အာဖဂန်နိုင်ငံ ကဘူးလ်မြို့ရှိ မင်္ဂလာခန်းမတစ်ခု၌ ပေါက်ကွဲမှုဖြစ်ပွား ၊ လူအများအပြားသေဆုံး

ကဘူးလ်၊သြဂုတ် ၁၈ ရက်(ဆင်ဟွာ)

အာဖဂန်နစ္စတန်နိုင်ငံ ကဘူးလ်မြို့ရှိ မင်္ဂလာခန်းမတစ်ခု၌ သြဂုတ် ၁၇ ရက်ညပိုင်းက ပြင်းထန်သောပေါက်ကွဲမှုတစ်ခု ဖြစ်ပွားရာ လူပေါင်းများစွာ သေဆုံးခဲ့ရကြောင်း ဒေသတွင်းမီဒီယာက ဖော်ပြခဲ့သည်။

အတည်မပြုနိုင်သည့် သတင်းများအရ သေဆုံးသူအရေအတွက်မှာ ၃ဝ ကျော်ရှိကြောင်း နှင့် ဒဏ်ရာရသူ ၉ဝ ကျော်ရှိကြောင်း သိရသည်။

အဆိုပါပေါက်ကွဲမှုသည် ကဘူးလ်မြို့လယ်ရှိ Shahr-e-Dubai မင်္ဂလာခန်းမဆောင်၌ ဒေသစံတော်ချိန် ည ၁ဝ နာရီ ၄ဝ မိနစ်တွင်ဖြစ်ပွားခဲ့ကြောင်း အာဖဂန်ပြည်ထဲရေးဝန်ကြီးဌာနပြောရေးဆိုခွင့်ရှိသူ Nasrat Rahimit က Tolonews ပြည်တွင်းသတင်းဌာနသို့ပြောကြားခဲ့သည်။

အချင်းဖြစ်ပွားချိန်တွင် မင်္ဂလာခန်းမအတွင်း၌ လူ ဒါဇင်ပေါင်းများစွာ ရောက်ရှိနေကြောင်း နှင့် သေဆုံးသူ အရေအတွက်မှာ ဆက်လက်မြင့်တက်နိုင်ဖွယ်ရှိကြောင်း Tolonews သတင်းဌာနက ဆိုသည်။

အာဖဂန်ချစ်သူစုံတွဲတစ်တွဲ၏ လက်ထပ်မင်္ဂလာပွဲ ကျင်းပရာ အဆိုပါ မင်္ဂလာခန်းမသို့ ဧည့်ပရိသတ်များစွာ လာရောက်ခဲ့ကြောင်း နှင့် အခမ်းအနားကျင်းပနေစဉ် ပေါက်ကွဲမှုဖြစ်ပွားခဲ့ခြင်းဖြစ်ကြောင်း မျက်မြင်သက်သေများ၏ ပြောကြားချက်အရ သိရသည်။(Xinhua)