“လန်ချန်း-မဲခေါင်ဒေသတွင်း နည်းပညာလွှဲပြောင်းပေးခြင်းဆိုင်ရာ စီမံခန့်ခွဲမှုစနစ်နှင့် MSMEs ဆန်းသစ်တီထွင်မှု ဖွံ့ဖြိုးရေး မူဝါဒများဖလှယ်ခြင်း အလုပ်ရုံဆွေးနွေးပွဲ” ဖွင့်ပွဲအခမ်းအနားသို့ သံမှူးကြီး Dr. Zheng Zhihong တက်ရောက်

ရန်ကုန်၊ စက်တင်ဘာ ၇ ရက် (ဆင်ဟွာ)
“လန်ချန်း-မဲခေါင်ဒေသတွင်း နည်းပညာလွှဲပြောင်းပေးခြင်းဆိုင်ရာ စီမံခန့်ခွဲမှုစနစ်နှင့် MSMEs ဆန်းသစ်တီထွင်မှု ဖွံ့ဖြိုးရေး မူဝါဒများဖလှယ်ခြင်း အလုပ်ရုံဆွေးနွေးပွဲ” ဖွင့်ပွဲအခမ်းအနားသို့ သံမှူးကြီး Dr. Zheng Zhihong တက်ရောက်ခဲ့ကြောင်း မြန်မာနိုင်ငံဆိုင်ရာ တရုတ်သံရုံး၏ စက်တက်ဘာ ၇ ရက် သတင်းထုတ်ပြန်ချက်အရ သိရသည်။

မြန်မာနိုင်ငံဆိုင်ရာ တရုတ်သံရုံးမှ သံမှူးကြီး Dr. Zheng Zhihong သည် စက်တင်ဘာလ ၆ ရက်တွင် မြန်မာနိုင်ငံ သိပ္ပံနှင့်နည်းပညာဝန်ကြီးဌာနမှ ကြီးမှူးကျင်းပသည့် “လန်ချန်း-မဲခေါင်ဒေသတွင်း နည်းပညာလွှဲပြောင်းပေးခြင်းဆိုင်ရာ စီမံခန့်ခွဲမှုစနစ်နှင့် MSMEs ဆန်းသစ်တီထွင်မှု ဖွံ့ဖြိုးရေး မူဝါဒများဖလှယ်ခြင်း အလုပ်ရုံဆွေးနွေးပွဲ” ဖွင့်ပွဲအခမ်းအနားသို့ တက်ရောက်ခဲ့ကြောင်း သိရသည်။ သံမှူးကြီး Dr. Zheng Zhihong က နည်းပညာလွှဲပြောင်းပေးမှုသည် သိပ္ပံနည်းပညာ ဆန်းသစ်တီထွင်မှုနှင့် စီးပွားရေးဖွံ့ဖြိုးတိုးတက်မှုပေါင်းစပ်ခြင်း၏ အဓိကအကြောင်းအရာ၊ ဆန်းသစ်တီထွင်ခြင်းဖြင့် ဖွံ့ဖြိုးတိုးတက်မှုဖော်ဆောင်ခြင်း၏ အရေးပါအစိတ်အပိုင်း၊ သိပ္ပံနည်းပညာဆန်းသစ်တီထွင်ခြင်း ထိရောက်မှုအားမြှင့်တင်သည့် အရေးကြီးအချက်ဖြစ်ကြောင်း၊ တရုတ်နိုင်ငံမှ အရင်းအနှီးထည့်ဝင်၍ထူထောင်ထားသည့် လန်ချန်း-မဲခေါင်ပူးပေါင်းဆောင်ရွက်မှုအထူးရန်ပုံငွေသည် ယနေ့တိုင် လန်ချန်း-မဲခေါင် အဖွဲ့ဝင်နိုင်ငံ ၆ နိုင်ငံတွင် စီမံကိန်းပေါင်း ၇၇၉ ခုကို ပံ့ပိုးကူညီပေးခဲ့သဖြင့် လန်ချန်း-မဲခေါင်အဖွဲ့ဝင်နိုင်ငံများ စီးပွားရေးဖွံ့ဖြိုးတိုးတက်မှုအား ထိရောက်စွာတိုးတက်လာစေပြီး ပြည်သူများအကျိုးစီးပွားကောင်းမွန်လာစေကာ ဒေသတွင်းတည်ငြိမ်ရေးနှင့် စည်ပင်ဖွံ့ဖြိုးတိုးတက်မှုကို တိုးမြှင့်လိုက်ကြောင်း၊ လန်ချန်း-မဲခေါင်နိုင်ငံအသီးသီးမှ ပညာရှင်များက ယခုအကြိမ်ဆွေးနွေးပွဲမှတစ်ဆင့် အပြန်အလှန် နားလည်သိရှိမှုကို မြှင့်တင်ကာ လန်ချန်း-မဲခေါင်နည်းပညာလွှဲပြောင်းပေးရေးကဏ္ဍတွင် ပူးပေါင်းဆောင်ရွက်မှုကို နက်နက်ရှိုင်းရှိုင်းဆောင်ရွက်ရန် မျှော်လင့်ပါကြောင်း၊ လန်ချန်း-မဲခေါင်ပူးပေါင်းဆောင်ရွက်မှုသည် မြန်မာနိုင်ငံက လန်ချန်း-မဲခေါင်မိတ်ဖက်များနှင့် နည်းပညာလွှဲပြောင်းမှု၊ MSMEs များ ဆန်းသစ်တီထွင်ဖွံ့ဖြိုးတိုးတက်မှု စသည့်ကဏ္ဍများတွင် ပူးပေါင်းဆောင်ရွက်မှုကို ဆက်လက်ပံ့ပိုးပေးကာ ပိုမိုရင်းနှီးသည့် လန်ချန်း-မဲခေါင်နိုင်ငံများ အေးအတူပူအမျှအသိုက်အဝန်းအား အတူတည်ဆောက်သွားမည်ဖြစ်ကြောင်း ပြောကြားခဲ့သည်။

ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းက လန်ချန်း-မဲခေါင်ပူးပေါင်းဆောင်ရွက်မှုသည် မြစ်ဝှမ်းဒေသနိုင်ငံများ နယ်စပ်ဖြတ်ကျော်ကုန်သွယ်ရေး၊ ထုတ်လုပ်မှုစွမ်းရည်၊ အားသာချက်များ အပြန်အလှန်ဖြည့်စွက်ပေးရေးနှင့် MSMEs ဖွံ့ဖြိုးတိုးတက်မှု၏ အရေးပါတွန်းအားဖြစ်ကြောင်း၊ လန်ချန်း-မဲခေါင်ဒေသသည် သယံဇာတပေါကြွယ်ဝပြီး အာရှနှင့်ကမ္ဘာတစ်ဝန်းတွင် အလားအလာအရှိဆုံးဒေသများအနက်တစ်ခုဖြစ်ကြောင်း၊ မဲခေါင်နိုင်ငံများ၏ ဖွံ့ဖြိုးတိုးတက်မှုနှင့် စီးပွားရေးသည်များစွာ နောက်ကျကျန်နေသည့်အတွက် ဒေသတွင်းရင်းနှီးမြှုပ်နှံမှုပတ်ဝန်းကျင် ကောင်းမွန်လာစေရန်ဆောင်ရွက်၍ နိုင်ငံခြားရင်းနှီးမြှုပ်နှံမှုများကို ဆွဲဆောင်ကာ အခြေခံအဆောက်အအုံတိုးတက်လာစေရန် ဆောင်ရွက်ရမည်ဖြစ်ကြောင်း၊ လန်ချန်း-မဲခေါင်ပူးပေါင်းဆောင်ရွက်မှုသည် ဒေသတွင်းအင်အားများကိုစုစည်းကာ အကျိုးသက်ရောက်မှုကြီးမားပြီး ဒေသတွင်းပြည်သူများအတွက် ပိုမိုကောင်းမွန်သောအနာဂတ် ဖန်တီးပေးမည်ဖြစ်ကြောင်း၊ မြန်မာနိုင်ငံသည် လန်ချန်း-မဲခေါင်ပူးပေါင်းဆောင်ရွက်မှုတွင် ဆက်လက် တက်တက်ကြွကြွပါဝင်ကာ အပြန်အလှန်ယုံကြည်၍ အကျိုးဖြစ်ထွန်းသော လန်ချန်း-မဲခေါင်သံယောဇဉ်ကို မြှင့်တင်သွားမည်ဖြစ်ကြောင်း၊ လန်ချန်း-မဲခေါင်ဒေသ ငြိမ်းချမ်းရေး၊ စည်ပင်ဝပြောရေးနှင့် ရေရှည်တည်တံ့ခိုင်မြဲသော ဖွံ့ဖြိုးတိုးတက်မှုအတွက် ပံ့ပိုးပေးပါသော တရုတ်နိုင်ငံအစိုးရအား ကျေးဇူးအထူးတင်ရှိပါကြောင်း ပြောကြားခဲ့သည်။

အဆိုပါအလုပ်ရုံဆွေးနွေးပွဲကို လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေ ပံ့ပိုးမှုဖြင့် ၂ ရက်ကြာကျင်းပသွားမည်ဖြစ်ကာ တရုတ်၊ ကမ္ဘောဒီးယား၊ လာအို၊ မြန်မာ၊ ထိုင်းနိုင်ငံမှပညာရှင်များတက်ရောက်ကြမည်ဖြစ်ပြီး သီလဝါအထူးစီးပွားရေးဇုန်သို့ သွားရောက်လေ့လာသည့်လှုပ်ရှားမှုကိုလည်း စီစဉ်ထားကြောင်း မြန်မာနိုင်ငံဆိုင်ရာ တရုတ်သံရုံး၏ သတင်းထုတ်ပြန်ချက်အရ သိရသည်။

အဆိုပါအခမ်းအနားသို့ မြန်မာနိုင်ငံ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်း၊ သိပ္ပံနှင့်နည်းပညာဝန်ကြီးဌာန အမြဲတမ်းအတွင်းဝန် ဦးစိုင်းကျော်နိုင်ဦး၊ နိုင်ငံခြားရေးဝန်ကြီးဌာန ကိုယ်စားလှယ်နှင့် မြန်မာနိုင်ငံဆိုင်ရာ လာအို၊ ကမ္ဘောဒီးယား၊ ဗီယက်နမ်သံတမန်များ တက်ရောက်ခဲ့ကြကြောင်း သိရသည်။ (Xinhua)