Connect with us

Culture

နွေရာသီတရုတ်လက်ရေးလှသင်တန်း မြန်မာကျောင်းသားများ တက်ရောက်သင်ယူ

ရန်ကုန်မြို့ရှိ တရုတ်ယဉ်ကျေးမှုစင်တာတွင် ကျောင်းသားများ၏ လက်ရေးလှလက်ရာများကို စစ်ဆေးနေသော နည်းပြဆရာတစ်ဦးကို ၂၀၂၃ ခုနှစ်၊မေ ၂၃ ရက်ကတွေ့ရစဉ် (ဆင်ဟွာ)

ရန်ကုန်၊ မေ ၂၄ ရက် (ဆင်ဟွာ)

မြန်မာနိုင်ငံရှိ ကျောင်းသား တချို့သည် နွေရာသီ အားလပ်ရက်အတွင်း ရန်ကုန်မြို့ရှိ တရုတ်ယဉ်ကျေးမှုစင်တာ တွင် တရုတ် လက်ရေးလှ သင်ယူနေကြကြောင်း သိရသည်။

အသက် ၂၅ နှစ်အရွယ်ရှိ မ မဥ္ဇူသိမ့် သည် တရုတ်ယဉ်ကျေးမှုစင်တာ၌ တရုတ်လက်ရေးလှရေးနည်းကို သင်ယူလျက်ရှိသည်။
“ညီမအနေနဲ့ တရုတ်လက်ရေးလှသင်တန်းကို ဒီမှာတက်ရတာ အရမ်းပျော်ပါတယ်။ ညီမအနေနဲ့တရုတ်ဘာသာစကားကို အရမ်းစိတ်ဝင်စားပါတယ်” ဟု တရုတ်လက်ရေးလှသင်တန်း နောက်ဆုံးနေ့ဖြစ်သော မေ ၂၃ရက်တွင် မ မဉ္ဇူသိမ့်က ဆင်ဟွာသို့ ပြောသည်။

ရန်ကုန်မြို့ရှိ တရုတ်ယဉ်ကျေးမှုစင်တာတွင် နွေရာသီသင်တန်းတစ်ခု၌ တရုတ်လက်ရေးလှ လေ့ကျင့်နေသော မိန်းကလေးတစ်ဦးကို ၂၀၂၃ ခုနှစ်၊ မေ ၂၃ ရက်ကတွေ့ရစဉ် (ဆင်ဟွာ)

“ပုံမှန်ကိုယ်ရေးနေကျ ဘောပင်နဲ့ စာရွက်နဲ့ ရေးတာထက် အခုလို စုတ်တံနဲ့ ရေးရတာက အတွေ့အကြုံ အသစ်ပေါ့။ စုတ်တံနဲ့စာရေးရတာက ညီမအတွက်တော့ ပထမဆုံး အတွေ့အကြုံပါ။ စုတ်တံနဲ့ရေးရတာကကြတော့ စိတ်ကိုပိုပြီးတည်ငြိမ်စေသလို အာရုံစူးစိုက်မှုကိုလည်း ပိုကောင်းတယ်လို့ခံစားရပါတယ်’’ ဟု ၎င်းကပြောသည်။

မ မဉ္ဇူ သည် တရုတ်လက်ရေးလှရေးနည်းသာမက တရုတ်အစားအစာ ချက်ပြုတ်ခြင်း၊ တရုတ်တေးသီချင်းများ သီဆိုခြင်းနှင့် တရုတ်ရိုးရာအကများ ကပြခြင်းတို့ကိုလည်း စိတ်ဝင်စားကြောင်း ပြောသည်။ ၎င်းအနေဖြင့် တရုတ်ဘာသာစကားကို လွန်ခဲ့သည့် ခုနစ်နှစ်ခန့်မှ စတင်၍ သင်ယူခဲ့ကြောင်း သိရသည်။

“တရုတ်လက်ရေးလှရေးနည်းကို သင်ယူတဲ့အခါမှာ အတွေ့အကြုံသစ်ကို ရခဲ့ပါတယ်။ တရုတ်စာလုံးတွေကို စုတ်တံနဲ့ရေးတာ အရင်ကထက်တိုးတက်လာတဲ့အတွက် ကျေနပ်ပျော်ရွှင်မိပါတယ်။ တရုတ်လက်ရေးလှလေးရေးပြီး အိမ်မှာ အလှဆင်ဖို့ စိတ်ကူးရှိပါတယ်” ဟုမ မဉ္ဇူကဆက်ပြောသည်။

