၉/၁၁ အကြမ်းဖက်မှု ဖြစ်ပွားပြီးနောက် အဘူဆာရက်ဖ် ဖိလစ်ပိုင်အကြမ်းဖက်အဖွဲ့အားကောင်းလာ

မနီလာ၊ စက်တင်ဘာ ၁၂ ရက် (ဆင်ဟွာ)

အမေရိကန်နိုင်ငံတွင်ဖြစ်ပွားခဲ့သည့် ၉/၁၁ အကြမ်းဖက်မှုအပြီးတွင် ဖိလစ်ပိုင်အစွန်းရောက်အဖွဲ့ဖြစ်သော အဘူဆာရက်ဖ်အကြမ်းဖက်အဖွဲ့ ပိုမိုအားကောင်းလာခဲ့ကြောင်း အစိုးရ အကြီးတန်း တာဝန်ရှိသူတစ်ဦးက ပြောကြားခဲ့သည်။

သမ္မတ၏ ပြန်ကြားရေးရုံး အတွင်းဝန် Martin Andanar က အမေရိကန်နိုင်ငံတွင်ဖြစ်ပွားခဲ့သော ၉/၁၁ အကြမ်းဖက်မှုသည် အကြမ်းဖက်မှု ပန်ဒိုသေတ္တာအား ဖွင့်လိုက်ခြင်းနှင့်တူကြောင်း စက်တင်ဘာ ၁၁ရက် က ပြောကြားခဲ့သည်။
၎င်းက “အစွန်းရောက်အဖွဲ့ဖြစ်တဲ့ IS အကြမ်းဖက်အဖွဲ့တွေလည်း ပေါ်ထွက်လာပါတယ်။ ပြီးတော့ အဘူဆာရက်ဖ် အကြမ်းဖက်အုပ်စု ဟာလည်း အင်အားကြီးလာခဲ့ပါတယ်”ဟု IS အစွန်းရောက်အဖွဲ့ကို သစ္စာခံထားသည့် ပြည်တွင်းအကြမ်းဖက်အဖွဲ့များ၏ ထုတ်ပြန်ချက်များကို ကိုးကား၍ ပြောကြားခဲ့သည်။
လွန်ခဲ့သည့် ၁၅နှစ် အကြာက အမေရိကန် ၉/၁၁ အကြမ်းဖက်မှု ၏ အဓိက တရားခံဖြစ်သည့် အယ်ကိုင်းဒါး စစ်သွေးကြွအဖွဲ့ ၏ အကြမ်းဖက်မှု မြင့်တက်နေစဉ်အတွင်း အဘူဆာရက်ဖ် တောတွင်းဓားပြများသည်လည်း ယင်း စစ်သွေးကြွအဖွဲ့ထံ သစ္စာခံကြောင်း ကတိပြုခဲ့ကြသည်။
Andanar က “ကျွန်တော်တို့အားလုံးသည် အစွန်းရောက်အကြမ်းဖက်အုပ်စုများနှင့် ရင်ဆိုင်နေရကြောင်းကို ၉/၁၁ အကြမ်းဖက်မှု က သတိပေးနေသကဲ့သို့ဖြစ်ပါတယ်” ဟုပြောကြားခဲ့သည်။
၎င်းက အကြမ်းဖက်မှုများအား တိုက်ဖျက်ရန်အတွက် အားလုံးပူးပေါင်းပါဝင်ကြရန် တိုက်တွန်းပြောဆိုခဲ့သည်။
Andanaru က “အကြမ်းဖက်မှုကို စုပေါင်းအင်အားဖြင့် တစ်ဦးကိုတစ်ဦးကူညီကာ ရင်ဆိုင် တိုက်ခိုက်သင့်ပါတယ်။ ထိုသို့လုပ်ဆောင်ခြင်းဟာ အာဏာပိုင်များ၊ ဖိလစ်ပိုင်အမျိုးသားရဲတပ်ဖွဲ့ နဲ့ ဖိလစ်ပိုင်စစ်တပ် (AFP) တို့ရဲ့ တာဝန်အဖြစ်သာမက ဖိလစ်ပိုင်လူမျိုးတိုင်း၏ တာဝန်လည်းဖြစ်ပါတယ်” ပြောကြားခဲ့သည်။
မကြာသေးမီက အဘူဆာရက်ဖ်အုပ်စုသည် ဖိလစ်ပိုင်နိုင်ငံ တောင်ပိုင်း Davao မြို့အား တိုက်ခိုက်ခဲ့ရာ လူ ၁၄ဦးသေဆုံးခဲပြီး အခြား ၇၀ဦး ဒဏ်ရာရရှိခဲ့ကြောင်း သိရသည်။ (Xinhua)