မြန်မာနိုင်ငံရှိ အဆင့်မြင့်ဘေထုပ်ဈေးက ငွေကြေးသက်သက်သာသာဖြင့် ဖက်ရှင်ကျလှပမှုကိုပေး

ရန်ကုန်၊ အောက်တိုဘာ ၁၁ ရက် (ဆင်ဟွာ)

မြန်မာနိုင်ငံ၏ စီးပွားရေးအချက်အချာမြို့ဖြစ်သော ရန်ကုန်ရှိ ကြည့်မြင်တိုင် အဆင့်မြင့်ဘေထုပ်ဈေးက ကုန်ဈေးနှုန်းကြီးမြင့်ခိုက် ဈေးနှုန်းအသင့်အတင့် ဖက်ရှင်ဒီဇိုင်းရှာဖွေသူများဖြင့် စည်ကားလျက်ရှိသည်။
ကြည့်မြင်တိုင်ညဈေးဟု လူသိများသည့် အဆိုပါဈေးတွင် ရွေးချယ်စရာအမျိုးအစား စုံလင်လှသော အဆင့်မြင့်ဘေထုပ်ထည်များက ဈေးနှုန်းချိုသာပြီး အရည်အသွေးကောင်းမွန် ဒီဇိုင်းပုံစံကျကျအဝတ်အထည် ရှာဖွေသူများအဖို့ စိတ်ဝင်စားရာနေရာတစ်ခုပင်ဖြစ်သည်။
ပုံစံကျပြီး ချုပ်ရိုးချုပ်သားခိုင်ခံ့ခြင်းကြောင့် လူကြိုက်များသည့် နိုင်ငံခြားဖြစ်ထုတ်ကုန်များက ဈေးနှုန်းသင့်တင့်စွာ ဘေထုပ်ဖက်ရှင် ဝတ်ဆင်မည့်သူများကို ဆွဲဆောင်လျက်ရှိကြောင်း ဘေထုပ်ဖက်ရှင်ဆိုင်ရှင်များက ပြောသည်။
အဝတ်အထည် ပစ္စည်းအသစ်ဈေးနှုန်းများက ရံဖန်ရံခါ ပျမ်းမျှဝင်ငွေထက်ပင် ကျော်လွန်နေခြင်းကြောင့် ဝတ်စားဆင်ယင်မှုပုံစံနှင့် ဘတ်ဂျက်ချိန်ညှိနေရသူများအတွက်မူ ဘေထုပ်အဝတ်အထည်များက လက်တွေ့ဖြေရှင်းနည်းတစ်ခုလည်း ဖြစ်သည်။
“အသစ်တွေကျတော့ ဈေးကမတတ်နိုင်ဘူး။ ဒီနေ့တော့ ဂျင်းဘောင်းဘီတွေ့မလား၊ လွယ်အိတ်တွေ အကြိုက်တွေ့မလားဆိုပြီး လာကြည့်တာပါ။ ဒီပစ္စည်းတွေက သုံးပြီးသားဆိုတော့ ဈေးသက်သာလို့ ပိုက်ဆံချွေတာတဲ့အနေနဲ့ရောပေါ့။ ဖောရိန်းမိတ် (foreign-made) တွေဆိုတော့ စိတ်ကြိုက်ရှာလို့လည်းရ၊ ဝတ်ရတာ fit ဖြစ်ပြီးတော့ ကွာလတီကလည်း ကောင်းတယ်လေ” ဟု ကြည့်မြင်တိုင်ညဈေးသို့ ပုံမှန်လာရောက်ဝယ်ယူသူ အသက် ၆၂ နှစ်အရွယ် ဦးဝင်းနိုင်က အောက်တိုဘာ ၈ ရက်တွင် ပြောခဲ့သည်။
ဘေထုပ်ဖက်ရှင်ရောင်းချနေသည်မှာ ခြောက်နှစ်ခန့်ရှိပြီဖြစ်သော အသက် ၃၅ နှစ်အရွယ် ကိုမိုးဝင်းက ကုန်ပစ္စည်းဝယ်ယူမှုနှင့်ပတ်သက်၍ ယခုလိုပြောပြခဲ့သည်။ “ကျွန်တော့်ဆိုင်က အထည်တွေကို ဂျပန်၊ ထိုင်းနဲ့ ဥရောပနိုင်ငံတွေကနေမှာတယ် အမျိုးမျိုးပေါ့။ ဒီဇိုင်းကာလာတွေကတော့ အရမ်းများတယ်”
“ကျွန်တော့်ဆီမှာ ဝယ်သူအများစုက မိန်းကလေးတွေပါ။ ယောကျ်ားလေးဝတ်တွေထက် မိန်းကလေးဝတ်တွေပိုများတယ်” ဟု ကိုမိုးဝင်းကပြောသည်။
