ကရင်ပြည်နယ် ကမမောင်းမြို့ပေါ်ရပ်ကွက်များသို့ ၂၄ နာရီ လျှပ်စစ်ဓာတ်အား စတင်ဖြန့်ပေး

ရန်ကုန်၊ ဇူလိုင် ၁၉ ရက် (ဆင်ဟွာ)

ကရင်ပြည်နယ်၊ ဖာပွန်ခရိုင်၊ ကမမောင်းမြို့တွင် ပြည်နယ်အစိုးရ၏ ၂၀၁၈ ခုနှစ် မီနီဘတ်ဂျက်ဖြင့် ဆောင်ရွက်ပေးလျက်ရှိသော (၃၃ ကေဗွီ) ဓာတ်အားခွဲရုံမှ ၁၁ ကေဗွီ၊ ၄၀၀ဗို့ ဓာတ်အားလိုင်းနှင့် ၁၁/ဝ.၄ ကေဗွီ ထရန်စဖော်များသို့ ဇူလိုင်လ ၁၈ ရက်နေ့ ည(၇)နာရီမှစတင်၍ မြို့ပေါ်ရပ်ကွက်များသို့(၂၄)နာရီ လျှပ်စစ်ဓာတ်အား စတင်ဖြန့်ဝေပေးနေပြီ ဖြစ်ကြောင်း ပြန်ကြားရေးဝန်ကြီးဌာန မှ ယနေ့သတင်းထုတ်ပြန်သည်။

ယခင်က ကမမောင်းမြို့ပေါ်၌ ဒီဇယ်အင်ဂျင် ၃၀၀ ကေဗွီဖြင့် တစ်ညလျှင်(၃)နာရီသာ လျှပ်စစ်မီး ရှိခဲ့ပြီး ယခုအခါ အိမ်သုံးလျှပ်စစ်မီတာ တပ်ဆင်ပြီးစီးထားသော အိမ်များမှာ(၂၄)နာရီ လျှပ်စစ်မီးရရှိနေကြပြီ ဖြစ်သည်။ ၂၀၁၈-၂၀၁၉ ဘဏ္ဍာနှစ်တွင် (၁၁- ကေဗွီ)ဓာတ်အားလိုင်း များဖြင့် ပတ်ဝန်းကျင်ကျေးရွာ များသို့ လျှပ်စစ်ဓာတ်အားဖြန့်ဖြူးပေးမည်ဖြစ်ကြောင်း သိရသည်။

ဆက်လက်ပြီး လျှပ်စစ်နှင့်စွမ်းအင်ဝန်ကြီးဌာန၊ လျှပ်စစ်ဓာတ်အားဖြန့်ဖြူရေး လုပ်ငန်း၊ ကမမောင်းမြို့ လျှပ်စစ်အင်ဂျင်နီယာရုံးမှ “အလင်းရောင်စီမံချက်” One Stop Service(OSS)စနစ်ဖြင့် လျှပ်စစ်မီတာ လျှောက်ထားကြသော အိမ်ထောင်စုများအား လျှပ်စစ်ကျွမ်းကျင်ဝန်ထမ်းများက အိမ်သုံးမီတာများ ကို နေ့ချင်းပြီး လိုက်လံတပ်ဆင်ပေးလျက်ရှိကြောင်း သတင်းထုတ်ပြန်ချက်ထဲတွင်ပါရှိသည်။ (Xinhua)