ရှာဖွေတွေ့ရှိထားသော လေယာဉ် အစိတ်အပိုင်းများသည် MH 370 ၏ အစိတ်အပိုင်းများ ဖြစ်နိုင်ကြောင်း သြစတြေးလျ အစိုးရ ပြောကြား

မဲလ်ဘုန်း၊ ဇူလိုင် ၃၀ ရက် (ဆင်ဟွာ)

လာရီယူနီယံ ကျွန်း၌ ရှာဖွေ တွေ့ရှိထားရသော လေယာဉ်အပျက်အစီး အစိတ်အပိုင်းများအား ဆန်းစစ်နေပြီး ထိုအစိတ်အပိုင်းများသည် အိန္ဒိယ သမုဒ္ဒရာ တောင်ဘက်၌ ပျောက်ဆုံးခဲ့သော MH 370 ၏ အစိတ်အပိုင်းများ ဖြစ်နိုင်ကြောင်း သြစတြေးလျ အစိုးရက ကြာသပတေးနေ့တွင် ပြောကြားလိုက်ပါသည်။

“သြစတြေးလျ ကလဲ အဲဒီ လေယာဉ်အပျက်အစီး အပိုင်းအစတွေနဲ့ ပတ်သက်ပြီး အလေးထား စောင့်ကြည့်နေ ပါတယ်” ဟု သြစတြေးလျ ဒုတိယ ဝန်ကြီးချုပ် ဝါရန် တရက်စ် က သတင်းထုတ်ပြန်ချက် တွင် ပြောပါသည်။

သူ၏ အဆိုအရ အဆိုပါ အပျက်အစီး အကျိုးအပဲ့ များရဲ့ မူလရင်းမြစ်ကို ပညာရှင်များက လေ့လာဆန်းစစ်နေ လျက် ရှိပြီး မလေးရှား နိုင်ငံက စုံစမ်း ရှာဖွေမှုအတွက် ဘိုးအင်း ကုမ္ပဏီမှ ထောက်ပံ့ ကူညီထားကြောင်း သိရပါသည်။

အဆိုပါ အစိတ်အပိုင်းများသည် MH 370 ၏ အစိတ်အပိုင်းများ ဖြစ်ခဲ့မည် ဆိုလျှင် လေ့လာသူများ၏ အဆိုများနှင့် ကိုက်ညီနိုင်မည် ဖြစ်ကြောင်း သတင်းထုတ်ပြန်ချက်က ဖော်ပြထားသည်။ အဆိုပါ လေယာဉ်ပျက် အပိုင်းအစများအား ဗုဒ္ဓဟူးနေ့က ရှာဖွေတွေ့ရှိခဲ့ခြင်း ဖြစ်သည်။

လေကြောင်းဆိုင်ရာ လုံခြုံရေး ကျွမ်းကျင်သူများ၏ အဆိုအရ လေယာဉ်ပျက် အပိုင်းအစများသည် ဘိုးအင်း 777 လေယာဉ်၏ အစိတ်အပိုင်းများနှင့် မယုံကြည်နိုင်လောက်အောင် ဆင်တူနေကြောင်း မီဒီယာများတွင် ဖော်ပြထားသည်။ (Xinhua)