ရန်ကုန်မြို့ရှိ တရုတ်ယဉ်ကျေးမှုစင်တာတွင် တရုတ်လက်ရေးလှ လေ့ကျင့်နေကြသော မြန်မာကျောင်းသားများကို ၂၀၂၃ ခုနှစ်၊ မေ ၂၃ ရက်က တွေ့ရစဉ် (ဆင်ဟွာ)

အသက် ၂၀ နှစ်အရွယ်ရှိ မြန်မာကျောင်းသူတစ်ဦးဖြစ်သူ မဝမ်ဆိုက်မိန်းသည်လည်း တရုတ်ယဉ်ကျေးမှုစင်တာတွင် လက်ရေးလှ သင်တန်းတက်ရောက်သင်ကြားလျက်ရှိသည်။
“ဒီသင်တန်းကို တက်ဖြစ်ရတာက ညီမရဲ့ တရုတ်ဆရာက ဒီသင်တန်းတက်သင့်တယ်ဆိုပြီး ပြောလို့ပါ။ နောက်တစ်ချက်ကတော့ ညီမ တရုတ်စာရေးတဲ့အခါ လက်ရေးမလှလို့ပါ’’ ဟု မဝမ်ဆိုက်မိန်းက ဆင်ဟွာသို့ပြောသည်။
“အခုတော့ ညီမရဲ့ တရုတ်စာလက်ရေးက အများကြီးတိုးတက်လာပါပြီ’’ ဟု မဝမ်ဆိုက်မိန်းကဆိုသည်။
“လက်ရေးလှရေးနည်းကို သင်ယူတဲ့အခါမှာ စိတ်ရှည်ဖို့ လိုပါတယ်။ ညီမ အခုတော့ ပိုစိတ်ရှည်လာပါပြီ။ တစ်နေ့မှာတော့ ညီမရွာက ကလေးတွေကို စုတ်တံ လက်ရေးလှရေးနည်း ပြန်ပြီး သင်ပေးချင်ပါတယ်” ဟု မဝမ်ဆိုက်မိန်းကဆက်ပြောသည်။

၎င်းအနေဖြင့် တရုတ်ယဉ်ကျေးမှုတွေကို များစွာစိတ်ဝင်စားကြောင်း၊ တရုတ်လက်ရေးလှအပြင် တရုတ်အစားအစာချက်ပြုတ်နည်း၊ တရုတ်စတိုင်ပန်းအလှဆင်ခြင်း နှင့် တရုတ်စက္ကူအလှညှပ်အနုပညာတို့ကို စိတ်ဝင်စားကြောင်း မဝမ်ဆိုက်မိန်းက ဆိုသည်။
နောက်ထပ်မြန်မာကျောင်းသားတစ်ဦးဖြစ်သူ ကိုစောအဲလက်စ်ထူးကလည်း တရုတ်ယဉ်ကျေးမှုစင်တာတွင် လက်ရေးလှ သင်တန်းတက်ရောက်သင်ကြားနေခဲ့သူတစ်ဦးဖြစ်သည်။

“ကျွန်တော်က တရုတ်ဘာသာစကားအပြင် တရုတ်ယဉ်ကျေးမှုကို အရမ်းစိတ်ဝင်စားပါတယ်။ ဒါကြောင့် ကျွန်တော် ဒီသင်တန်းကို တက်ခဲ့တာပါ” ဟု ကိုစောအဲလက်စ်ထူးကပြောသည်။

အဆိုပါအသက် ၁၆ နှစ်အရွယ် မြန်မာကျောင်းသားလေး ကိုအဲလက်စ်ထူးသည် အနာဂတ်တွင် တရုတ်နိုင်ငံ၌ ပညာသင်ကြားရန် အစီအစဉ်ရှိကြောင်းပြောခဲ့သည်။ “အခက်အခဲတွရှိပေမဲ့ ကျွန်တော်အနေနဲ့ အစွမ်းကုန်ကြိုးစားနေပါတယ်” ဟု ၎င်းကဆိုသည်။
မြန်မာကျောင်းသားတစ်ဦးဖြစ်သူ ကိုချန်မင်းချင်း သည်လည်း တရုတ်ယဉ်ကျေးမှုစင်တာတွင် လက်ရေးလှ သင်တန်းတက်ရောက်သင်ကြားလျက်ရှိသည်။

