Sport
အာဆီယံ ယူ ၁၉ ချန်ပီယံရှစ် အမျိုးသားဘောလုံးပြိုင်ပွဲ၌ မြန်မာအသင်း ငွေတံဆိပ်ဆု ရရှိ
ရန်ကုန်၊ ဇူလိုင် ၁၅ ရက် (ဆင်ဟွာ)
၂၀၁၈ အာဆီယံယူ ၁၉ ချန်ပီယံရှစ် အမျိုးသား ဘောလုံးပြိုင်ပွဲတွင် မြန်မာအသင်းသည် ဒုတိယ ငွေတံဆိပ်ဆု ဆွတ်ခူး ရယူနိုင်ခဲ့ကြောင်း မြန်မာနိုင်ငံဘောလုံးအဖွဲ့ချုပ်မှ သတင်းထုတ်ပြန်သည်။
၂၀၁၈ အာဆီယံယူ ၁၉ ချန်ပီယံရှစ် အမျိုးသား ဘောလုံးပြိုင်ပွဲ ကို ဇူလိုင်လ ၁ ရက်မှ ၁၄ ရက်နေ့အထိ အင်ဒိုနီးရှားနိုင်ငံတွင် ကျင်းပခဲ့ခြင်းဖြစ်ပြီး၊ မြန်မာအသင်းသည် တီမော၊မလေးရှား၊ ဘရူနိုင်းနှင့် ကမ္ဘောဒီးယား အသင်းတို့ ပါဝင်သည့် အုပ်စု(ခ)တွင် ပါဝင်ခဲ့ကာ အုပ်စုဒုတိယနေရာဖြင့် အကြိုဗိုလ်လုပွဲသို့ တက်ရောက်ခဲ့ခြင်းဖြစ်သည်။
အကြိုဗိုလ်လုပွဲတွင် ပြိုင်ဘက် ထိုင်းအသင်းကို တစ်ဂိုး-ဂိုးမရှိဖြင့် အနိုင်ရရှိပြီး ဗိုလ်လုပွဲသို့ တက်လှမ်းခဲ့သည်။ ဗိုလ်လုပွဲတွင် မလေးရှားအသင်းနှင့် ဆုံတွေ့ခဲ့ရာ မလေးရှားအသင်းက ၄-၃ ဂိုးဖြင့် အနိုင်ရရှိသွားခဲ့သည်။
ဒုတိယဆုရ မြန်မာယူ ၁၉ အသင်းသည် ယနေ့ ညနေပိုင်းတွင် မြန်မာနိုင်ငံသို့ ပြန်လည်ရောက်ရှိလာမည်ဖြစ် ကြောင်းမြန်မာနိုင်ငံဘောလုံးအဖွဲ့ချုပ် ၏ သတင်းထုတ်ပြန်ချက်ထဲတွင်ပါရှိသည်။ (Xinhua)