ကမ္ဘာ့ ကင်ဆာ ကြေညာစာတမ်း ဖီဂျီ လက်မှတ်ရေးထိုး

စူဗား၊ ဇူလိုင် ၂၁ ရက် (ဆင်ဟွာ)

ဖီဂျီနိုင်ငံသည် ကာကွယ်နိုင်သည့် ကင်ဆာရောဂါ လူနာများအား သေဆုံးမှုနှုန်း လျှော့ချရန် ရည်မှန်းချက်ဖြင့် ကမ္ဘာ့ ကင်ဆာ ကြေညာစာတမ်း (World Cancer Declaration) အား ဇူလိုင်လ ၂၁ ရက်က လက်မှတ်ရေးထိုး လိုက်ကြောင်း သိရသည်။

ဖီဂျီနိုင်ငံ အနေဖြင့် WCD ၏ ရည်မှန်းချက်များအား ရှင်းလင်းသည့် မဟာဗျူဟာများဖြင့် နီးကပ် ပြည့်မီစွာ ဆောင်ရွက်သွားမည် ဖြစ်ကြောင်း၊ UICC (Union for International Cancer Control) နှင့်အတူ ဆေးခန်းစနစ်များ၊ ဝန်ဆောင်မှုများနှင့် သင်တန်းပေးခြင်း စသည်တို့အား လုပ်ဆောင်ရန် အသင့်ရှိနေကြောင်း ကျန်းမာရေးနှင့် ဆေးပညာဆိုင်ရာ ဝန်ဆောင်မှု ဝန်ကြီး Jone Usamate က ပြောသည်။
ယခုလို လက်မှတ် ရေးထိုးလိုက်ခြင်းသည် ဖီဂျီနိုင်ငံ အနေဖြင့် ကင်ဆာကြောင့် ဖြစ်ပေါ်လာစေသည့် ဝန်ထုပ် ဝန်ပိုးအား လျှော့ချရန် ကတိပြုထားချက်အား UICC နှင့် အခြား အပြည်ပြည်ဆိုင်ရာ မိတ်ဖက်များနှင့် အများ ပြည်သူကို ပြသရာလည်း ရောက်ကြောင်း Usamate က ပြောသည်။
ထို့ပြင် ဖီဂျီသည် WCD ၏ လုပ်ဆောင်ပေးမှုဖြင့် ကင်ဆာ ဝန်ထုပ်ဝန်ပိုးအား လျှော့ချရန် ကတိပြုမှု အမြောက် အမြားအား လုပ်ဆောင်ထားပြီး ဖြစ်ကြောင်း၊ ဖီဂျီနိုင်ငံတွင် လူသေဆုံးမှု၏ တတိယ အကြီးဆုံး အကြောင်းရင်း မှာ ကင်ဆာကြောင့် ဖြစ်ကြောင်းနှင့် လူသေဆုံးနှုန်းအား လျှော့ချရာတွင် ယင်းသို့ ကတိကဝတ်များက ကြီးစွာ သော အထောက်အပံ့ပေးနိုင်မည်ဟု ဆိုသည်။
ဖီဂျီနိုင်ငံသည် ၂၀၁၅ ခုနှစ်တွင် UICC ၏ အဖွဲ့ဝင်နိုင်ငံ တစ်ခု ဖြစ်လာခဲ့ပြီးနောက် ကင်ဆာဖြစ်ပွားနှုန်း ထိရောက်စွာ လျှော့ချရန် အပြည့်အဝ ကတိကဝတ်ပြုခဲ့ကြောင်း သိရသည်။ (Xinhua)