တရုတ်နိုင်ငံ တောင်ပိုင်းတွင် ရှားပါး ငါးမျိုးစိပ်တစ်ခုကို ဂူလေ့လာရေးသမားများက ရှာဖွေတွေ့ရှိ

နန်ကျင်း၊ ဇန်နဝါရီ ၂၄ ရက် (ဆင်ဟွာ)

တရုတ်နိုင်ငံ တောင်ပိုင်း ကွမ်ရှီးကျွမ်း ကိုယ်ပိုင်အုပ်ချုပ်ခွင့်ရဒေသတွင် စူးစမ်းရှာဖွေမှုတစ်ခု၌ ရှားပါး ငါးမျိုးစိပ်တစ်ခုကို ဂူလေ့လာရေးအဖွဲ့တစ်ဖွဲ့က တွေ့ရှိခဲ့ကြောင်း သိရသည်။

တရုတ်နိုင်ငံနှင့် ပြင်သစ်နိုင်ငံမှ ပညာရှင်များ အပါအဝင် လေ့လာရေးသမား ၁၅ ဦး ပါဝင်သော လေ့လာရေးအဖွဲ့က ကွမ်ရှီးပြည်နယ် ဟဲချီမြို့ရှိ ဂူများ၌ ၉ ရက်ကြာ လေ့လာခဲ့ကြကြောင်း အဖွဲ့ခေါင်းဆောင် Chen Lixin က ပြောခဲ့သည်။

၎င်းတို့သည် Bagong မြို့နယ် Zhai’ao ကျေးရွာတွင် စုစုပေါင်း ၂၀ ကီလိုမီတာရှိသော ဂူ ၈ ခုအား ရှာဖွေလေ့လာခဲ့ရာတွင် ရှားပါး ဂူအောင်းငါး အမျိုးအစား ဖြစ်သော Golden-line Barbel ငါးများအား တွေ့ရှိခဲ့ခြင်း ဖြစ်သည်။

အဆိုပါ ငါးများသည် ပတ်ဝန်းကျင် ညစ်ညမ်းမှုကင်းသော ရေပြင်အတွင်း လွတ်လပ်စွာ ကူးခတ်သွားလာနေပြီး အရေအတွက် အနည်းငယ်သာရှိကြောင်း Chen က ဆိုသည်။ ထို့ပြင် ၎င်းတို့သည် ရှားပါး ပုစွန် အမျိုးအစား တစ်ခုကိုလည်း တွေ့ရှိခဲ့ကြကြောင်း၊ ယင်း နေရာတဝိုက်၌ သဘာဝပတ်ဝန်းကျင်အခြေအနေမှာ ကောင်းမွန်ကြောင်း သိရသည်။

ထိုဂူများအတွင်း ကျောက်စက်ပန်းဆွဲ အမျိုးပေါင်းများစွာကိုလည်း တွေ့ရှိခဲ့ပြီး ကျောက်စက်ပန်းဆွဲ တစ်မျိုးမှာ အမြင့် ၁၈ မီတာရှိကြောင်း Chen က ပြောကြားခဲ့သည်။ (Xinhua)