ကမ္ဘာ့အမြင့်ဆုံး ဧဝရတ် တောင်ထိပ်သို့ပထမဆုံး အဖြစ် မြန်မာ တောင်တက် အဖွဲ့ဝင် နှစ်ဦး ရောက်ရှိပြီး နိုင်ငံတော် အလံ စိုက်ထူနိုင်

ရန်ကုန် ၊ မေ ၁၉ ရက် (ဆင်ဟွာ)

နီပေါနိုင်ငံရှိ ကမ္ဘာ့အမြင့်ဆုံး ဧဝရတ် တောင်ထိပ်သို့မြန်မာတောင်တက် အဖွဲ့ဝင် နှစ်ဦးသည် ပထမဆုံး အဖြစ် ယနေ့မေလ ၁၉ ရက် ၊ နံနက်ပိုင်းတွင် တက်ရောက်နိုင်ခဲ့ပြီး မြန်မာနိုင်ငံ အလံကို အောင်မြင်စွာ စိုက်ထူ နိုင်ခဲ့ကြောင်း မြန်မာနိုင်ငံ ခြေလျင်နှင့် တောင်တက် အသင်းမှ သိရသည်။

မြန်မာတောင်တက် အဖွဲ့ဝင် နှစ်ဦး ဖြစ်သည့် ကိုပြည့်ဖြိုးအောင်နှင့် ကိုဝင်းကိုကိုတို့သည် ဧဝရတ် တောင်ထိပ်သို့ တက်ရောက်ရန် မေလ ၁၈ ရက် ၊ ဒေသ စံတော်ချိန် ည ၉ နာရီ အချိန်တွင် အမြင့်ပေ ၂၆,၀၀၀ ကျော်တွင် ရှိသော Camp 4 မှ စတင် ထွက်ခွာခဲ့ပြီး နံနက် ၇ နာရီ ၇ မိနစ် အချိန်တွင် တောင်ထိပ်သို့ ရောက်ရှိခဲ့ခြင်း ဖြစ်ကြောင်း သိရသည်။

နီပေါနိုင်ငံရှိ ကမ္ဘာ့အမြင့်ဆုံး ဧဝရတ် တောင်ထိပ်သို့ တက်ရောက်နေသော မြန်မာတောင်တက်အဖွဲ့သား တစ်ဦးအားတွေ့ရစဉ် (ဓာတ်ပုံ- Myanmar Flag on Everest)

နီပေါနိုင်ငံရှိ ကမ္ဘာ့အမြင့်ဆုံး ဧဝရတ် တောင်ထိပ်သို့ တက်ရောက်သည့် လမ်းကြောင်းပြ မြေပုံအား တွေ့ရစဉ် (ဓာတ်ပုံ- Myanmar Flag on Everest)

မြန်မာနိုင်ငံမှ အဖွဲ့ဝင် သုံးဦး ပါဝင်သော မြန်မာ တောင်တက် အဖွဲ့သည် ကမ္ဘာ့အမြင့်ဆုံး ဧဝရတ် တောင်ထိပ်သို့ တက်ရောက်ရန် မတ်လကုန်ပိုင်းတွင် မြန်မာနိုင်ငံမှ စတင် ထွက်ခွာ သွားရောက်ခဲ့ပြီး ယခု မေလ ၁၉ ရက်တွင် ဧဝရတ် တောင်ထိပ်သို့ရောက်ရှိခဲ့ခြင်း ဖြစ်ကြောင်း သိရသည်။ (Xinhua)