အမေရိကန်၏ နောက်ဆုံးစီးပွားရေးပိတ်ဆို့မှုများတွင် ဗင်နီဇွဲလားနိုင်ငံ သမ္မတကတော်နှင့် အရာရှိများအား အမည်ပျက်စာရင်းသွင်းခဲ့

ဝါရှင်တန်၊ စက်တင်ဘာ ၂၆ ရက် (ဆင်ဟွာ)

ဗင်နီဇွဲလားနိုင်ငံ သမ္မတ နီကိုးလပ်စ် မာဒူရို (Nicolas Maduro) ၏ ဇနီးနှင့် အခြားသော အစိုးရပိုင်းဆိုင်ရာ အဓိက ခေါင်းဆောင်များပါဝင်သည့် “အတွင်းစည်း” တွင် ပါဝင်သူများအား စီးပွားရေးပိတ်ဆို့မှုများ ပြုလုပ်ခဲ့ကြောင်း အမေရိကန်နိုင်ငံ ဘဏ္ဍာရေးဝန်ကြီးဌာနက စက်တင်ဘာလ ၂၅ ရက်တွင် ကြေညာလိုက်သည်။

ကြေညာချက်တွင် ဗင်နီဇွဲလားနိုင်ငံ သမ္မတကတော် စီလီယာ ဖလိုရက်စ် (Cilia Flores) နှင့် ဒုတိယသမ္မတ Delcy Rodriguez ၊ ဆက်သွယ်ရေးဝန်ကြီး Jorge Rodriguez နှင့် ကာကွယ်ရေးဝန်ကြီး Vladimir Padrino တို့အား အမည်ပျက်စာရင်းသွင်းလိုက်ကြောင်း ဖော်ပြထားသည်။

အဆိုပါ ပိတ်ဆို့မှုတွင် အမည်ပျက်စာရင်းသွင်းခံထားရသူပိုင်ဆိုင်သည့် ပစ္စည်းများ သိမ်းဆည်းခြင်းနှင့် ၎င်းတို့နှင့် စီးပွားရေး အချိတ်အဆက်ပြုလုပ်သည့် အမေရိကန်နိုင်ငံသားများသို့ ကုမ္ပဏီများအား တားမြစ်ခြင်းလည်း ပါဝင်သည်။

ထို့ပြင် သမ္မတ၏ ဗင်နီဇွဲလားနိုင်ငံ အမျိုးသားလွှတ်တော် (ANC) ၏ အဓိကပုဂ္ဂိုလ် Diosdado Cabello အား ထောက်ပံံသည်ဟု စွပ်စွဲထားသော ကွန်ရက်တစ်ခုကိုလည်း ပိတ်ဆို့မှုစာရင်း၌ ထည့်သွင်းခဲ့ပြီး ၎င်း ပိုင်ဆိုင်သော အမေရိကန်ဒေါ်လာ သန်း ၂၀ တန်ဖိုးရှိသော ကိုယ်ပိုင်ဂျက်လေယာဉ်အား ဖမ်းဆီးထားကြောင်း သိရသည်။

ဗင်နီဇွဲလားအစိုးရကမူ ကုလသမဂ္ဂ၏ ခွင့်ပြုချက်မရှိဘဲ နိုင်ငံအပေါ် မည်သည့်ပိတ်ဆို့မှုများကိုမျှ အသိအမှတ်မပြုကြောင်း ပြောကြားခဲ့သည်။ (Xinhua)