“ကျွန်တော်အနေနဲ့ တရုတ်စာပေကို စိတ်ဝင်စားပါတယ်၊ တရုတ်နှစ်သစ်ကူးပွဲတော်တွေမှာ တရုတ်ရိုးရာအကနဲ့ ဖျော်ဖြေခဲ့ဖူးပါတယ်” ဟု ကိုချန်မင်းချင်း ကပြောသည်။
“တရုတ်စာလုံး ရေးဖို့ စိတ်တည်ငြိမ်ဖို့လိုအပ်တယ်။ စိတ်နည်းနည်းလေး လွင့်သွားရင် အတွန့်၊ အတက် လုပ်တာလေးတွေက မှားသွားရော။ တရုတ်လက်ရေးလှရေးနည်းကိုရေးတာက ကျွန်တော့်ရဲ့ ပထမဆုံး အကြိမ်ပါ။ ဒါကြောင့် စုတ်ချက်ဆွဲတဲ့အခါမှာ အခက်အခဲတွေတော့ ရှိပါတယ်။ သူငယ်ချင်းတွေကို တရုတ်လက်ရေးလှလေးရေးပြီး လက်ဆောင်ပေးပြီး စပရိုက်လုပ်ဖို့ ရှိပါတယ်”ဟု ကိုချန်မင်းချင်း ကပြောသည်။

ရန်ကုန်မြို့ရှိ တရုတ်ယဉ်ကျေးမှုစင်တာတွင် စုတ်တံ သို့မဟုတ် ဖောင်တိန်အသုံးပြု၍ လက်ရေးလှရေးသင်တန်း နှစ်ခုအပါအဝင် တရုတ်ယဉ်ကျေးမှုဆိုင်ရာ နွေရာသီသင်တန်းများကို ဖွင့်လှစ်ခဲ့သည်။ အတန်းတစ်ခုစီတွင် အသက် ၁၂ နှစ်မှ ၂၅ နှစ်ကြား ကျောင်းသား ၁၅ ဦးစီ သင်ကြားခဲ့ကြောင်း သိရသည်။

“တရုတ်ယဉ်ကျေးမှုစင်တာမှာ လက်ရေးလှသင်တန်းဖွင့်မယ်လို့ ကျွန်တော့်ကို အကြောင်းကြားတယ်။ ကျွန်တော်က လက်ရေးလှနဲ့ယဉ်ကျေးမှုကို စိတ်ဝင်စားချစ်မြတ်နိုးတဲ့သူ တစ်ယောက်လေ။ ဒီလိုအပိုင်းနဲ့ပတ်သတ်လို့ သင်ကြားပေးရမှာဆိုတော့ ကျွန်တော်ဝမ်းသာမိပါတယ်” ဟု လက်ရေးလှ အတန်းနှစ်ခုလုံး၏ ဆရာဖြစ်သူ ဦးမော်လီရွှေက ဆင်ဟွာသို့ပြောသည်။

“တရုတ်လက်ရေးလှက တရုတ်နိုင်ငံ၏ ယဉ်ကျေးမှုနှင့် ဂုဏ်သိက္ခာကို ဖော်ပြနိုင်ပါတယ်။ တရုတ်လက်ရေးပန်းချီက တရုတ်နိုင်ငံရဲ့ ရှည်လျားတဲ့သမိုင်းကြောင်းတို့ တရုတ်ယဉ်ကျေးမှုတို့နဲ့ ဆက်စပ်နေပါတယ်။ နိုင်ငံချင်း ယဉ်ကျေးမှုချင်းဖလှယ်တဲ့အခါမှာ အပြန်အလှန်နားလည်မှုတွေ ပိုတိုးစေတယ်၊ အတူတကွ တိုးတက်အောင်ဆောင်ရွက်နိုင်တယ်။ ဒါက အပြန်အလှန်သင်ယူလေ့လာမှုရဲ့ အလွန်ကောင်းတဲ့ အစီအစဉ်ပါ” ဟု ၎င်းက ဆိုသည်။ (Xinhua)