တန်နက်စီတက္ကသိုလ်တွင် ကိုရိုနာဗိုင်းရပ်စ်ကူးစက်ခံရသဖြင့် ကျောင်းသားနှင့် ဝန်ထမ်း ၂,၁၀၀ ကျော် အသွားအလာကန့်သတ်

ဝါရှင်တန်၊ စက်တင်ဘာ ၁၀ ရက် (ဆင်ဟွာ)

အမေရိကန်နိုင်ငံ တောင်ပိုင်း တန်နက်စီတက္ကသိုလ် (University of Tennessee) ရှိ Knoxville ပရိဝုဏ်၌ ကိုရိုနာဗိုင်းရပ်စ် ဖြစ်ပွားမှုမြင့်တက်လာခြင်းကြောင့် လက်ရှိတွင် ကျောင်းသားနှင့် ဝန်ထမ်း ၂,၁၀၀ ကျော်ကို အသွားအလာကန့်သတ်ထားရှိကြောင်း ဒေသတွင်းမီဒီယာက စက်တင်ဘာ ၉ ရက်တွင် သတင်းဖော်ပြခဲ့သည်။ 

“အခု ကျွန်မတို့ လူပေါင်း ၂,၁၁၂ ဦးကို အသွားအလာကန့်သတ်တာ၊ ဒါမှမဟုတ် တစ်ကိုယ်ရေ သီးသန့်ခွဲခြားနေထိုင်တာတွေ လုပ်နေပါတယ်။ အဲဒီထဲက ၁,၉၃၉ ဦးက ကျောင်းသားတွေဖြစ်ပြီး ကျောင်းဝင်းအတွင်းနဲ့ ကျောင်းဝင်းပြင်ပနေထိုင်သူတွေကြားမှာ အညီအမျှနီးပါးဖြစ်အောင် အုပ်စုတွေ ခွဲထားပါတယ်”ဟု ကျောင်းအုပ်ကြီး Donde Plowman က စက်တင်ဘာ ၈ ရက်တွင် တိုက်ရိုက်ထုတ်လွှင့်မှုအတွင်း ပြောကြားခဲ့ကြောင်း CNN သတင်းအရ သိရသည်။ 

“ကျွန်မတို့မှာ ရောဂါဖြစ်ပွားတဲ့ အရေအတွက်တက်လာတာက အလွန်မြန်နေပါတယ်။ ပြီးတော့ ရောဂါကူးစက်မှုလမ်းကြောင်း မြင့်တက်လာတာကို တားဆီးဖို့ ထိရောက်တဲ့ ဆောင်ရွက်ချက်တွေ ပိုပြီးချမှတ်ဖို့ လိုအပ်တယ်” ဟု Plowman ပြောခဲ့သည်။ ယင်းတက္ကသိုလ်တွင် စက်တင်ဘာ ၇ ရက်အထိ COVID-19 ဖြစ်ပွားသူ ၆၀၀ ရှိကြောင်း၊ ကူးစက်မှုများအနက် ၅၉၂ ဦးမှာ ကျောင်းသားများဖြစ်ပြီး ၈ ဦးမှာ ဝန်ထမ်းများဖြစ်ကြောင်း သိရသည်။ 

အမေရိကန်နိုင်ငံ ပြည်နယ် ၅၀ လုံးရှိ ကောလိပ်များနှင့် တက္ကသိုလ်များတွင် လက်ရှိ ကိုရိုနာဗိုင်းရပ်စ်ဖြစ်ပွားသူ ၃၇,၀၀၀ ဦးရှိနေကြောင်း၊ တက္ကသိုလ်နယ်မြေများတွင် လူကိုယ်တိုင်တက်ရောက်ရသော အတန်းများကို ပယ်ဖျက်ထားကြောင်း သိရသည်။  (Xinhua)