Africa & Middle East
ယူဂန္ဓာရှိ စီးပွားရေးသုံးယာဉ်အားလုံး တွင် ဒီဂျစ်တယ်အရှိန်နှုန်း ကန့်သတ်စက်များတပ်ဆင်မည်
ကန်ပါလာ၊ မေ ၃၀ ရက် (ဆင်ဟွာ)
ယူဂန္ဓာနိုင်ငံ အစိုးရ သည် နိုင်ငံအတွင်း ယာဉ်မတော်တဆမှုများကို လျှော့ချရန်ရည်ရွယ်သည် လှုပ်ရှားမှုတစ်ခုအဖြစ် စီးပွားရေးလုပ်ငန်းသုံး မော်တော်ယာဉ်အားလုံးတွင် ဒီဂျစ်တယ်အရှိန်နှုန်း ကန့်သတ်စက်များတပ်ဆင်ရန် မေ ၂၉ ရက်က ညွှန်ကြားခဲ့ကြောင်း သိရသည်။
သတင်းအချက်အလက် ဝန်ကြီး Frank Tumwebaze က စီးပွားရေးလုပ်ငန်းသုံးမော်တော်ယာဉ်များ၏ ကားမောင်းသူများသည်လည်း စွမ်းဆောင်ရည်မြှင့်သင်တန်းများကို တက်ရောက်ရန်လိုအပ်ကြောင်း ထုတ်ပြန်ချက်၌ပြောကြားခဲ့သည်။
၎င်းက အလုပ်အကိုင်နှင့် သယ်ယူပို့ဆောင်ရေး ဝန်ကြီးဌာန သည် လမ်းအန္တရာယ်ကင်းရှင်းရေးနှင့် ပတ်သက်၍ အသိပေးသွားမည်ဖြစ်ကြောင်း ပြောကြားခဲ့သည်။
ယူဂန္ဓာနိုင်ငံ အနောက်အလယ်ပိုင်း တွင် လွန်ခဲ့သည့် ရက်သတ္တပတ် က ယာဉ်မတော်တဆမှုကြောင့် လူ ၂၂ဦးသေဆုံးပြီး အခြားလူ ၁၉ ဦး ဒဏ်ရာရရှိခဲ့ပြီးနောက် ယင်းကြေညာချက်ထွက်ပေါ်လာခြင်းဖြစ်သည်။
ယူဂန္ဓာနိုင်ငံ တွင် နှစ်စဉ် ယာဉ်တိုက်မှုပေါင်း အနည်းဆုံး ၂၀,၀၀၀ဖြစ်ပွားပြီး လူ ၂,၀၀၀ကျော် သေဆုံးလျက်ရှိပြီး ကမ္ဘာပေါ်တွင် ယာဉ်မတော်တဆမှုကြောင့် လူအသေအပျောက်အများဆုံးနိုင်ငံများအနက် တစ်ခုအပါအဝင်ဖြစ်ကြောင်း ရဲမှတ်တမ်းများအရ သိရသည်။ (Xinhua)