အင်အားကြီး အနောက်နိုင်ငံများအနေဖြင့် မိမိတို့၏ ပြည်တွင်းရေးပြဿနာများကိုသာ အာရုံစိုက်ရန် ဘီလာရုစ်နိုင်ငံ သမ္မတ ပြော

မင့်စ်ခ်၊ ဩဂုတ် ၂၀ ရက် (ဆင်ဟွာ)

ဘီလာရုစ်နိုင်ငံ သမ္မတ Alexander Lukashenko က အင်အားကြီး အနောက်နိုင်ငံများ၏ ခေါင်းဆောင်များအနေဖြင့် ဘီလာရုစ်ရှိ နိုင်ငံရေးအခြေအနေထက် မိမိတို့၏ ကိုယ်ပိုင်ပြဿနာများ အပေါ်တွင် သာ အာရုံစိုက် အလေးထားသင့်ကြောင်း ဩဂုတ် ၁၉ ရက်က ပြောကြားလိုက်သည်ကို နိုင်ငံပိုင်သတင်းအေဂျင်စီ BelTA က သတင်းဖော်ပြခဲ့သည်။

“သူတို့ဟာ ကိုယ့်နိုင်ငံထဲမှာပဲ ပြဿနာကြီးတွေ ရင်ဆိုင်နေရတာရှိတယ် ။ ပြင်သစ်၊ အမေရိကန်၊ ဂျာမနီနဲ့ အခြားနိုင်ငံတွေအနေနဲ့ ကိုယ့်နိုင်ငံထဲက ကိစ္စတွေကနေ အာရုံလွှဲဖို့အတွက် ဘီလာရုစ်နိုင်ငံဆီကို ဦးမတည်ပါနဲ့” ဟု ဗီဒီယိုလင့်ခ်မှတစ်ဆင့် ပြုလုပ်သော နိုင်ငံ၏ လုံခြုံရေးကောင်စီ အစည်းအဝေးတွင် Lukashenko က ပြောကြားခဲ့သည်။ 

ကိစ္စရပ်များအားလုံးသည် သဘောတူညီထားပြီးသား ဖြစ်ကြောင်း၊ ၎င်းတို့အနေဖြင့် ဘီလာရုစ်နိုင်ငံနှင့် ဆွေးနွေးနိုင်ကြောင်း ၊ သို့သော် ၎င်းတို့၏ အစီအစဉ်များကို ဦးစားပေးအဆင့် မထားသင့်ကြောင်း သမ္မတက ဖြည့်စွက်ပြောခဲ့သည်။ Lukashenko သည် ဩဂုတ် ၉ ရက် ရွေးကောက်ပွဲတွင် ခြောက်ကြိမ်မြောက် သမ္မတ သက်တမ်းအတွက် ထပ်မံ အနိုင်ရရှိခဲ့ပြီးနောက် ဘီလာရုစ်နိုင်ငံအတွင်း လူထုဆန္ဒပြမှုများ ပေါ်ပေါက်ခဲ့သလို အတိုက်အခံဘက်ကလည်း ရွေးကောက်ပွဲရလဒ်ကို အသိအမှတ်ပြုရန် ငြင်းဆိုလျက်ရှိကြောင်း သိရသည်။  (Xinhua)