အီရန် က နပန်းပြိုင်ပွဲများတွင် အမေရိကန်အား ဝင်ရောက်ယှဉ်ပြိုင်ခွင့်ပေးတော့မည်မဟုတ်

တီဟီရန်၊ ဖေဖော်ဝါရီ ၄ ရက် (ဆင်ဟွာ)

အီရန်နိုင်ငံ နိုင်ငံခြားရေးဝန်ကြီးဋ္ဌာန က နိုင်ငံအတွင်း ကျင်းပမည့် ကမ္ဘာ့ဖလားနပန်းပြိုင်ပွဲများတွင် အမေရိကန်အလွတ်တန်းအမျိုးသား နပန်းအဖွဲ့အား ဝင်ရောက်ယှဉ်ပြိုင်ခွင့်မပေးရန် ဆုံးဖြတ်ခဲ့ကြောင်း နိုင်ငံပိုင် IRNA သတင်းဋ္ဌာနက ဖေဖော်ဝါရီ ၃ ရက်တွင်ဖော်ပြခဲ့သည်။

နိုင်ငံခြားရေးဝန်ကြီးဋ္ဌာနပြောရေးဆိုခွင့်ရှိသူ Bahram Qasemi က ယင်းအကြောင်းအရာအား အထူးကော်မတီတစ်ရပ်ဖွဲ့စည်း၍ ဆွေးနွေးခဲ့ပြီး နောက်ဆုံးမှာ အမေရိကန်နပန်းအဖွဲ့ ပြိုင်ပွဲဝင်ရန် အီရန်နိုင်ငံသို့ လာရောက်ခြင်းကို ပိတ်ပင်သွားရန် ဆုံးဖြတ်ခဲ့ကြောင်း IRNA သတင်းဋ္ဌာနသို့ပြောကြားခဲ့သည်။

မကြာသေးမီက အီရန်နိုင်ငံသားများအပေါ် တားမြစ်ချက်များ ချမှတ်ခဲ့သည့် အမေရိကန်နိုင်ငံ၏ လုပ်ဆောင်ချက်ကြောင့် နိုင်ငံခြားရေးဝန်ကြီးဋ္ဌာနက ယင်းဆုံးဖြတ်ချက်ကို ချခဲ့ခြင်းဖြစ်ကြောင်း Qasemi ၏ ပြောကြားချက်ကို ကိုးကား၍ဖော်ပြခဲ့သည်။

အမေရိကန်နိုင်ငံက အီရန်နိုင်ငံအပါအဝင် မူဆလင် ၇နိုင်ငံမှ နိုင်ငံသားများအား ပြည်ဝင်ခွင့် ပိတ်လိုက်ခြင်းကို တုံ့ပြန်သည့်အနေဖြင့် အီရန်နိုင်ငံက ဇန်နဝါရီ ၃၁ ရက်တွင် အမေရိကန်နိုင်ငံသားများအား ပြည်ဝင်ခွင့်ဗီဇာ ထုတ်ပေးခြင်းကို ရပ်ဆိုင်းခဲ့ကြောင်းသိရသည်။

တီဟီရန်မြို့တွင် ၂၀၁၇ခုနှစ် ကမ္ဘာ့ဖလားအမျိုးသားနပန်းပြိုင်ပွဲများကို ဖေဖော်ဝါရီ ၁၇ ရက် မှ ၁၈ ရက်အထိ လက်ခံကျင်းပသွားမည်ဖြစ်ကြောင်း သိရသည်။ (Xinhua)