Politics, Law & Military
ကချင်ပြည်နယ်၊ မိုးကောင်းမြို့နယ် မရမ်ကထောင်ပူးပေါင်းစစ်ဆေးရေးဂိတ်၌ တရားမဝင်တင်ဆောင်လာသည့် ကျောက်စိမ်းအရိုင်းတုံး အရွယ်စုံ ပိဿာ ၁၀၀ကျော်အား သိမ်းဆည်းရမိ
ရန်ကုန်၊ နိုဝင်ဘာ ၂၃ ရက် (ဆင်ဟွာ)
ကချင်ပြည်နယ်၊ မိုးကောင်းမြို့နယ် မရမ်ကထောင်ပူးပေါင်းစစ်ဆေးရေးဂိတ်၌ တရားမဝင်တင်ဆောင်လာသည့် ကျောက်စိမ်းအရိုင်းတုံး အရွယ်စုံ ပိဿာ ၁၀၀ကျော်အား သိမ်းဆည်းရမိခဲ့ကြောင်း သိရသည်။
ဖြစ်စဉ်မှာ ကချင်ပြည်နယ်၊ နမ္မတီးနယ်မြေရဲစခန်းမှ ဒုတိယရဲအုပ်သိန်းစိုး ဦးစီးတပ်ဖွဲ့ဝင်များသည် မရမ်ကထောင်ပူးပေါင်းစစ်ဆေးဂိတ်မှ တာဝန်ရှိသူများနှင့်အတူ ယာဉ်အဝင်အထွက်များ စစ်ဆေးဆောင်ရွက်နေစဉ် ဖားကန့်ဘက်မှ မြစ်ကြီးနားမြို့ အောင်နန်းရပ်ကွက်နေ အောင်ကျော်ဦး(ခ)သူရ(၃၂)နှစ် မောင်းနှင်လာသည့် CANDA-125 မော်တော်ဆိုင်ကယ်အား ရပ်တန့်စစ်ဆေးရှာဖွေရာ ဆိုင်ကယ်ပေါ်တွင် ပီနံအိတ်နှစ်လုံးနှင့် တရားမဝင်တင်ဆောင်လာသည့် ကျောက်စိမ်းအရိုင်းတုံး အရွယ်စုံ ၃၂ တုံး အလေးချိန် ၁၀၃ ပိဿာအား လည်းကောင်း၊ပြင်ဦးလွင်မြို့နယ် ရွာသာယာကျေးရွာနေ စိုးလှိုင်(၃၂)နှစ် မောင်းနှင်လာသည့် ယာဉ်အမှတ် 9M/—- အံစာတုံးအမျိုးအစား မော်တော်ယာဉ်ပေါ်မှ ကျောက်စိမ်းအရိုင်းတုံး ဆိုဒ်အသေးအရွယ်စုံ ၅၂ တုံး အလေးချိန် ၁၃ ပိဿာအား လည်းကောင်း သိမ်းဆည်းရမိခဲ့ကြောင်း သိရသည်။
ဖြစ်စဉ်နှင့်ပတ်သက်၍ တရားမဝင်ကျောက်စိမ်းအရိုင်းတုံးများ သယ်ဆောင်လာသူ အောင်ကျော်ဦး(ခ)သူရနှင့် စိုးလှိုင်တို့နှစ်ဦးအား နမ္မတီးနယ်မြေရဲစခန်းတွင် ကျောက်မျက်ဥပဒေပုဒ်မ-၄၂(က)ဖြင့် အမှုဖွင့်အရေးယူထားကြောင်း ကြေးမုံသတင်းတွင်ပါရှိသည်။ (Xinhua)