Asia
အင်ဒိုနီးရှား၌ မျိုးတုံးပျာက်ကွယ်မှုအန္တရာယ်နှင့်ကြုံတွေ့နေရသည့် ဆူမတြားကျားလေး နှစ်ကောင် မွေးဖွား
ဂျကာတာ၊ဒီဇင်ဘာ ၂ဝ ရက်(ဆင်ဟွာ)
အင်ဒိုနီးရှားနိုင်ငံ အနောက်ဆူလာဝေဆီပြည်နယ်ရှိ သဘာဝတောရိုင်းဥယျာဉ်တစ်ခု၌ မျိုးတုံးပျောက်ကွယ်မှုအန္တရာယ်နှင့်ကြုံတွေ့နေရသော ကျားမျိုးစိတ်တစ်ခုဖြစ်သည့် ဆူမတြားကျားပေါက်လေး နှစ်ကောင်ကို အသက် ၉ နှစ်အရွယ်မိခင်ကျားမကြီးမှ မွေးဖွားပေးခဲ့ကြောင်း ဥယျာဉ်တာဝန်ရှိသူများက ဒီဇင်ဘာ ၁၉ ရက်တွင် ပြောကြားခဲ့သည်။
ဆူမတြား ကျားအထီးတစ်ကောင် အမတစ်ကောင်ကို ဒီဇင်ဘာ ၁၆ ရက် နံနက်ပိုင်းတွင် မွေးဖွားခဲ့ကြောင်း ကီနန်တန်(Kinantan) ယဉ်ကျေးမှု နှင့် သဘာဝတောရိုင်းဥယျာဉ် အကြီးအကဲ Ikbal က ဆိုသည်။
“ မိခင်ကျားမကြီးရော ၊ သားပေါက်လေး နှစ်ကောင်ပါ ကျန်းမာရေးကောင်းမွန်ပါတယ်။ သူတို့ကို လှောင်အိမ်လေးတစ်ခုထဲမှာ အတူတူထားထားပါတယ်။ပြီးတော့ တာဝန်ရှိသူတွေက အနီးကပ်စောင့်ကြည့်နေကြပါတယ်” ဟု ၎င်းက ဆိုသည်။
ဥယျာဉ်သို့လာရောက်လည်ပတ်ကြသူများ၏ ဖိအားပေးမှု နှင့် နှောင့်ယှက်ပေးမှုမှ ကင်းဝေးစေရန် အဆိုပါ ကျားလှောင်အိမ်ကို သီးသန့်နေရာတစ်ခုတွင် ထားရှိကြောင်း ၎င်းက ဆက်လက်ပြောကြားခဲ့သည်။
ယခုမွေးဖွားလိုက်သော ကျားပေါက်လေး နှစ်ကောင်အပါအဝင် ဥယျာဉ်အတွင်း၌ ဆူမတြားကျားကောင်ရေ ၁၁ ကောင်ကို ထိန်းသိမ်းစောင့်ရှောက်ထားကြောင်း ၊ ၎င်းတို့အနက် အမ ၇ ကောင် နှင့် အထီး ၄ ကောင်ပါဝင်ကြောင်း နိုင်ငံပိုင်သတင်းဌာန Antara ၏ဖော်ပြချက်ကိုးကား၍ သိရသည်။
ဆူမတြားကျားမျိုးစိတ်သည် ကျားမျိုးစိတ်များစွာအနက် အရွယ်အစားအသေးငယ်ဆုံးဖြစ်ကြောင်း ၊ ၎င်းကျားမျိုးစိတ်သည် အလျား ၂.၇ မီတာ နှင့် အလေးချိန် ၇၅ ကီလိုဂရမ်မှ ၁၁၄ ကီလိုဂရမ်အထိရှိကြောင်း သိရသည်။
အဆိုပါ ဆူမတြားကျားမျိုးစိတ်ကို ၂ဝဝ၈ ခုနှစ်တွင် မျိုးတုံးပျောက်ကွယ်မှုအန္တရာယ်နှင့်ကြုံတွေ့နေရသည့် သက်ရှိမျိုးစိတ်စာရင်းထဲသို့ထည့်သွင်းခဲ့ပြီး လက်ရှိတွင် ၎င်းကျားကောင်ရေမှာ တစ်ကမ္ဘာလုံး၌ ၄၄၁ ကောင်မှ ၆၇၉ ကောင်အကြားရှိနိုင်ကြောင်း သိရသည်။(Xinhua)