ဆိုမာလီယာ၌ ကျန်းမာရေးစောင့်ရှောက်မှုအတွက် ဒေါ်လာ ၁ဝ သန်း လိုအပ်နေကြောင်း WHO ပြော

မိုဂါဒစ်ရှူး၊ဖေဖော်ဝါရီ ၂၈ ရက်(ဆင်ဟွာ)

ဆိုမာလီယာနိုင်ငံရှိ ပြည်သူ ၁.၅ သန်းက လတ်တလောကြုံတွေ့နေရသော မိုးခေါင်ရေရှားမှု အခြေအနေ နှင့် စားနပ်ရိက္ခာအခက်အခဲများကြောင့် ကျန်းမာရေးဆိုးဝါးနေမှုများကို ဖြေရှင်းပေးနိုင်ရန် ရံပုံငွေ အမေရိကန်ဒေါ်လာ ၁ဝ သန်း လိုအပ်လျက်ရှိကြောင်း ကမ္ဘာ့ကျန်းမာရေးအဖွဲ့ချုပ်(WHO) က ဖေဖော်ဝါရီလ ၂၇ ရက်တွင် ပြောကြားလိုက်သည်။

၎င်းရန်ပုံငွေသည် ရောဂါဘယဖြစ်ပွားနေသည့် ဒေသများတွင် ကျန်းမာရေးဝန်ဆောင်မှုပေးရန် ကုလသမဂ္ဂ အေဂျင်စီအနေဖြင့် ၂၀၁၇ ခုနှစ် ပထမ ခြောက်လအတွက် အသုံးပြုသွားရန်အတွက် ကုလသမဂ္ဂမှတောင်းခံထားခြင်း ဖြစ်ကြောင်း WHO အဖွဲ့ကဆိုသည်။

“ ဆိုမာလီယာနိုင်ငံမှာ အခုလက်ရှိ မိုးခေါင်ရေရှားမှု ၊ ပတ်ဝန်းကျင်အနံ့အသက်ဆိုးဝါးမှု နဲ့ကျန်းမာရေးအခြေအနေနိုမ့်ကျလာနေမှုတွေရဲ့ ရလဒ်ကတော့ စိုးရိမ်ဖွယ်ရာအနေအထားရောက်နေပါပြီ” ဟု မြေထဲပင်လယ် အရှေ့ပိုင်း ဒေသဆိုင်ရာ WHO ညွှန်ကြားရေးမှူး Mahmoud Fikri ၏ မိုဂါဒစ်ရှူးမြို့တွင် ဖေဖော်ဝါရီလ ၂၇ ရက်က ထုတ်ပြန်သည့် ကြေညာချက်တွင်ဖော်ပြထားသည်။

ဆိုမာလီယာနိုင်ငံ၌ လူသားချင်းစာနာမှုအကူအညီပေးရေးအခြေအနေများမှာ ဆက်လက်၍ ဆိုးဝါးလာနေကြောင်း နှင့် ပြီးခဲ့သော ၂၅ နှစ်တာကာလအတွင်း အစာရေစာငတ်မွတ်မှုအခြေအနေသည် တတိယ အမြင့်ဆုံးအဆင့် အနေအထားထိ ရောက်ရှိနေကြောင်း သိရသည်။

ဆိုမာလီယာနိုင်ငံသား ထက်ဝက်ပမာဏဖြစ်သည့် ပြည်သူ ၆.၂ သန်းကျော်သည် လူသားချင်းစာနာမှုအကူအညီများကို ချက်ချင်းလိုအပ်နေပြီး ၎င်းတို့ထဲမှ သုံးသန်းခန့်သည် စားနပ်ရိက္ခာပြတ်လပ်မှုအခြေအနေနှင့်ကြုံတွေ့နေရပြီဖြစ်ကြောင်း သိရသည်။

ပြည်သူ ၅.၅ သန်းခန့်သည် ရေကြောင့် ဖြစ်တတ်သော ရောဂါများခံစားနေရကြောင်း ၊ ၎င်းတို့အနက် ထက်ဝက်ကျော်မှာ အမျိုးသမီးများ နှင့် အသက် ၅ နှစ်အောက် ကလေးငယ်များဖြစ်ကြောင်း သိရသည်။(Xinhua)