CB ဘဏ် မှ မြန်မာနိုင်ငံ တွင် ပထမဆုံး ခရက်ဒစ်ကဒ် စတင် ထုတ်ဝေမည် ဟုဆို

ရန်ကုန်၊ သြဂုတ်၂၈ ရက် (ဆင်ဟွာ)

CB ဘဏ် မှ မြန်မာနိုင်ငံ တွင် ပထမဆုံး ခရက်ဒစ်ကဒ် ( Credit Card) စတင် ထုတ်ဝေမည် ဖြစ်ကြောင်း CB ဘဏ် မှ အမှုဆောင် ဒုတိယဥက္ကဌ ဦးကျော်လင်း က ယနေ့ သတင်းစာ ရှင်းလင်းပွဲ တွင် ပြောကြားသည်။

အဆိုပါ ခရက်ဒစ်ကဒ် များကို Classic Card , Gold Card , Platinum Card စသဖြင့် အမျိုးအစား (၃) မျိုးဖြင့် ထုတ်ဝေ မည် ဖြစ်ကြောင်း သိရသည်။

ခရက်ဒစ်ကဒ် ကို အသုံးပြုလို သူများ အနေဖြင့် အသက် (၂၁) နှစ် ပြည့်ပြီးသူ တိုင်း CB ဘဏ် (ရုံးချုပ်) နှင့် CB ဘဏ် ၏ ဘဏ်ခွဲ များ အားလုံး တွင် လျှောက်ထား နိုင်ကြောင်း သိရသည်။

ဦးကျော်လင်းက “ ကျွန်တော်တို့ ခရက်ဒစ်ကဒ် ကို MPU အမှတ်တံဆိပ် ပါရှိသော နေရာတိုင်း မှာ အသုံးပြု နိုင်ပါတယ်။ အဆင့်မြင့် ကုန်တိုက်များ ၊ဈေးဆိုင်များ ၊အဝတ်အထည် စတိုးဆိုင်များ ၊ ဆေး ပစ္စည်းဆိုင်များ ၊ ဓာတ်ဆီဆိုင်များ ၊ စားသောက်ဆိုင် များ နှင့် Hotel များ တွင် သာမက ပြည်တွင်း e-Commerce Website တွေမှာပါ သုံးစွဲနိုင်မှာ ဖြစ်ပါတယ်’’ ဟုပြောသည်။

အဆိုပါ ခရက်ဒစ်ကဒ် အား နေရာပေါင်း ၅၀၀၀ တွင် အသုံးပြုနိုင်မည် ဖြစ်ကြောင်း၊ ခရက်ဒစ်ကတ် ကို လျှောက်ထားသည့် အခါ စစ်ဆေးရန် အချိန် ၂ ပတ် မှ သုံး ပတ် ကြာမြင့် နိုင်ကြောင်း သိရသည်။

အကြွေးဝယ်ကဒ် လျှောက်ထားသူ အတွက် အနိမ့်ဆုံး လစာဝင်ငွေ ပေါ်တွင်မူတည် ၍ စီးပွားရေး ခိုင်မာမှု၊ ထောက်ခံပေးမည့် ပုဂ္ဂိုလ် ၂ ဦး အပေါ် မူတည်၍ ဝင်ငွေလစာ ၏ ၁ ဆ (သို့မဟုတ်)၊ ၂ ဆ အထိ Credit limit အမြင့်ဆုံး ရရှိမည် ဖြစ်သည်။ Classic Card လျှောက်ထားသူ သည် ကျပ်သိန်း ၅၀ အထိ ရရှိမည် ဖြစ်သည်။

ဦးကျော်လင်းက “ CB MPU Credit Card က သုံးစွဲတဲ့ ပမာဏ အတိုင်း အတိုး ကင်းလွတ်ခွင့် ကာလ ကို အနည်းဆုံး ၁၅ ရက် မှ အများဆုံး ၄၅ ရက် အထိ ရရှိမှာပါ။ အတိုးကင်းလွတ်ခွင့် ကာလ ကျော်လွန်ရင် တော့ အတိုး ၁၃ ရာခိုင်နှုန်း ပေးရမှာ ဖြစ်တယ်’’ ဟု ပြောသည်။
အဆိုပါ ခရက်ဒစ်ကဒ် ၏ သက်တမ်း မှာ ၅ နှစ် အထိ သုံးစွဲနိုင်မည် ဖြစ်ပြီး နိုင်ငံတကာ တွင် အသုံးပြု လျှက် ရှိသော ခရက်ဒစ်ကဒ် များ ကဲ့သို့ပင် ကြိုတင် ငွေထုတ်ယူ သုံးစွဲပြီး နောက်မှ ပြန်လည် ပေးသွင်းနိုင် ကြောင်း သိရသည်။ (Xinhua)