Environment, Disasters & Accidents
ဟားခါးမြို့ ဟားခါးထာရ်(၂) ရပ်ကွက်၌ မြေအက်ကွဲမှုဖြစ်ပွား
ရန်ကုန်၊ ဇွန် ၁၃ ရက် (ဆင်ဟွာ)
ချင်းပြည်နယ် ဟားခါးမြို့ ဟားခါးထာရ်(၂) ရပ်ကွက်၌ မိုးအဆက်မပြတ်ရွာသွန်း မှုကြောင့် မြေအက်ကွဲမှုဖြစ်ပွားခဲ့ကြောင်း ပြန်ကြားရေးဝန်ကြီးဌာန မှ ယနေ့သတင်းထုတ်ပြန်သည်။
ထိုသို့မြေအက်ကွဲမှုဖြစ်ပွားခဲ့သည့်အတွက် ဟားခါးမြို့၊ ဟားခါးထာရ်(၂)ရပ်ကွက်ရှိ ဦးချိမ်းခါရ် နေအိမ်(လူမနေသေး)၊ ဦးကြိုက်လိန်း နေအိမ်(လူမနေသေး)၊ ဒေါ်ဇိန်ပဲင်း တို့၏ လူမနေသေးသည့် နေအိမ်များနှင့် ဟားခါး – ဖလမ်းလမ်းရှိ ဦးလျန်ကျင်း၏ လူနေအိမ်တို့တွင် ဇွန် ၁၂ ရက်နေ့က မြေအက်ကွဲမှု ဖြစ်ပွားခဲ့ပြီး ဦးလျန်ကျင်း၏ လူနေအိမ်မှာ အန္တရာယ် ရှိနိုင်သည့်အတွက် အဆိုပါ နေအိမ်တွင် အိမ်ငှား နေထိုင်သူ ဦးဗန်အုပ်နှင့် မိသားစုဝင် (၆)ဦး တို့အား နီးစပ်ရာ ဆွေမျိုး နေအိမ်သို့ တာဝန်ရှိသူများက ပြောင်းရွှေ့နေရာချထားပေးခဲ့ကြောင်း သိရသည်။
အလားတူ ဟားခါး- နှီာရ်လောန်းလမ်း (၁)မိုင်ခန့်တွင် မိုးသည်းထန်စွာ ရွာသွန်းမှုကြောင့် လမ်းအထက်ပိုင်း ပေ(၁၀၀)ခန့် မှ မြေစာများ ပြိုကျ၍ လျှပ်စစ်မီးတိုင်(၂) တိုင် ပြိုလဲပြီး လမ်းပိတ်ဆို့မှု ဖြစ်ပွားရာ တာဝန်ရှိသူများက သွားရောက်၍ ဝိုင်းဝန်း ရှင်းလင်းဆောင်ရွက်ခဲ့ကြောင်း သတင်းထုတ်ပြန်ချက် ထဲတွင်ပါရှိသည်။ (Xinhua)