆက်လက်ဆောင်ရွက်သွားမည်ဖြစ်ကြောင်း သိရသည်။

ပုသိမ်မြို့၏ အနောက် မြောက်ဘက် ၁ဝ၂ ကီလိုမီတာခန့် အကွာ ကမ်းလွန်လုပ်ကွက် အမှတ် A-6 တွင် အကဲ ဖြတ်တွင်း ရွှေရည်ထွန်း(၂)ကို တူးဖော်နေသော တွင်းတူး စက် Dhirubhai Deep Water KG2 (DDKG2) သို့ လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးဝင်းခိုင်သည် စက်တင်ဘာ ၂၂ ရက်တွင် တာဝန်ရှိသူများ နှင့် အတူ တွင်းတူးဖော် စမ်းသပ်နေမှုကို ကြည့်ရှုစစ်ဆေးခဲ့ကြောင်း သိရသည်။(Xinhua)