မက္ကဆီကိုနိုင်ငံရဟတ်ယာဉ်ပျက်ကျမှုတွင် ပြည်နယ်အုပ်ချုပ်ရေးမှူးဟောင်းများ သေဆုံး

မက္ကဆီကို၊ဒီဇင်ဘာ ၂၅ ရက်(ဆင်ဟွာ)

မက္ကဆီကိုနိုင်ငံအလယ်ပိုင်း Puebla ပြည်နယ်အုပ်ချုပ်ရေးမှူး မာသာအီရီကာအလွန်ဆို(Martha Erika Alonso) နှင့် ၎င်း၏ခင်ပွန်းဖြစ်သူ ယခင်ပြည်နယ်အုပ်ချုပ်ရေးမှူးဟောင်း ရာဖေးလ်မိုရီနိုဗယ်လီ(Rafael Moreno Valle) တို့သည် ဒီဇင်ဘာ ၂၄ ရက်က ရဟတ်ယာဉ်ပျက်ကျမှုအတွင်း သေဆုံးသွားခဲ့ကြကြောင်း အမျိုးသားလှုပ်ရှားမှုပါတီ(PAN) အကြီးအကဲ မာကိုကော်တီစ်(Marko Cortes) က အတည်ပြုပြောကြားခဲ့သည်။

အလွန်ဆို နှင့် ၎င်း၏ခင်ပွန်း လက်ရှိ အထက်လွှတ်တော်အမတ်တစ်ဦးဖြစ်သူ ရာဖေးလ်တို့နှစ်ဦးစလုံး သည် PAN ပါတီဝင်များဖြစ်ကြောင်း သိရသည်။

“ အီရီကာအလွန်ဆိုနဲ့ခင်ပွန်း ရာဖေးလ်တို့နှစ်ဦးအပါအဝင် အခြားအသက်ဆုံးရှုံးခဲ့ရသူများအတွက် အလွန်ထိခိုက်ကြေကွဲရပါတယ်” ဟု ကော်တီစ်က တွစ်တာတွင် ရေးသားဖော်ပြခဲ့သည်။

မက္ကဆီကိုနိုင်ငံသမ္မတ လိုပက်ဇ်အော့ရာဒေါ(Andres Manuel Lopez Obrador) ကလည်း ရဟတ်ယာဉ်ပျက်ကျမှုဖြစ်စဉ်ကို စုံစမ်းသွားရန် နှင့် ၎င်းအနေဖြင့် ဝမ်းနည်းကြေကွဲရပါကြောင်း တွစ်တာတွင်ရေးသားခဲ့သည်။

“ တာဝန်ရှိသူအနေနဲ့ဖြစ်စဉ်ကို စုံစမ်းစစ်ဆေးဖို့ကျွန်တော်ကတိပြုပါတယ်။ ဘာတွေဖြစ်ခဲ့လဲဆိုတာကို အမှန်ပြောနိုင်ဖို့လုပ်ဆောင်သွားမှာပါ” ဟု လိုပက်ဇ်အော့ရာဒေါက ဆိုသည်။

အခင်းဖြစ်စဉ်အတွင်း ရဟတ်ယာဉ်ပေါ်ပါဝန်ထမ်းများပါ အသက်သေဆုံးခဲ့ရကြောင်း မက္ကဆီကိုနိုင်ငံ ပြည်သူ့ကာကွယ်ရေးအေဂျင်စီက ဆိုသည်။(Xinhua)