ထရမ့် နှင့် အာဘေး တို့ ဖုန်းဖြင့် ဆက်သွယ်၍ မြောက်ကိုရီးယားအရေးဆွေးနွေး

ဝါရှင်တန်၊ သြဂုတ် ၂၃ (ဆင်ဟွာ)

အမေရိကန်နိုင်ငံ သမ္မတ အိမ်ဖြူတော် က အမေရိကန်နိုင်ငံသမ္မတ ဒေါ်နယ်ထရမ့်သည် ဂျပန်နိုင်ငံ ဝန်ကြီးချုပ် ရှင်ဇိုအာဘေး နှင့် သြဂုတ် ၂၂ ရက်တွင် တယ်လီဖုန်းဖြင့် ဆက်သွယ်ဆွေးနွေးခဲ့ပြီး မြောက်ကိုရီးယားအရေး နှင့် လာမည့် ကုလသမဂ္ဂအထွေထွေညီလာခံ၌ နှစ်နိုင်ငံ တွေ့ဆုံမှုများ နှင့် ပတ်သက်၍ ဆွေးနွေးခဲ့ကြောင်း သြဂုတ် ၂၂ ရက်တွင် ထုတ်ပြန်ခဲ့သည်။

အိမ်ဖြူတော် ပြောရေးဆိုခွင့်ရှိသူ Sarah Sanders က ထရမ့် နှင့် အာဘေး တို့သည် မြောက်ကိုရီးယားနိုင်ငံအပေါ် ပြင်းထန်သည့် ပိတ်ပင်တားမြစ်မှုများ ဆက်လက်ဆောင်ရွက်သွားရန် တယ်လီဖုန်းဖြင့် ဆက်သွယ်ပြောဆိုမှုအတွင်း သဘောတူခဲ့ကြောင်း သတင်းစာရှင်းလင်းပွဲတစ်ခု၌ ပြောကြားခဲ့သည်။

အမေရိကန် နှင့် ကုလသမဂ္ဂ က မြောက်ကိုရီးယားအပေါ် ချမှတ်ထားသော ပိတ်ပင်တားမြစ်မှုများကို ချိုးဖောက်မှုဖြင့် အဖွဲ့အစည်း ၂ခု နှင့် သင်္ဘော ၆စီး အား ပိတ်ပင်တားမြစ်ခဲ့ပြီး ၎င်းတို့သည် မြောက်ကိုရီးယားအလံတင် သင်္ဘောများ နှင့် ရေနံထုတ်ကုန်များအား ကူးပြောင်းပို့ဆောင်ပေးမှုတွင် ပါဝင်ကြောင်း အမေရိကန်နိုင်ငံ ဘဏ္ဍာရေးဝန်ကြီးဌာန က ပြစ်တင်စွပ်စွဲထားကာ ယင်းလုပ်ဆောင်မှုမျိုးကို ကုလသမဂ္ဂ လုံခြုံရေးကောင်စီ က တားမြစ်ထားကြောင်းသိရသည်။

မြောက်ကိုရီးယားနိုင်ငံက နျူကလီးယားလက်နက်အား နောက်ဆုံးတွင် အပြည့်အဝ စွန့်လွှတ်နိုင်သည်အထိ ပိတ်ပင်တားမြစ်မှုများကို ချိုးဖောက်မှုကြောင့်ရရှိလာမည့် အကျိုးဆက်များသည် ဆက်လက်တည်ရှိနေဦးမည် ဖြစ်ကြောင်း ဘဏ္ဍာရေးဝန်ကြီး Steven Mnuchin ကပြောကြားခဲ့သည်။

ထရမ့် က မြောက်ကိုရီးယားခေါင်းဆောင် ကင်ဂျုံအန်း နှင့် တွေ့ဆုံနိုင်ခြေများပြားကြောင်း သြဂုတ် ၂၀ ရက်တွင် ပြောကြားခဲ့ပြီးနောက် ယင်း ဆောင်ရွက်ချက်များ ထွက်ပေါ်လာခြင်းဖြစ်သည်။

၎င်းက မြောက်ကိုရီးယားနိုင်ငံအနေဖြင့် နျူကလီးယားလက်နက် ကင်းစင်ရေးအတွက် အထူးဆောင်ရွက်ချက်များကို ရှေ့ဆက်လုပ်ဆောင်သွားမည်ဟု ယုံကြည်ပါကြောင်း ပြောကြားခဲ့သည်။

စင်ကာပူနိုင်ငံတွင် ဇွန်လ ၁၂ ရက် ကပြုလုပ်ခဲ့သော ထရမ့်-ကင် တွေ့ဆုံပွဲပြီးနောက် ထုတ်ပြန်သော ပူးတွဲထုတ်ပြန်ချက် ၌ ကင် က ကိုရီးယားကျွန်းဆွယ် အတွင်း ပြီးပြည့်စုံသော နျူကလီးယားကင်းစင်မှု ဖြစ်ပေါ်လာစေရန် ၎င်း၏ ရည်ရွယ်ချက်ကို မယိမ်းမယိုင်ဆောင်ရွက်သွားမည်ဖြစ်ကြောင်း ပြောကြားခဲ့ရာ ထရမ့်က မြောက်ကိုရီးယားနိုင်ငံအတွက် လုံခြုံရေးဆိုင်ရာအာမခံချက် ကို ဖြည့်ဆည်းပေးသွားမည်ဖြစ်ကြောင်း ပြောကြားခဲ့သည်။

နှစ်နိုင်ငံခေါင်းဆောင်များသည် အမေရိကန်-မြောက်ကိုရီးယား ဆက်ဆံရေးအသစ်တည်ဆောက်ရန် နှင့် ကိုရီးယားကျွန်းဆွယ်အတွင်း တည်ငြိမ်သော ဒေသတစ်ခုတည်ဆောက်ရန် အတွက်လည်း သဘောတူညီခဲ့ကြောင်း သိရသည်။ (Xinhua)