Environment, Disasters & Accidents
ဖားကန့် မြေစာပုံပြိုကျမှုကြောင့် သေဆုံးသူ ၁၇ ဦးရှိလာ
ရန်ကုန်၊ မေ ၅ ရက် (ဆင်ဟွာ)
ကချင်ပြည်နယ်၊ ဖားကန့်မြို့နယ် ဆိပ်မူကျေးရွာအုပ်စု ဝှေခါရွာတွင် မေလ ၄ရက်နေ့ နံနက်ပိုင်းက မြေစာပုံပြိုကျမှုကြောင့် လက်ရှိတွင် သေဆုံးသူ ၁၇ဦး၊ ဒဏ်ရာ ရရှိသူ ၁၁ ဦး ရှာဖွေတွေ့ ရှိထားကြောင်း ပြည်ထဲရေးဝန်ကြီးဌာန ၏ ယနေ့ထုတ်ပြန်သော သတင်းအရသိရသည်။
မေလ ၄ ရက်နေ့တွင် အလျားပေ (၁၀၀)၊ ထု(၂၀)ပေခန့်ရှိသော မြေစာပုံသည် အောက်ဘက် ပေ (၂၀၀) ခန့်သို့ ပြိုကျခဲ့ရာ ၁၂ ဦးသေဆုံးခဲ့ပြီး ဒဏ်ရာ ရရှိ ခဲ့သူ (၈) ဦးကို ရှာဖွေ တွေ့ရှိခဲ့သဖြင့် လူမှုကူညီရေး အသင်းများမှ ယာဉ် များဖြင့် ဖားကန့် ဆေးရုံကြီးသို့ ပို့ဆောင်ပေးခဲ့ကြောင်း ပြန်ကြားရေးဝန်ကြီးဌာန မှ မေလ ၄ ရက်နေ့တွင် ကနဦး သတင်းထုတ်ပြန်ခဲ့သည်။
၂၀၁၈ ခုနှစ်၊ မေလ ၄ ရက်နေ့ ၀၅း၀၀နာရီ အချိန်တွင် ဖားကန့်မြို့နယ် ကျောက်မျက်ရွှေပြည် ကုမ္ပဏီ လုပ်ကွက်အမှတ်(၅၅၈)၌ မြေစာပုံပြိုကျခဲ့ရာ ရေမဆေးကျောက်ရှာဖွေသူ စောဝင်းကို (၃၇)နှစ် အပါအဝင် အမျိုးသား ၁၄ ဦးတို့တွင် ကျောကုန်း/ယာရင်ညွန့် ပွန်းပဲ့ ဖူးရောင်ဒဏ်ရာများဖြင့် သေဆုံးခဲ့ကာ ဇော်မင်းအောင်(၂၅)နှစ် ပါ အမျိုးသား ၁၁ ဦးတို့တွင် ဖူးရောင်ပေါက်ပြဲ ဒဏ်ရာများရရှိခဲ့ပြီး ၁၆း၄၅ နာရီ အချိန် တွင် အမျိုးသား ၃ဦး၏ အလောင်းများအား ထပ်မံတွေ့ရှိခဲ့သဖြင့် စုစုပေါင်း သေဆုံးသူ အမျိုးသား ၁၇ဦး၊ ဒဏ်ရာရ အမျိုးသား ၁၁ ဦးဖြစ်ကြောင်း သတင်းထုတ်ပြန်ချက်ထဲတွင် ပါရှိသည်။ (Xinhua)