ပြည်လမ်းမပေါ်တွင် YBS ယာဉ် မီးလောင်မှုဖြစ်ပွား

ရန်ကုန်၊ ဇူလိုင် ၂၇ ရက် (ဆင်ဟွာ)

၂၀၂၃ ခုနှစ် ဇူလိုင် ၂၇ ရက် နံနက် ၉ နာရီ ၅၅ မိနစ်ဝန်းကျင်က ရန်ကုန်တိုင်းဒေသကြီး၊ စမ်းချောင်းမြို့နယ်၊ ပြည်လမ်းမပေါ်ရှိ မဟာမြိုင် မှတ်တိုင်အနီးတွင် YBS ယာဉ် ၁ စီး မီးလောင်မှုဖြစ်ပွားခဲ့ကြောင်း သိရသည်။အဆိုပါ ယာဉ်မီးလောင်မှုကို ကျောက်တံတားမြို့နယ်မီးသတ်စခန်းနှင့် စမ်းချောင်းမြို့နယ်မီးသတ်စခန်းတို့မှ မီးသတ်ယာဉ်များ ထွက်ခွာငြှိမ်းသတ်ခဲ့ရပြီး နံနက် ၁၀ နာရီခန့်တွင် မီးငြိမ်းခဲ့ကြောင်း မြန်မာနိုင်ငံ မီးသတ်ဦးစီးဌာနမှ ထုတ်ပြန်ချက်အရ သိရသည်။ အဆိုပါ YBS ယာဉ် မီးလောင်မှု ဖြစ်စဉ်မှာ ကားအနောက်ပိုင်းတွင် ထိုင်နေသည့် ခရီးသည်များက အနောက်အင်ဂျင်ခန်း အပိုင်းက မီးခိုးများ စတင်ထွက်သည်ကို တွေ့ရှိခဲ့ကာ ခရီးသည်များ အားလုံးဘေးလွတ်ရာကို ဆင်းခဲ့ရကြောင်း၊ အဆိုပါယာဉ်ပေါ်တွင် မီးသတ်ဆေးဘူး မပါရှိသလို ယာဉ်မောင်းအနေဖြင့် ကြိုးစားငြှိမ်းသတ်နေခဲ့သည်ကို တွေ့ရကြောင်း အဆိုပါမော်တော်ယာဉ်ပေါ် လိုက်ပါစီးနင်းခဲ့သူတစ်ဦး၏ ပြန်လည်ပြောပြချက်အရ သိရသည်။ အဆိုပါ ဖြစ်စဉ်ကြောင့် မြေနီကုန်း ကုန်းတံတားပေါ်နှင့် အနီးတစ်ဝိုက်တွင် ယာဉ်ကြော ပိတ်ဆို့မှုများ ဖြစ်ပွားခဲ့ကြောင်း သိရသည်။ (Xinhua)