ကချင်ပြည်နယ် မိုးညှင်းမြို့နယ်၌ ကျောက်စိမ်းအရိုင်းတုံးဆိုဒ်စုံ(၆၅၀)တုံး(၃၇၈၁)ကီလိုဂရမ်အား သိမ်းဆည်းရမိ

ရန်ကုန်၊ ဒီဇင်ဘာ ၁၉ ရက် (ဆင်ဟွာ)

ကချင်ပြည်နယ် မိုးညှင်းမြို့နယ်၌ ယာဉ်နောက်ခန်းကြမ်းခင်းနှင့် ဘော်ဒီဘေးနံရံတို့တွင် အံဝှက်များပြုလုပ်၍ သယ်ဆောင်လာသည့် ကျောက်စိမ်းအရိုင်းတုံးဆိုဒ်စုံ(၆၅၀)တုံး၊ အခလေးချိန်အားဖြင့် (၃၇၈၁)ကီလိုဂရမ်ရှိသော ကျောက်စိမ်းအရိုင်းတုံးများ ဖမ်းဆီးရမိခဲ့ကြောင်း ပြန်ကြားရေးဝန်ကြီးဌာန မှ သတင်းထုတ်ပြန်သည်။

ဖြစ်စဉ်မှာ ကချင်ပြည်နယ်၊ မိုးညှင်းမြို့နယ်၊ ဟိုပင်နယ်မြေရဲစခန်းမှတပ်ဖွဲ့ဝင်များသည် သက်သေများနှင့်အတူ ဟိုပင်မြို့ဝင်/ထွက် ဘီးခွန် ဂိတ်အနီး “တော်ဝင်’’စက်သုံးဆီ အရောင်းဆိုင်ရှေ့၌ ဒီဇင်ဘာလ ၁၈ ရက်နေ့ ညနေ ၄ နာရီ ၃၀ မိနစ်အချိန် ယာဉ်စည်းကမ်း လမ်းစည်းကမ်း ဆောင်ရွက်ခဲ့စဉ်ဖမ်းဆီးရမိခဲ့ခြင်းဖြစ်သည်။

မိုးကောင်းမြို့၊ ရွာသစ်ရပ်ကွက်နေ သန်းနိုင်ဦး(၂၂)နှစ် မောင်းနှင်ပြီး မန္တလေးတိုင်းဒေသကြီး၊ ပြင်ဦးလွင် မြို့နယ်၊ ဇီးပင်ကြီးကျေးရွာနေ စိုင်းသီဟ(၃၃)နှစ် လိုက်ပါလာသော 1P/×××× ဂိုလ်းဘက် အနီရောင် (၆)ဘီးယာဉ်အား မသင်္ကာဖွယ် တွေ့ ရှိရသဖြင့် ရဲစခန်းသို့ ခေါ်ဆောင်စစ်ဆေးခဲ့ရာ ယာဉ်နောက်ခန်း ကြမ်းခင်းနှင့် ကားဘော်ဒီဘေးနံရံတို့တွင် အံဝှက်များပြုလုပ်၍ သိုဝှက်သယ်ဆောင် လာသည့် ကျောက်စိမ်းအရိုင်းတုံးဆိုဒ်စုံ(၆၅၀)တုံး အလေးချိန် (၃၇၈၁)ကီလိုဂရမ်အား ရှာဖွေတွေ့ရှိ သိမ်းဆည်းရမိခဲ့သောကြောင့် သန်းနိုင်ဦးနှင့် စိုင်းသီဟတို့(၂)ဦးအား ဟိုပင်နယ်မြေရဲစခန်းမှ အမှုဖွင့်အရေးယူထားကြောင်း သတင်းထုတ်ပြန်ချက်ထဲတွင်ပါရှိသည်။ (Xinhua)