ဘေထုပ်ဆိုင်ဖွင့်ထားသည်မှာ နှစ်ချီရှိပြီဖြစ်ကာ ဝန်ထမ်း ၂၀ ခန့်ဖြင့် လုပ်ကိုင်နေသော အသက် ၂၈ နှစ်အရွယ် မငုဝါက ထိုစီးပွားရေးနှင့် ပတ်သက်၍ အခြေခိုင်နေပြီဖြစ်သည်။ “ကျွန်မမိဘတွေကလည်း ဒီလိုဘေထုပ်ရောင်းတာပဲ။ အခု ကျွန်မတို့ညီအစ်မတွေက ဒီဆိုင်လုပ်ငန်းကိုလုပ်ကိုင်နေတာပါ” ဟု မငုဝါက ဂုဏ်ယူစွာပြောခဲ့သည်။
“ကျွန်မဆိုင်မှာ တစ်ထည်ကို ကျပ် ၅၀၀ ကစပြီးရောင်းပေးတယ်။ ဘောင်းဘီတွေ၊ ရှပ်အင်္ကျီတွေ၊ ရုံးတက်ဝတ်စုံတွေ အစုံပဲ” ဟု မငုဝါက ဖြည့်စွက်ပြောခဲ့သည်။
ဝတ်ဆင်သူများရှိနေသရွေ့ ဘေထုပ်လုပ်ငန်းက ဆက်လက်တိုးတက်များပြားလျက်ရှိသလို ယင်းလုပ်ငန်း၏ အသွင်ပြောင်းလဲလာပုံကိုလည်း မငုဝါက ရှင်းပြခဲ့သည်။ “ဒီလုပ်ငန်းလုပ်နေတဲ့နှစ်တွေအတွင်း အပြောင်းအလဲတွေအများကြီး ကြုံတွေ့ခဲ့ရတယ်။ အရင်တုန်းကဆို ကျွန်မတို့ ဒိုင်ကဝယ်တဲ့အခါ ဈေးနည်းနည်းပဲပေးရတယ်။ အခုဆိုရင်တော့ သိသိသာသာကြီးကို များလာတာ” ဟု ၎င်းက ဆိုသည်။
“တချို့ဖောက်သည်တွေဆိုရင် အထည်တွေ ကျွန်မတို့ဆီက ဝယ်ပြီးပြန်ရောင်းကြတာ။ ကျွန်မတို့က အွန်လိုင်းကနေလည်း ရောင်းတယ်” ဟု မငုဝါက ပြောခဲ့သည်။
ကြည့်မြင်တိုင်ဘေထုပ်ဈေးသို့ လာရောက်ဝယ်ယူသူများအနက် အသက် ၄၈ နှစ်အရွယ် မငယ်လည်း အပါအဝင်ဖြစ်သည်။ “ကျွန်မ စက်ရုံတွေမှာပြန်ရောင်းဖို့ ယောကျ်ားဝတ်၊ မိန်းမဝတ် ဘောင်းဘီတွေ၊ အင်္ကျီတွေ လာဝယ်တာပါ” ဟု မငယ်က ပြောသည်။
“ဒီအလုပ်ကို လုပ်ဖြစ်တာတော့ တစ်လလောက်ပဲရှိပါသေးတယ်။ စိတ်ဝင်စားလို့ လုပ်ဖြစ်သွားတာပါ။ ဒီအထည်တွေက ဝင်ငွေနည်းတဲ့သူတွေအတွက် ဈေးသက်သက်သာသာနဲ့ ဝတ်လို့ရတယ်လေ” ဟု မငယ်က ဘေထုပ်ထည်အရောင်းအဝယ်လုပ်ဖြစ်ပုံကို ပြောပြခဲ့သည်။
အဝတ်အထည် အသစ်အတွက် သုံးစွဲရသောငွေကြေးနှိုင်းယှဉ်ပါက ဘေထုပ်ထည် နှစ်ထည်၊ သုံးထည် ဝယ်ယူနိုင်ကြောင်း ဘေထုပ်ဖက်ရှင်ဆိုင် အမြောက်အမြားဖွင့်လှစ်ထားသည့် ကြည့်မြင်တိုင်ညဈေးရှိ ဘေထုပ်ထည်ရောင်းသူများက ဆိုသည်။
ထိုဈေးတွင်ပင် လာရောက်ဝယ်ယူသူတစ်ဦးဖြစ်သော အသက် ၃၂ နှစ်အရွယ် ကိုအောင်ကလည်း ၎င်း၏အတွေ့အကြုံကို ယခုလိုပြောပြခဲ့သည်။ “ကျွန်တော် အရင်လက တစ်ပတ်ရစ်ဖိနပ်လေးတစ်ရံ ဝယ်ခဲ့တယ်။ အဲဒီတံဆိပ်နဲ့အသစ်ဆိုရင် ကျွန်တော့်အတွက် ဈေးအရမ်းကြီးတယ်။ လျှပ်စစ်ပစ္စည်းလေးတွေ ဘေထုပ်ထည်တွေက ပိုက်ဆံချွေတာရာလည်းရောက်တယ်လေ” ဟု ၎င်းက ရှင်းပြသည်။
“ကုန်ဈေးနှုန်းတွေက မြင့်တက်နေတာဆိုတော့ တစ်ပတ်ရစ်ပစ္စည်းလေးတွေ ဝယ်တာက ကျွန်တော့်အတွက်တော့ ပိုက်ဆံကုန်သက်သာစေတယ်” ဟု ကိုအောင်က ဖြည့်စွက်ပြောခဲ့သည်။ (Xinhua)