Sport
ပထမအကြိမ် ဇွဲကပင်တောင်တက်ပြိုင်ပွဲသို့ လူဦးရေ ၁,၃၀၀ ဦးကျော် ဝင်ရောက် ယှဉ်ပြိုင်ရန် စာရင်းပေးသွင်းထား
ရန်ကုန် ၊ ဒီဇင်ဘာ ၃၁ ရက်(ဆင်ဟွာ)
ကရင်ပြည်နယ် အစိုးရအဖွဲ့မှကြီးမှူး၍ ပထမအကြိမ် ဇွဲကပင်တောင်တက်ပြိုင်ပွဲကို ၂၀၂၀ ခုနှစ်၊ ဇန်နဝါရီလ ၁ ရက်နေ့ နံနက်ပိုင်းတွင် ဇွဲကပင်အရှေ့ခြမ်း တောင်ခြေသစ်ချရွာမှ စတင်ကျင်းပသွားမည်ဖြစ်ပြီး ပြိုင်ပွဲဝင် လူဦးရေ ၁,၃၄၈ ဦး ဝင်ရောက် ယှဉ်ပြိုင်မည်ရန် စာရင်းပေးသွင်းထားကြောင်း ပြည်နယ် အစိုးရအဖွဲ့ထံမှ သိရသည်။
ဇွဲကပင် တောင်တက်ပြိုင်ပွဲကို အသက်(၄၀) နှစ်အထက် အမျိုးသား၊ အမျိုးသမီးပြိုင်ပွဲ၊ အသက်(၄၀)နှစ်အောက် အမျိုးသား၊ အမျိုးသမီးပြိုင်ပွဲဟူ၍ ပြိုင်ပွဲအမျိုးအစား ၄ မျိုးခွဲ၍ ကျင်းပ သွားမည်ဖြစ်ပြီး ဇွဲကပင်အရှေ့ခြမ်း၊ တောင်ခြေနှင့် ၄ ဖာလုံ အကွာ ခလောက်နို့၊ သစ်ချရွာတွင် စတင်တာလွှတ်မည်ဖြစ်ပြီး ဇွဲကပင်အနောက်ခြမ်း ဒုံရင်း၊ တော်ပုံကျေးရွာ လုံမ္ပနီဥယာဉ် ဈေးဆိုင်ခန်းရှေ့တွင် ပန်းဝင်မည်ဖြစ်ကာ ပြိုင်ပွဲအမျိုးအစား အတန်းအလိုက် ပထမဆုမှ ဒသမဆုထိဆုများကို ထိုက်တန်စွာ ချီးမြှင့်ပေးသွားမည် ဖြစ်ကြောင်း သိရသည်။
ကရင်ပြည်နယ် ၊ ဇွဲကပင်တောင်သည် အမြင့်ပေ ၂,၃၇၂ ရှိပြီး မြင့်မား၍ မက်စောက်သော သဘာဝ ထုံးကျောက် တောင် ဖြစ်ရာ ပြိုင်ပွဲဝင်များ ဘေးအန္တရာယ် ကင်းရှင်းစွာဖြင့် အဆင်ပြေချောမွေ့စွာ ယှဉ်ပြိုင်နိုင်ရေး အတွက် ကရင်ပြည်နယ် အစိုးရအဖွဲ့ရုံး၌ ဒီဇင်ဘာ ၃၀ ရက်တွင် ဇွဲကပင် တောင်တက်ပြိုင်ပွဲ ကျင်းပရေးဆိုင်ရာ လုပ်ငန်းညှိနှိုင်းအစည်းအဝေးအား ပြုလုပ်ခဲ့ကြောင်း သိရသည်။(Xinhua)
