တရုတ်နိုင်ငံတွင် HIV ဝေဒနာရှင်တစ်ဦး အား ပထမဆုံး နှလုံးခွဲစိတ်မှု အောင်မြင်စွာလုပ်ဆောင်နိုင်ခဲ့

ရှန်ဟိုင်း၊ ဖေဖော်ဝါရီ ၁၀ ရက် (ဆင်ဟွာ)

တရုတ်နိုင်ငံတွင် ပထမဆုံး နှလုံးခွဲစိတ်မှု ခံယူခဲ့သော HIV ဝေဒနာရှင်တစ်ဦးသည် ဖေဖော်ဝါရီ ၉ ရက်တွင် ၎င်းဆေးကုသမှုခံယူခဲ့သည့် ရှန်ဟိုင်း ဆေးရုံမှ ဆင်းလာပြီဖြစ်ကြောင်း သိရသည်။

AIDS ရောဂါရှာဖွေရေး နှင့် ကုသရေးဆိုင်ရာ ရှန်ဟိုင်းစင်တာ ဒါရိုက်တာ လုဟောင်ကျိုး က ယခုခွဲစိတ်မှုသည် တရုတ်နိုင်ငံတွင် HIV ဝေဒနာရှင်တစ်ဦးအား ပထမဆုံး အောင်မြင်စွာ နှလုံးခွဲစိတ်နိုင်မှုတစ်ခုဖြစ်ကြောင်း ပြောကြားခဲ့သည်။အသက် ၅၈နှစ်အရွယ် အမျိုးသားဝေဒနာရှင်သည် နှလုံးသွေးကြောကျဉ်းဝေဒနာခံစားခဲ့ရပြီး ခွဲစိတ်ကုသမှသာလျှင် ရောဂါသက်သာလာနိုင်မည်ဖြစ်ကြောင်း သိရသည်။

ဖူတန်တက္ကသိုလ်လက်အောက်ရှိ ကျုံးရှန်းဆေးရုံမှ ခွဲစိတ်ဆရာဝန်တစ်ဦးဖြစ်သည့် စန်းရှောင်နင် က လူနာအား ဇန်နဝါရီ ၆ရက်တွင် ခွဲစိတ်မှုပြုလုပ်ပြီးနောက် HIV နှင့်ဆက်စပ်သည့် နောက်ဆက်တွဲရောဂါများကို ကုသရန် ပြောင်းရွှေ့ပေးခဲ့ကြောင်း ပြောကြားခဲ့သည်။စန်း က “HIV ဝေဒနာရှင်တွေကို ခွဲစိတ်တဲ့အခါ ရောဂါကူးစက်နိုင်တဲ့ အန္တရာယ်ရှိပေမယ့် ခွဲစိတ်ကုသရေးအဖွဲ့ က ဒါကို မကြောက်ရွံ့ခဲ့ပါဘူး။ ဒါဟာ ကျွန်တော်တို့ပြုလုပ်ရမဲ့ တာဝန်ပါ” ဟုပြောကြားခဲ့သည်။ရှန်ဟိုင်းအများပြည်သူကျန်းမားရေးစင်တာ ဒါရိုက်တာ ကျူးတုန်းယု က HIV/AIDS ရောဂါဝေဒနာခံစားနေရသည့် လူနာများအား ခွဲစိတ်ကုသရန် ဆေးရုံများက မကြာခဏ ငြင်းဆန်ကြသော်လည်း စင်တာ၏ AIDS ရောဂါရှာဖွေရေး နှင့် ကုသရေးစင်တာ သည် ယင်းအခက်အခဲကို ဖြေရှင်းနိုင်ရန်အတွက် ၇နှစ်ကြာ ကြိုးစားအားထုတ်ခဲ့ရကြောင်း ပြောကြားခဲ့သည်။စင်တာသည် အရိုး၊အာရုံကြော၊ ကင်ဆာ မှ စ၍ မျက်လုံးဆိုင်ရာ ခွဲစိတ်မှုများလိုအပ်နေသည့် AIDS ဝေဒနာရှင်များကို ခွဲစိတ်ကုသမှုခံယူနိုင်ရန် ကူညီပေးနေကြောင်း သိရသည်။ (Xinhua)