မက္ကဆီကို ဘိန်းဘုရင်၏သား ပြန်ပေးဆွဲခံရ

မက္ကဆီကို ၊ သြဂုတ် ၁၇ ရက် (ဆင်ဟွာ)

ထောင်တွင်းအကျဉ်းချခံထားရသည့် မက္ကဆီကိုဘိန်းဘုရင် ဂျိုးအားချင်းဂူစမန် (Joaquin EI Chapo Guzman) ၏ သားတစ်ဦးသည် မက္ကဆီကိုနိုင်ငံအနောက်ပိုင်း Puerto Vallarta မြို့၌ပြန်ပေးဆွဲခြင်းခံလိုက်ရသူ ၆ ဦးတွင် ပါဝင်နေကြောင်း တာဝန်ရှိသူများက သြဂုတ်လ ၁၆ ရက်တွင် အတည်ပြုပြောကြားသည်။

မက္ကဆီကို ဘိန်းဘုရင်၏သားဖြစ်သူ ဂူစမန်ဆလာဇာ (Jesus Alfredo Guzman Salarzar) သည် Puerto Vallarta မြို့ရှိ စားသောက်ဆိုင်တစ်ဆိုင်၌ ပြန်ပေးဆွဲခံရသည့် လူ ၆ ဦးအနက် တစ်ဦးအပါအဝင်ဖြစ်ပြီး ၎င်းတို့အား လက်နက်ကိုင် ၇ ဦးလိုက်ပါလာသည့် ပစ်ကပ်ကားများဖြင့် သြဂုတ်လ၁၅ ရက် အာရုဏ်ဦးတွင် ဖမ်းဆီးခေါ်ဆောင်သွားခြင်းဖြစ်ကြောင်းသိရသည်။
“ ဘိန်းဘုရင် ဂူစမန်ရဲ့သား အသက် ၂၉ နှစ်အရွယ်ရှိ ဂူစမန်ဆာလာဇာ ပြန်ပေးဆွဲခံရတာပါ။ အဲဒီကိစ္စကို အတည်ပြုပါတယ်” ဟု Jalisco ပြည်နယ်ရှေ့နေချုပ် Eduardo Almaguer က သတင်းစာရှင်းလင်းပွဲတွင်ပြောကြားခဲ့သည်။
“ ထောက်လှမ်းရေးတပ်ဖွဲ့ဝင်တွေ နဲ့ကျွမ်းကျင်သူတွေရဲ့ စစ်ဆေးချက်အရ အဲဒီကားဟာ ပြန်ပေးသမားတွေရဲ့ ကားဆိုတာ သေချာပါတယ်” ဟု Almaguer က ဆက်ပြောသည်။
လက်ရှိအချိန်တွင် အဖမ်းခံထားရသူများထဲမှ လေးဦးကိုမူ မည်သူမည်ဝါဖြစ်ကြောင်း အတည်ပြုနိုင်ခဲ့သည်ဟု ဆိုသည်။
အဆိုပါ ဖမ်းဆီးသွားသူများမှာ နိုင်ငံမြောက်ပိုင်း Chihuahua ပြည်နယ် အကျဉ်းထောင်၌ ထောင်တွင်းအကျဉ်းချခံထားရပြီး အမေရိကန်နိုင်ငံသို့ရာဇဝတ်မှုဖြင့် လွှဲပြောင်း ပေးခံရမည့် ဘိန်းဘုရင် ဂူစမန်၏ ပြိုင်ဖက်အဖွဲ့မှဖြစ်ပြီး Jalisco New Generation အမည်ရှိ ဂိုဏ်အဖွဲ့ဝင်များဖြစ်နိုင်ကြောင်း ကနဦးစုံစမ်းစစ်ဆေးမှုများအရ ရှေ့နေချုပ်က ဆိုသည်။(Xinhua)