လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီအား ဖွဲ့စည်း

ရန်ကုန်၊ မေ၈ရက် (ဆင်ဟွာ)

မြေသိမ်းမှုပြဿနာများကို လျင်မြန်စွာ ဖြေရှင်း ဆောင်ရွက်နိုင်ရန် လယ်ယာမြေနှင့် အခြားမြေများ သိမ်းဆည်းခြင်းခံရမှုများ ပြန်လည်စိစစ်ရေး ဗဟိုကော်မတီအား ဖွဲ့စည်းလိုက်ကြောင်း နိုင်ငံတော်သမ္မတ မှ အမိန့်ထုတ်ပြန်သည်။

၎င်းကော်မတီတွင် ဥက္ကဋ္ဌအဖြစ် ဒုတိယသမ္မတ (၂) ၊ပြည်ထဲရေးဝန်ကြီးဌာန မှ ပြည်ထောင်စုဝန်ကြီး နှင့် စိုက်ပျိုးရေး မွေးမြူရေးနှင့်ဆည်မြောင်းဝန်ကြီးဌာန မှ ပြည်ထောင်စုဝန်ကြီးတို့ က ဒုတိယဥက္ကဋ္ဌ အဖြစ်ဆောင်ရွက်မည်ဖြစ်ပြီး၊ အဖွဲ့ဝင်များ ဖြင့် အဆိုပါ ကော်မတီအား ဖွဲ့စည်းလိုက်ခြင်းဖြစ်သည်။

အဆိုပါကော်မတီသည် နေပြည်တော်/တိုင်းဒေသကြီး/ပြည်နယ်၊ ခရိုင်၊ မြို့နယ်၊ ရပ်ကွက်/ ကျေးရွာ အုပ်စု လယ်ယာမြေနှင့် အခြားမြေများသိမ်းဆည်းခြင်းခံရမှုများ ပြန်လည်စိစစ်ရေးကော်မတီ အဆင့်ဆင့်ဖွဲ့စည်းခြင်း၊ အစီရင်ခံစာများပါ အကြံပြုတိုက်တွန်း ချက်များနှင့် စပ်လျဉ်း၍ သက်ဆိုင်ရာဝန်ကြီးဌာနများနှင့် နေပြည်တော်/ တိုင်းဒေသကြီး/ပြည်နယ်၊ ခရိုင်၊ မြို့နယ်၊ ရပ်ကွက်/ ကျေးရွာအုပ်စု လယ်ယာမြေနှင့် အခြားမြေများ သိမ်းဆည်းခြင်း ခံရမှုများ ပြန်လည်စိစစ် ရေးကော်မတီအဆင့်ဆင့်က ဥပဒေ၊ လုပ်ထုံးလုပ်နည်းနှင့် အညီဖြေရှင်း ဆောင်ရွက်နိုင်ရန် ဆောင်ရွက်ပေးရန်ဖြစ်ကြောင်း သိရသည်။

ပြည်ထောင်စုလွှတ်တော်သို့ တင်သွင်းခဲ့သည့် လယ်ယာမြေနှင့်အခြားမြေများ သိမ်းဆည်းခံရမှုကြောင့် ပြည်သူများနစ်နာမှုမရှိစေရေးအတွက် စုံစမ်းရေး ကော်မရှင်၏ အစီရင်ခံစာပါ မြေသိမ်းမှုများနှင့်ပတ်သက်၍ သက်ဆိုင်ရာဝန်ကြီး ဌာန၊ နေပြည်တော် ကောင်စီ သို့မဟုတ် တိုင်းဒေသကြီး/ ပြည်နယ်အစိုးရအဖွဲ့များ၏ ဖြေရှင်း ဆောင်ရွက်မှုများကို ကြီးကြပ်ဆောင်ရွက်ရန် ၊သက်ဆိုင်ရာဝန်ကြီးဌာနများ၊ ကုမ္ပဏီများ၊ ပုဂ္ဂလိကလုပ်ငန်းများက ပြန်လည် စွန့်လွှတ်သည့် လယ်ယာမြေများကို မူလလုပ်ကိုင်ခဲ့သော သက်ဆိုင်သူများသို့ လုပ်ထုံးလုပ်နည်းနှင့်အညီ အမြန်ပေးအပ်နိုင်ရေးဆောင်ရွက်ရန်၊ မြေယာအငြင်းပွားမှုများနှင့်ပတ်သက်၍ နေပြည်တော်/ တိုင်းဒေသကြီး/ ပြည်နယ်၊ ခရိုင်၊ မြို့နယ်၊ ရပ်ကွက်/ ကျေးရွာအုပ်စုလယ်ယာမြေနှင့် အခြားမြေများ သိမ်းဆည်းခြင်း ရမှုများ ပြန်လည်စိစစ်ရေးကော်မတီအဆင့်ဆင့်က ဖြေရှင်းဆောင်ရွက်ရာတွင် မြေကို စီမံခန့်ခွဲလျက်ရှိသော ဝန်ကြီးဌာနများ၊ နေပြည်တော်၊ ရန်ကုန်၊ မန္တလေးစည်ပင် သာယာရေးကော်မတီများက ကျင့်သုံး လျက်ရှိသည့် မြေစီမံခန့်ခွဲမှုဆိုင်ရာ တည်ဆဲ ဥပဒေများနှင့်အညီ ဖြေရှင်း ဆောင်ရွက်ခြင်းရှိ/ မရှိစိစစ်ခြင်းများကိုဆောင်ရွက် ရမည်ဖြစ်ကြောင်း သိရသည်။ (Xinhua)