Environment, Disasters & Accidents
ဖားကန့်ဒေသ၌ ရေမဆေးကျောက် လုပ်သား ၁၀၀ ခန့် အလုပ် လုပ်နေချိန် စွန့်ပစ်မြေဇာပုံ နှစ်ပုံ ပြိုကျ
ရန်ကုန်၊ ဇန်နဝါရီ ၂၆ ရက် (ဆင်ဟွာ)
ကချင်ပြည်နယ် ဖားကန့်မြို့နယ် လုံးခင်း ကျေးရွာအုပ်စု အနီးတွင် ရေမဆေးကျောက် ရှာဖွေနေသော လုပ်သား ၁၀၀ ခန့် အလုပ် လုပ်နေချိန်၌ စွန့်ပစ် မြေဇာပုံ နှစ်ပုံဆက်တိုက် ပြိုကျခဲ့ကြာင်း ဖားကန့်တွင် မြေဇာပုံ ပြိုကျရာ၌ ကယ်ဆယ်ရေး လုပ်ကိုင်သူများထံမှ သိရသည်။
ဆိပ်မူ (ဆိုင်းတောင် ) ကျေးရွာအုပ်စု ဥရုချောင်း အနောက်ဘက်ကမ်းရှိ ဆွတ်အောင်ကျေးရွာနှင့် ရှမ်းစုကျေးရွာကြားရှိ တစ်သုံးလုံး ကုမ္မဏီစွန့်ပစ်မြေဇာပုံသည် ဇန်နဝါရီလ ၂၅ ရက် ညနေ ၃ နာရီ ရေမဆေးကျောက် လုပ်သားများ အလုပ်လုပ်ကိုင်နေချိန် ပြိုကျခဲ့ကြောင်း အဆိုပါ မြေဇာပုံပြိုကျရာမှ လွတ်မြောက်လာသူ တစ်ဦးက ပြောကြားသည်။
“ မြေဇာက နှစ်ပုံပြိုသလိုဖြစ်သွားတာဗျ ။ တစ်သုံးလုံးကမြေဇာက ပြိုကျပြီး အောင်ဟိန်းမင်း မြေဇာပုံကို ခါးဖြတ်ရိုက်သလိုဖြစ်ပြီး အောင်ဟိန်းမင်းမြေဇာပုံလည်း ထပ်ပြိုကျပြီး နှစ်ပုံပေါင်း လူတစ်ရာလောက်ပါနိုင်တယ်” ဟု ၎င်းက ဆိုသည်။
ယင်း မြေဇာပုံပြိုကျမှုကို ကယ်ဆယ်ရေးပြုလုပ်ရာ၌ အလောင်း သုံးလောင်း ရှာဖွေတွေ့ရှိရကြောင်း နိုင်ငံပိုင် သတင်းစာတွင် ဖော်ပြထားသည်။
အဆိုပါ မြေဇာပုံပြိုကျမှုကြောင့် လူသေဆုံးမှုနှင့် ပျောက်ဆုံးစာရင်းကို ဖားကန့်ဒေသ အာဏာပိုင်များထံ အတည်ပြုရာတွင် ဖားကန့်ရဲစခန်းက အရာရှိတစ်ဦးက “ အလုပ်လုပ်ချိန်ကြီး ပြိုကျတယ်ဆိုတာ သိရတယ်၊ ကယ်ဆယ်ရေးတွေလည်း လုပ်နေတယ်၊ အသေအပျောက် သေချာပြောလို့မရသေးဘူး”ဟု ပြောသည်။
ဖားကန့်ဒေသ၌ စက်ယန္တရားကြီးများသုံးပြီး ကျောက်တူူးနေသည့် ကျောက်တူးဖော်ရေး လုပ်ငန်းများက စွန့်ပစ်ထားသည့် မြေစာပုံပြိုကျမှုသည် ၂၀၁၅ ခုနှစ်အတွင်း ၉ ကြိမ်ရှိပြီး လူ၂၀၀ ခန့် သေဆုံးခဲ့သည်။ (Xinhua)