Politics, Law & Military
မိုးညှင်းမြို့နယ်တွင် ငွေကျပ် သိန်း တစ်သောင်းကျော် တန်ဖိုးရှိ ဘိန်းဖြူများ ဖမ်းဆီးရမိ
ရန်ကုန်၊ ဒီဇင်ဘာ ၁၃ ရက် (ဆင်ဟွာ)
မိုးညှင်းမြို့နယ်တွင် ငွေကျပ် ၁၂,၅၄၀ သိန်း တန်ဖိုးရှိ ဘိန်းဖြူများ ဖမ်းဆီးရမိခဲ့ကြောင်း ပြည်ထဲရေးဝန်ကြီးဌာန မှ သတင်းထုတ်ပြန်သည်။
ဖြစ်စဉ်မှာ ဒီဇင်ဘာလ ၁၂ ရက်နေ့ ၁၂း၃၀ နာရီ အချိန် မူးယစ်တပ်ဖွဲ့စု(၃)မိုးညှင်းမှတပ်ဖွဲ့ဝင်များ၊ မိုးညှင်းခရိုင်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဧရာဦးစစ်ဆင်ရေး စီမံချက်ဖြင့် မိုးညှင်းမြို့နယ် မိုးညှင်း-ဝှေခါကားလမ်း နမ့်မွန်းကျေးရွာ အေးရိပ်မွန် လက်ဘက်ရည်ဆိုင်အနီးတွင် မူးယစ်ဆေးဝါးများကိုဝယ်လက်အသွင်ယူ၍ စောင့်ဆိုင်းနေစဉ် လှိုင်မြင့် မောင်းနှင်ပြီး ကိုကိုလင်းမောင် လိုက်ပါသည့် မော်တော်ယာဉ်နှင့် ဇင်မင်းဦး မောင်းနှင်ပြီး လှိုင်ဟန်ထွန်းတို့လိုက်ပါသည့် မော်တော် ယာဉ် နှစ်စီးအားစီးနင်းရှာဖွေရာ ဘိန်းဖြူ ဆပ်ပြာခွက် ၂၂၀ ခွက်စီပါ ဆာလာအိတ် ၅ အိတ် အတွင်းမှ ဘိန်းဖြူဆပ်ပြာခွက် ၁၁၀၀ ခွက် (ဘိန်းဖြူ အလေးချိန် ၁၃ ဒသမ ၂ ကီလို ) သိမ်းဆည်း ရမိခဲ့သဖြင့် လှိုင်မြင့် (၃၀)နှစ်၊ ကိုကိုလင်းမောင် (၁၈)နှစ်၊ ဇင်မင်းဦး (၂၂)နှစ် နှင့် လှိုင်ဟန်ထွန်း (၂၁)နှစ် တို့အား မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အရေးယူ ထားကြောင်း သတင်းထုတ်ပြန်ချက်ထဲတွင် ပါရှိသည်။ (Xinhua)