Environment, Disasters & Accidents
ရန်ကုန်-မော်လမြိုင်ကားလမ်းမကြီးပေါ်၌ ယာဉ်နှစ်စီးတိုက်မိပြီး လူ ၇ ဦးသေဆုံး
ရန်ကုန်၊ ဖေဖော်ဝါရီ ၁၅ ရက် (ဆင်ဟွာ)
မွန်ပြည်နယ်၊ ရန်ကုန်-မော်လမြိုင်ကားလမ်းမကြီး၊ မိုင်တိုင်အမှတ် (၁၃၄/၇) နှင့် (၁၃၄/၈) ကြားတွင် ယနေ့ (ဖေဖော်ဝါရီ ၁၅ ရက်) နေ့လယ် ၁၁ နာရီခွဲခန့်က ယာဉ်နှစ်စီးတိုက်မိပြီး လူ ၇ ဦးသေဆုံးခဲ့ကြောင်း မီးသတ်ဦးစီးဌာနက ထုတ်ပြန်သော သတင်းအရ သိရသည်။သထုံမြို့ဘက်မှ ဘီးလင်းမြို့ဘက်သို့မောင်းနှင်လာသော FOTON အမျိုးအစား(အနီရောင်) (၂၂)ဘီး ကုန်တင်ယာဉ်နှင့် ဘီးလင်းဘက်မှ သထုံဘက်သို့ မောင်းနှင်လာသော Probox အမျိုးအစား (အဖြူရောင်) ယာဉ်တို့ မျက်နှာချင်းဆိုင်တိုက်မိမှုဖြစ်ပွါးခဲ့ပြီး Probox ယာဉ်ပေါ်ပါ လူ ၇ ဦး သေဆုံးခဲ့ကြောင်း သိရသည်။
“ ၇ ယောက်လုံး နေရာတင် ပွဲချင်းပြီးပါပဲ ၊ ကားကလည်း တစ်စီးလုံး ကြေမွပျက်စီးသွားတယ်၊ လူမူကယ်ဆယ်ရေးတွေဆို ရုပ်အလောင်းတွေကို ကားထဲက ခက်ခက်ခဲခဲ ထုတ်ရတယ်” ဟု မွန်ပြည်နယ်ယာဉ်ထိန်းရဲတပ်ဖွဲ့မှ တာဝန်ရှိသူတစ်ဦးက ပြောသည်။အဆိုပါယာဉ်တိုက်မှုကြောင့် Probox ယာဉ်ပေါ်ပါ ခရီးသည် ကျား(၅)ဦး၊ မ(၂)ဦး စုစုပေါင်း(၇)ဦး (သေဆုံး) အား ပီတိနှလုံသားလူမှုကူညီရေးအသင်းယာဉ်ဖြင့် သိမ်ဆိပ်တိုက်နယ်ဆေးရုံသို့ ပို့ဆောင်ပေးခဲ့ကြောင်း သိရသည်။ (Xinhua)